Te israeletik la yijkʼitayik jilel te wits Sinaí. Bajtʼik ta jochol takin kʼinal yuʼun Parán jaʼto kʼalal kʼotik ta jun lugar te Cades sbiil. Tey-a te Jehová la yalbey te Moisés: “Tikuna 12 ta tul winiketik, tsaa jtul ta jujun tsʼumbalil yuʼun ya stsajtayik te Canaán, jaʼ te lumkʼinal te ya kakʼbey te israeletike”. Jich yuʼun te Moisés la stikun 12 ta tul winiketik sok jich la yaltiklanbey: “Baanik ta Canaán sok ilaik ta lek te lumkʼinal teme ya xjuʼ tsʼumbajel tey-ae. Ilaik ta lek teme ay yip te winiketik o teme maʼuke, teme yakik ta kuxinel ta nailpakʼetik o ta mukʼul lumetik”. Te Josué sok te Caleb tey ochemik skʼoplal-euk te banti te 12 ta tul jtsajtaywanejetik bajtʼik ta Canaán.

Te jtsajtaywanejetik jalajik 40 kʼajkʼal tey-a. La yichʼik tal higo, granada sok tsʼusub, jich jul yalik: “Lekil kʼinal te lum Canaán, jaʼnax yuʼun te bayal yip te ants winiketik sok kʼax toyajtik te tsʼajkʼetik yuʼunike”. Pero te Caleb la yal: “¡Ya xjuʼ ya jtsaltik! Konik ta ora”. ¿Bin yuʼun ya akuy te jich la yal te Caleb? Jaʼ ta skaj te ay smukʼul yoʼtan ta stojol Jehová jich bitʼil te Josué. Pero te yantikxan 10 ta tul jtsajtaywanejetik jich la yalik: “Maba ya xbootik. Te ants winiketik tey-ae kʼax mukʼik, pajalik sok te najtʼil winiketike. Teme ya jpaj jbatik soke, jich ya xkʼootik bitʼil kʼulubetik ta sitik”.

Te israeletik chebaj yoʼtanik, ochik ta wulwunel sok jich la yalbey sbaik: “Jtsatik yan jwolwanej sok sujtukotik ta Egipto. ¿Bin yuʼun te ya xbootik ta Canaán? ¿Yuʼunbal ya jkʼan ya kichʼtik milel?”. Te Josué sok te Caleb jich la  yalik: “Jaʼ lek te ya jchʼuunbeytik skʼop te Jehová. Jaʼ ya skanantayotik. Mame xiwex”. Pero te israeletik maba la yichʼik ta mukʼ. La skʼan la smilik te Josué sok te Caleb.

¿Bin la spas te Jehovae? La yalbey te Moisés: “Bayal bintik lek jpasoj ta stojol te israeletike..., pero maba ya schʼuunbonik te jkʼope. Jich yuʼun ya kijkʼitayik jilel 40 jaʼbil liʼ ta jochol takin kʼinal jaʼto kʼalal ya xlajike, jaʼnax te yal snichʼnabik, te Josué sok te Caleb ya xnainik ta kʼinal te jamal la kal te ya kakʼbey te israeletike”.