Te Jehová la yalbey te Moisés: “Moan tal ta wits te banti ayone. Ya jtsʼibay te leyetik kuʼun ta pejchel tonetik sok yame kakʼbat”. Te Moisés mo bael ta wits, jil 40 kʼajkʼal sok 40 ajkʼabal tey-a. Kʼalal ay ta wits-ae, te Jehová la stsʼibay te Lajuneb Mantaliletik ta chaʼpejch ton sok la yakʼbey te Moisés.

Ta patil, te israeletik la skuyik te ijkʼitayotik yuʼun te Moisés. Jaʼ yuʼun jich la yalbeyik te Aarón: “¡Ya jkʼantik te ay machʼa ya swolotik. Pasbotik jun dios!”. Te Aarón jich la sut: “Ichʼbonik tal oro te ay awuʼunike”. Jich yuʼun la yulubtes te oro swenta ya yichʼ pasel slokʼomba jkojt jkolel toro. Te ants winiketik jich la yalik: “¡Te jkolel toro ini jaʼ te jdiostik te la slokʼesotik tal ta Egipto!”. La spasik kʼin sok ochik ta yichʼel ta mukʼ te jkolel toro te pasbil ta oro. ¿Chopolbal te bin la spasike? Chopol, melel jamal yalojik te jaʼnax ya yichʼik ta mukʼ te Jehovae. Pero ma jichuk la spasik.

Te Jehová la yil te bin yak ta kʼoel ta pasel sok jich la  yalbey te Moisés: “Koan bael te banti ay te lume, maba yakik ta schʼuunel te mantalil kuʼune. Yakik ta yichʼel ta mukʼ jun lotil dios”. Te Moisés ko tal ta wits sok te chaʼpejch tonetike.

Te kʼalal yak ta noptsajel-a te Moisés ta stojol te israeletik, la yaʼiy te yakik ta kʼayoje. Te kʼalal kʼote, la yil te yakik ta ajkʼot sok ta yichʼel ta mukʼ te slokʼomba te jkolel toroe. Te Moisés bayal ilin yuʼun, la schʼoj koel ta lum te chaʼpejch ton, jich topʼ yuʼun. Ta oranax bajtʼ sjin te lokʼomba te pasbil ta oro, ta patil jich la sjojkʼoybey te Aarón: “¿Bin la yalbat te lum ini swenta ya apas te bin kʼax chopole?”. Te Aarón jich la yal: “Mame x-ilinat, anaʼoj te bin yilel te stalelike. La skʼanik jun dios, jich yuʼun la jchʼoj ochel ta kʼajkʼ te oro, jich lokʼ tal te slokʼomba te jkolel toro ini”. Ma lek te bin la spas te Aarone. Te Moisés chaʼmo bael ta wits sok la skʼanbey wokol te Jehová te yakuk spasbey perdon te lume.

Te Jehová la spasbey perdon te israeletik te la schʼuunik te mantale. Kʼax tulan skʼoplal te ya skʼan schʼuunbeyik skʼop te Jehová soknix-euk te Moisese, ¿mabal jichuk?