La sta yorail te kʼotik ta Kʼinal te Albil skʼoplal ya yichʼik te israeletike, te nailpakʼ templo kʼatpʼuj ta snail te banti ya yichʼ ichʼel ta mukʼ te Jehová ta smelelile. Te sacerdoteetik la yakʼik ta nopel te Leyetik, te juesetik la stojobtesik te nasion. Ta parte ini ya yakʼ kiltik te bin-utʼil ya xjuʼ xkoltayot yuʼun te yantik ta swenta te bin ya jpastik sok te bin ya jtatik ta nopel spasele. Te jujuntul israeletik ay jun aʼtelil te ya skʼan ya spasik ta stojol te Jehová sok te spatxujkike. Akʼa ta nopel te bin lek la yakʼik ta ilel ta stojol te slumalik te Débora, Noemí, Josué, Ana, te yantsil nichʼan te Jefté sok te Samuele. Soknix te machʼatik ma jaʼuk slumalik-a te Israel jich bitʼil te Rahab, Rut, Jael sok te gabaonetik te jun yoʼtan la yakʼ sbaik ta stojol te israeletik, melel snaʼojik te ay ta yolilik te Diose.