Te Josué bayal jaʼbil la swol te lum yuʼun Jehová sok ayix 110 yaʼbilal-a te kʼalal laje. Te israeletik la yichʼik ta mukʼ Jehová te kʼalal kuxulto-a te Josué. Pero te kʼalal laje, och yichʼik ta mukʼ lokʼombaetik jich bitʼil ya spasik-a te ants winiketik ta Canaán. Jich bitʼil maba la schʼuunbeyikix smantal te Jehovae, la yakʼ te ya yichʼik utsʼinel yuʼun te ajwalil cananeo te Jabín sbiile. Jich yuʼun te lum la skʼanbey koltayel te Jehová. Te Jehová la yakʼbey jtul jwolwanej te israeletik te Barac sbiile. Jaʼ te machʼa ya skoltay te ants winiketik ta yichʼel ta mukʼ yan buelta te Diose.

Te Débora jaʼ jtul j-alwanej ants. La stikun ta ikʼel te Barac yuʼun ya yalbey yaʼiy te bin la yal te Jehová: “Baan ta mukʼul jaʼ yuʼun Cisón sok te 10,000 ta tul winiketik swenta ya awakʼbeyik guerra te soldadoetik yuʼun Jabín. Tey ya atsal-a te Sísara te jwolwanej yuʼun te soldadoetike”. Te Barac jich la yalbey te Débora: “Ya xboon teme ya ajokinon baele”. Jich la sut te Débora: “Ya jokinat bael, pero yame skʼan ya anaʼ te ma jaʼukat ya amil te Sísara. Te Jehová yaloj te ya yichʼ milel yuʼun jtul ants”.

Te Débora mo bael ta wits Tabor sok te Barac soknix te soldadoetik yuʼun ta yakʼel guerra. Kʼalal la yaʼiy stojol te Sísara, la stsob te karretaetik  yuʼun guerra sok te soldadoetik ta spamlej kʼinal. Te Débora jich la yalbey te Barac: “Te Jehová yame yakʼ te ya awaʼiy tsalaw”. Jich yuʼun te Barac sok te 10,000 ta tul swiniktake, koik tal ta wits swenta ya yochintayik te soldadoetik yuʼun Sísara te bayal yipike.

Ta patil, te Jehová la yakʼ maluk lokʼel te snojelal te mukʼul jaʼ yuʼun Cisón, jich te karretaetik yuʼun Sísara katsʼal jilik ta ajchʼal. Te Sísara ko ta skarreta sok animalnax lokʼ bael. Te Barac sok te soldadoetik yuʼun la stsalik te soldadoetik yuʼun Sísara, pero te Sísara lokʼ bael ta anel sok la snakʼ sba ta snailpakʼ jtul ants te Jael sbiile. Te Jael la yakʼbey yuchʼ jtebuk leche sok la smuk ta pakʼ. Te Sísara kʼub swayel, melel kʼax lujben-a. Jich yuʼun te Jael kʼunkʼun noptsaj bael ta stojol, la sbajbey ta sjol te steʼel nailpakʼ, jich la smil.

Ta patil, te Barac kʼot ta sleel te Sísara. Te Jael lokʼ tal ta snailpakʼ sok jich la yalbey: “Ochan, ya kakʼbat awil te winik te yakat ta sleele”. Te Barac och bael ta nailpakʼ tey la yil-a te lajemix te Sísara. Jich yuʼun te Barac sok te Débora la skʼayojtayik jun kʼayojil swenta ya yalbeyik yutsilal te Jehová, melel koltayotik ta stsalel te skontratakike. Te israeletik kuxinik 40 jaʼbil ta lamalkʼinal.