Ta patil, te israeletik la yijkʼitayik yan buelta te Jehová, jajch yichʼik ta mukʼ lotil diosetik. Te madianetik la yelkʼanbeyik schambalam te israeletik sok la slajinbeyik te yawal stsʼunubike, jukeb jaʼbil jich la spasik. Swenta ya skoltay sbaik-a te israeletike, la snakʼ sbaik ta yutil chʼenetik sok ta witstikil. Jich yuʼun la skʼanbeyik Jehová te yakuk xkoltayotik yuʼune. Jaʼ yuʼun te Jehová la stikun jtul chʼul-abat ta stojol jtul chʼiel winik te Gedeón sbiil swenta jich ya yalbey: “Te Jehová la stsaat yuʼun ya xkʼoat ta jtul winik te ya snaʼ ta lek yakʼel guerra te bayal yipe”. Te Gedeón jich la sjojkʼoy: “¿Bin-utʼil te joʼon ya jkoltay te lum Israel te bitʼil ma mukʼuk jkʼoplale?”.

Te Gedeón la skʼan snaʼ stojol teme yuʼun-nix jaʼ tsabil yuʼun-a te Jehovae. ¿Bin la spas? La yakʼ xejtʼelul pakʼ yuʼun lana sok jich la yalbey te Jehová: “Teme ajchʼem ta tsʼujul te xejtʼelul pakʼ ta sab pajele, pero teme jaʼ takin te lume, jich ya jnaʼ te jaʼat atsaojon ta skoltayel te Israele”. Ta yan kʼajkʼal, te xejtʼelul pakʼ ajchʼem ta jkʼaxel, yan stukel te lume takin. Jich yuʼun te Gedeón la skʼanbeyxan te Jehová te jaʼuk takin te pakʼe, pero te jaʼuk ajchʼem te lume. Te bin la skʼan te Gedeón kʼotxan ta pasel yan buelta. Te Gedeón kʼot ta yoʼtan te jaʼnix-a te la yichʼ tsael yuʼun te Jehová. Jich yuʼun la stsob te soldadoetik, bajtʼik ta yakʼbeyel guerra te madianetike.

 Te Jehová la yalbey te Gedeón: “Ya jkoltay ta tsalaw te israeletik. Jich bitʼil te kʼax tsobolike, yaniwan skuyik te jaʼnax ta yip stukelik te ya yaʼiyik tsalawe. Jaʼ lek te yakuk awaltiklanbey te machʼatik ya xiwike akʼa sujtikuk bael ta snaik”. Jich yuʼun 22,000 ta tul winiketik sujtik bael, jaʼnax 10,000 ta tul jilik. Ta patil te Jehová la yal: “Kʼax bayalikto. Ikʼa bael ta mukʼul jaʼ sok altiklanbeya te ya yuchʼik jaʼ. Jaʼnax ya awikʼtiklan jilel te machʼa ya yilik ya xtal te skontratakik te kʼalal yakik ta yuchʼel-a te jaʼe”. Jaʼnax 300 ta tul winiketik ma chʼay yoʼtanik te kʼalal yakik ta yuchʼel-a te jaʼe. Te Jehová jamal la yal te bitʼil te jtsojb soldadoetik-abi ya stsalik te 135,000 ta tul soldadoetik yuʼun Madián.

Ta ajkʼabal-abi, te Jehová la yalbey te Gedeón: “Ta ora ini, jaʼ yorailix te ya kochintaytik te madianetike”. Te Gedeón la yakʼtiklanbey te swiniktak, xulubiletik sok oxometik te yak ta tilel kʼajkʼ ta yutil sok la yaltiklanbey: “Jaʼme xa awilonik sok pasaik te bitʼil ya jpase”. Te Gedeón la yokʼesin te xulubil yuʼune, la swuy te yoxome, la sjimulan te skʼajkʼe sok tulan awun: “¡Te espada yuʼun te Jehová sok te Gedeón!”. Te 300 ta tul winiketik jich la spasik-euk. Te madianetik kʼax bayal xiwik yuʼun sok xtal xbajtʼiknax ta anel ta bayuk. Jich bitʼil te ma snaʼikix te bin ya spasike, jaʼnix och smil sbaik. Te Jehová la skoltay ta yan buelta te israeletik ta stsalel te skontratakike.