Te jtsajtaywanej israeletik bajtʼik ta lum Jericó sok jilik ta sna jtul ants te Rahab sbiile. Kʼalal la yaʼiy stojol te ajwalil yuʼun Jericó la stikun soldadoetik ta sna te Rahabe. Te ants la snakʼtiklan ta sba sna te chaʼtul jtsajtaywanejetik sok la yaltiklanbey te soldadoetik te akʼa sleik ta yan lugar. Jich yuʼun te Rahab jich la yaltiklanbey te jtsajtaywanejetike: “Yame jkoltayex, melel jnaʼoj te ay ta awolilik te Jehová sok te ya awochintayik te lumkʼinal ini. Awokolukik, albonik ta jamal te ya xkol jilel te jfamiliae”.

Te jtsajtaywanejetik la yalbeyik te Rahab: “Teme ya ajojkʼan tsajal chʼajan ta abentana, jamal ya kalbatkotik te maʼyuk bin ya xkʼot ta stojolik te machʼatik ayik ta yutil anae. Jich ya xkol jilel te afamiliae”.

Te Rahab la skoltay te jtsajtaywanejetik swenta ya xlokʼik bael ta Jericó, la skojteslan ta jlijkʼ chʼajan ta sbentanaul te snae. Te jtsajtaywanejetik oxeb kʼajkʼal la snakʼ sbaik ta witstikil, ta patil sujtik bael ta stojol te Josué. Ta patil, te israeletik kʼaxik ta yolil te mukʼul jaʼ Jordán sok la schajpan sbaik ta lek swenta ya yuʼuninik te lumkʼinale.  Te Jericó jaʼ te sbabial mukʼul lum te la yochintayike. Albotik ta mantal yuʼun Jehová te ya sjoytayik jun buelta ta jun kʼajkʼal te mukʼul lume, wakeb kʼajkʼal jich la spasik. Ta sjukebal kʼajkʼal, la sjoytayik jukeb buelta te mukʼul lum. Ta patil, te sacerdoteetik la yokʼesin skornetaik sok tulan awunik te soldadoetik yuʼun Israel. Jich te tsʼajkʼetik jinik koel. Manchukme te sna te Rahab ay ta sba jun tsʼajkʼ, maba jin koel stukel. Te Rahab sok te sfamilia kolik jilel, melel la yakʼ smukʼul yoʼtan ta stojol te Jehovae.