Bayal ta tul israeletik ochik ta yichʼel ta mukʼ lokʼombaetik. Jich yuʼun te Jehová la yakʼ te ya yichʼik wentainel yuʼun filisteoetik te israeletike. Pero ayto chaʼoxtul israeletik te yichʼojik ta mukʼ te Jehová jich bitʼil te Manoa (Manóah). Te winik-abi sok te yinam maʼyuk yal snichʼnabik. Ta jun buelta, te Jehová la stikun jtul chʼul-abat ta stojol te yinam Manoa, swenta ya yalbey te kʼopetik ini: “Ya xbajtʼ ayinuk jtul awal te ya skoltay te israeletik ta skʼab te filisteoetik. Yame xkʼot ta nazareo”. ¿Yabal anaʼ machʼatik-a te nazareoetike? Jaʼik te machʼatik abatinik ta stojol te Jehová te kʼax mukʼ skʼoplal sok te ma xjuʼ ya setʼik te stsotsil sjolike.

Ta patil, ayin snichʼan te Manoa, Sansón la sbiilintesik. Te kʼalal mukʼube, te Jehová la yakʼbey bayal yip. ¡Soknax ta skʼab ya xjuʼ ya smil jkojt choj! Ta jun buelta, la smiltiklan ta stukel 30 ta tul filisteoetik. Jaʼ yuʼun te filisteoetik la spʼajik ta jkʼaxel sok la sleik te bin-utʼil ya smilike. Ta jun ajkʼabal te Sansón wayal ta lum Gaza. Jich yuʼun te skontratak bajtʼik ta yochibal te lum-abi sok la smaliyik swenta ya smilik ta sab. Pero, ta ajkʼabal te Sansón jajch, bajtʼ ta yochibal te lum sok la stoch lokʼel te mukʼul puerta yuʼun te tsʼajkʼetik sok la skuch bael kʼalal ta sjol wits te nopol ay ta Hebrón.

Ta patil, te filisteoetik bajtʼ skʼoponik te Dalila te jaʼ slekol-a te Sansone, jich la yalbeyik: “Ya jtojatkotik bayal ta mil sejp plata teme ya xjuʼ awuʼun snaʼel bin yuʼun bayal yip te Sansone. Yuʼun ya jkʼan ya jtsaktik sok ya kotsestik ta karsel”. Te Dalila la skʼan te ya yichʼ te takʼin, jich la schʼuun spasel te bin albote. Ta sjajchibal, te Sansón ma la skʼan la yalbey te Dalila te banti ya xtal te yipe. Pero bayal buelta la swulilan ta kʼop te jich lujb sok jich la yal te bin smukoj ta yoʼtane. La yalbey te Dalila: “Maʼyuk bin-ora kakʼoj ta setʼel te stsotsil jole, melel nazareoon. Teme ya setʼbonik te stsotsil jole, ya xchʼay bael te kipe”. Kʼax maba lek te jich la spas te Sansón te la scholbey yaʼiy te Dalila, ¿mabal jichuk?

 Ta oranax te Dalila la yalbey te filisteoetik: “¡La jnaʼix stojol te bin smukoj ta yoʼtane!”. Te Dalila la yakʼ wayuk te Sansón ta sjol yakan sok ay machʼa la yikʼ tal yuʼun ya setʼbey te stsotsil sjole. Jich yuʼun te Dalila awun: “¡Sansón, liʼ ayikix te filisteoetike!”. Wijkʼ sit te Sansón, pero la snaʼ stojol te maʼyukix te yipe. Te filisteoetik la stsakik, la slokʼesbeyik sit sok la yotsesik ta karsel.

Ta jun buelta, bayal ta mil filisteoetik la stsob sbaik ta templo yuʼun te sdiosik te Dagón sbiile. Jich yakik ta aw: “Te jdiostik la yakʼ ta jkʼabtik te Sansón. Lokʼesaik tal yuʼun ya jtseʼlaytik jtsʼinuk”. La stejkʼanik ta yolil cheb mukʼul oyetik sok la slabanik. Te Sansón tulan kʼopoj: “Jehová awokoluk, akʼbon kip junukxan buelta”. Chʼiemix-a te stsotsil sjole, jich la sten bael sok spisil yip te cheb mukʼul oyetik yuʼun te templo. Jich yuʼun te mukʼul na jin koel sok lajik spisil te machʼatik tey ayik-ae. Jaʼnix jich te Sansón laj-euk.