Te Elcana jaʼ jtul israel-winik te ay chaʼtul yinam, jaʼ te Ana sok Penina. Pero jaʼ kʼuxan ta yoʼtan te Anae. Te Penina bayal yalatak, pero te Ana maʼyuk yalatak stukel. Jaʼ yuʼun te Penina ya slaban te Ana. Ta jujun jaʼbil, te Elcana ya yikʼ bael te sfamilia ta lum Silo, swenta ya yichʼik ta mukʼ te Jehová ta nailpakʼ templo. Ta jun buelta te kʼalal tey ayik-ae, te Elcana la yil te yak ta mel-oʼtan te Ana te bayal skʼanoje. Jich yuʼun la yalbey: “Ana awokoluk ma x-okʼat. Liʼ ayon ta atojol, te joʼone bayal kʼuxat ta koʼtan”.

Ta patil, te Ana stukel bajtʼ ta skʼoponel Dios. Ma juʼ yuʼun skomel sba ta okʼel la skʼanbey Jehová te yakuk xkoltayot yuʼune. La yalbey ta jamal: “Jehová, teme ya awakʼbon jtul kale, yame kakʼbat swenta ya x-abatin ta atojol ta spisil-ora”.

Te mukʼul sacerdote Elí la yil te yak ta okʼel te Ana sok te yak ta nijkʼel te yee soknix maba chikan ta aʼiyel te skʼope, la skuy te yakubene. Te Ana la scholbey yaʼiy: “Maʼuk kajwal, maba yakubenon. Yuʼun ay mukʼul wokolil kuʼun jich yuʼun yakon ta skʼoponel-a te Jehovae”. Te Elí la snaʼ stojol te ma lek te bin la yalbey te Anae, jich la yalbey: “Akʼa yakʼbat Jehová te bin la akʼanbeye”. Te Ana leknax kʼinal la yaʼiy, jich lokʼ bael tey-a. Mato sta jun jaʼbil-a, la sta jtul alal te la sbiilintes Samuel. ¿Yabal xkʼot ta awoʼtan te bin yaʼiyel la yaʼiy sba te Anae?

 Te Ana ma chʼay ta yoʼtan te bin jamal la yalbey te Jehová. Te kʼalal la yijkʼitay schuʼ te Samuel, te Ana oranax la yikʼ bael ta nailpakʼ templo swenta ya x-abatin ta stojol te Dios. Jich la yalbey te Elí: “La jkʼopon Jehová yuʼun ya yakʼbon te alal ini. Ta ora ini ya kakʼbey ta skʼab yuʼun ya x-abatin ta stojol spisil-ora”. Te Elcana sok te Ana ta jujun jaʼbil la yulaʼtayik te Samuel sok ya yichʼbeyik bael smajtʼan, yachʼil najtʼil kʼuʼul te maʼyuk skʼab. Kʼalal kʼax bael te tiempo, te Ana la sta oxtul skerem-al sok chaʼtul yantsil-alatak, ta swenta te koltayot yuʼun te Jehová.