Te Jehová jich la yalbey te Samuel: “Baan ta sna te Isaí (Jesé). Jtulnax ta spisil te snichʼnab jaʼ ya x-och ta ajwalil yuʼun Israel”. Jich bajtʼ te Samuel, kʼalal la yil te bankilal la yal: “Te kerem ini jaʼ te machʼa tsabile”. Pero albot yuʼun Jehová te ma jaʼuk te machʼa tsabile sok albotxan: “Te joʼone jaʼ ya kil te bin ay ta yoʼtan te ants winiketike, ma jaʼuk te bin yilele”.

Te Isaí la yikʼxan tal waktul snichʼnab swenta ya yakʼbey yil te Samuel. Pero te Samuel jich la yal: “Te Jehová maʼyuk stsaoj jtuluk te machʼatik liʼ ayike. ¿Aytobal yantikxan anichʼnab?”. Jich la yal te Isaí: “Jaʼxanix ma liʼ ay te David te ijtsʼinale yak ta skanantayel te tuminchijetike”. Kʼalal kʼot te David, te Jehová la yalbey te Samuel: “¡Jaʼme te machʼa tsabile!”. Jich yuʼun te Samuel la smalbey aceite ta sjol te David. Jich la stsa swenta jaʼ patil ya x-och ta ajwalil yuʼun Israel.

Ta patil, te israeletik yakik ta guerra sok te filisteoetik, ay jtul najtʼil soldado yuʼunik te ya snaʼ ta lek yakʼel guerra, Goliat te sbiile. Jujun kʼajkʼal ya slaban te israeletik sok jich tulan ya yal: “Tikunbonik tal jtul winik yuʼun ya jtsak jba sok. Teme ya stsalone, moso ya xkʼootik ta atojolik. Pero teme joʼon ya jtsale, moso ya xkʼoex kuʼuntik”.

Te David bajtʼ ta kampamento yuʼun soldadoetik ta yichʼbeyel bael sweʼel te sbankiltak te ayik ta soldadoe. Tey la yaʼiy stojol-a te bin yak ta yalel ta aw te Goliat, jich la yal te David: “¡Joʼon ya jtsak jba sok!”.  Te ajwalil Saúl jich la yalbey: “Ma xjuʼ awuʼun, keremato”. Te David jich la sut: “Jaʼ ya skoltayon te Jehová”.

Jich yuʼun te Saúl la yakʼbey stuuntes David te skʼuʼ yuʼun guerra, pero te David la yal: “Ma xjuʼ kuʼun tsalaw teme jlapoj ini”. Jich yuʼun te David la stsak te sjimochʼ. Te jimochʼ jaʼ jlijkʼ chʼajan te ya xtuun ta schʼojel tonetik. Ta patil bajtʼ ta mukʼul jaʼ, la stsa joʼpʼij tonetik te chʼululiknaxe la yotses ta smorral. Jich bajtʼ ta animal te banti ay te Goliate. Te najtʼil winik-abi jich la yal ta aw: “¡Tut kerem, noptsajan tal yame awil te bin ya xkʼot ta atojole! Ya kakʼbey stiʼbat abakʼetal te jaʼmal mutetik sok te jtiʼawal chambalametik”. Te David maba xiw, jich la yalbey: “Jaʼat ya xtalat ta jtojol sok espada soknix lanza, yan te joʼone ya xtalon ta sbiil te Jehovae. Mame jaʼuk yakat ta guerra sok te joʼonkotike, jaʼ yakat ta guerra sok te Diose. Spisil te machʼatik liʼ ayike, yame yilik te jaʼ bayalxan yuʼel te Jehová te bitʼil jun lanza sok jun espada. Jaʼme ya yakʼex ta jkʼabtik”.

Te David la yakʼ jpʼij ton ta sjimochʼ sok la schʼoj bael sok spisil yip. Ta swenta te koltayel yuʼun Jehová, bayal yip alokʼ te tone, jich kʼub ochel ta stiʼba te Goliate. Te najtʼil winik yal ta lum, jich laj. Te filisteoetik lokʼik ta anel swenta maba ya yichʼik milel. ¿Jaxan te jaʼate? ¿Yabal smukʼulin awoʼtan Jehová jich bitʼil te Davide?