Te Jehová la yakʼ bayal ta tul juesetik swenta ya swol te israeletik, pero la skʼanik te ayuk jtul ajwalil yuʼunike. Jaʼ yuʼun la yalbeyik te Samuel: “Spisil te nasionetik ay ajwaliletik yuʼun, jaʼnix jich te joʼotik ya jkʼantik jtul ajwalil”. Te Samuel maba lek la yaʼiy te bin yakik ta skʼanele. Jich yuʼun la skʼopon te Jehová, jich sutbot te skʼope: “Ma jaʼuk yakat ta pʼajel, joʼon ya spʼajonik. Albeya te lum te ya xjuʼ ya sleik jtul ajwalil, jaʼnax yuʼun bayal bintik ya yichʼik kʼanbeyel yuʼun”. Manchukme jich-abi, te ants winiketik la yalik: “¡Maʼyuk skʼoplal! ¡Ya jkʼantik jtul ajwalil!”.

Jich yuʼun, te Jehová la yakʼbey snaʼ te Samuel te jaʼ Saúl sbiil te machʼa ya x-och ta ajwalile. Kʼalal te Saúl la yulaʼtay te Samuel ta Ramá, te Samuel la smalbey aceite ta sjol swenta ya yakʼ ta ilel te jaʼ tsabil yuʼun ya x-och ta ajwalil.

Ta patil, te Samuel la stsob te israeletik swenta ya yakʼtiklanbey yil machʼa-a te yachʼil ajwalile. Pero maba la staik te Saule. ¿Yabal anaʼ bin yuʼun? Jaʼ ta skaj te snakʼoj sba ta yolil biluketik. Te kʼalal la staike, la slokʼesik tey-a sok la stejkʼanik ta yolil te ants winiketike. Jaʼ toyolxan snajtʼil te bitʼil yantik winiketik sok tʼujbilnax ta ilel. Te Samuel jich la yal: “Ilawilik te machʼa stsaoj te Jehová”. Te ants winiketik ochik ta aw: “¡Viva te ajwalil!”.

Ta sjajchibal, te ajwalil Saúl ya schʼuunbey smantal-a te Samuel sok te Jehovae. Pero jelon te stalele. Ta jun buelta, te Samuel la yalbey te Saúl te yakuk xmaliyot swenta ya yakʼik te chikʼbil majtʼanile. Te ajwalil ma jaʼuk ay ta swenta yakʼel te chikʼbil majtʼanile. Pero maba kʼot ta ora te Samuel, jich yuʼun te Saúl jaʼ la yakʼ te chikʼbil majtʼanile. ¿Bin la spas te Samuel? Jich la yalbey te Saúl: “Jaʼ la skʼan la achʼuunbey skʼop te Jehová, pero ma jichuk la apas”. ¿Kʼotbal ta yoʼtan te Saúl te spisil-ora ya skʼan ya schʼuunbey skʼop te Jehovae?

Ta patil, te Saúl bajtʼ yakʼbey guerra te amaleketik sok albot yuʼun Samuel te maʼyuk jtuluk machʼa kuxul ya yijkʼitaye. Pero te Saúl maba la smil te ajwalil Agag. Jich yuʼun te Jehová la yalbey te Samuel: “Te Saúl la yijkʼitayonix, maba ya schʼuunbonix te jkʼope”. Te Samuel bayal la smel  yoʼtan yuʼun, jich la yalbey te Saúl: “Te Jehová ya stsa yan ajwalil, melel te jaʼate maba ya achʼuunbeyix te skʼope”. Te kʼalal kʼan sujtukix bael-a te Samuel, te Saúl la stsakbey te stiʼil snajtʼil skʼuʼ sok chʼiʼ yuʼun. Te Samuel jich la yalbey te Saúl: “Jich te bitʼil la achʼiʼ te kʼuʼul ini, jich ya slokʼesat ta ajwalil te Jehová”. Jaʼ-abi ya skʼan ya yal te Jehová te ya yakʼbey ta skʼab yan ants winik te wentainel, te kʼuxuk ya x-aʼiyot yuʼun sok te ya schʼuunbot te skʼope.