Kʼalalto ta sbentanaul smukʼul na te ajwalil Acab ta lum Jezreel, spisil-ora ya sta ta ilel te tsʼusubiltik yuʼun jtul winik te Nabot sbiile. Te Acab la skʼan yuʼunin te tsʼusubiltik sok la spas tulan ta smanbeyel te Nabot. Pero te Nabot ma la skʼan schonbey, melel te Ley yuʼun te Jehová ya yal te ma xjuʼ ta chonel te lumkʼinal te ya yakʼ jilel te meʼil tatile. Jaʼ la spas Nabot te bin ya yal te Leye. ¿Yabal akuy te la yichʼ ta wenta Acab te bin la spas te Nabote? Maʼuk. Bayal ilin yuʼun. Kʼaxto ilin te jich la smak sba ta sna sok maba weʼ yuʼun.

Te yinam te Acab jaʼ te chopol ajwalil ants Jezabel. Jich la yal te antse: “Jaʼat ajwalilat yuʼun Israel, ya xjuʼ ya awuʼunin spisil te bin ya skʼan awoʼtan. Joʼon ya kil, jaʼme awuʼun ya xkʼot te tsʼusubiltike”. Jich yuʼun la stikun kartaetik ta stojol te ancianoetik yuʼun te lume. Ta kartaetik-abi, la stikunbey ta alel te ancianoetik te akʼa slebeyik smul te Nabot te yak ta sbolkʼoptayel te Dios sok te akʼa yichʼ chʼojel ta ton. Te ancianoetik la spasik spisil te bintik la yal te Jezabel. Ta patil, te ants jich la yalbey te Acab: “Te Nabot lajemix. Ya xjuʼ ya awichʼix jilel te tsʼusubiltik yuʼune”.

Bayal ants winiketik te maʼyuk smulik jich bitʼil te Nabot, la yichʼik milel yuʼun te Jezabel. La smiltiklan bayal ta tul j-abatetik yuʼun Jehová. Jaʼnix jich la schʼuun lokʼombaetik sok bayal bintik chopol la spas. Pero te Jehová la yil spisil-abi. ¿Bin la spas te Jehová ta stojol te Jezabele?

Te kʼalal lajemix-a te Acab, kʼax jun tiempo jaʼ och ta ajwalil te Joram (Jehoram) te snichʼane. Jich yuʼun te Jehová la stikun jtul winik te Jehú sbiil swenta ya yakʼbey kastigo te Jezabel sok te sfamiliae.

Te Jehú mo ta skarro, bajtʼ ta lum Jezreel te banti ay ta nainel te Jezabel. Jaʼnix jich te Joram bajtʼ ta skarro swenta ya sta sba sok te Jehú. Kʼalal te Joram la sta ta ilel te Jehú, jich la sjojkʼoybey: “¿Swentabal lamalkʼinal  talat?”. Te Jehú jich la sut: “Maʼyuk lamalkʼinal teme maba ya skom sba ta spasel bintik chopol te ameʼe”. Jich te Joram kʼan yakʼ buelta sok te skarro yuʼun ya xlokʼ ta anel, pero te Jehú la stʼimalteʼtay sok la smil.

Ta patil te Jehú bajtʼ ta smukʼul na te Jezabel. Kʼalal la yaʼiy stojol te Jezabel te yak ta talel te Jehú, jich yuʼun la sbon sit yelaw, la schʼal sjol sok la smaliy ta bentana ta schaʼkajal sna. Kʼalal kʼot te Jehú, te Jezabel maba lek la spatbey yoʼtan. Te Jehú la yawtay te j-aʼteletik yuʼun te ants te ayik ta stsʼeele: “¡Chʼojaik koel tal!”. Jich la schʼojik koel sok laj te antse.

Ta patil-abi, te Jehú la smil 70 ta tul snichʼnab te Acab sok la slajinbey skʼoplal te yichʼel ta mukʼ Baal ta lum-abi. ¿Labal awil? Te Jehová ya snaʼ spisil te bintik ya yichʼ pasele sok ya snaʼ bin-ora yakʼbey kastigo te machʼatik ya spasik te bin chopole.