Te Josafat (Jehosafat) jaʼ jtul ajwalil yuʼun Judá te la sjintiklan te skajtijib chikʼbil majtʼanil yuʼun te Baal sok te lokʼombaetik ay ta slumale. Te Josafat la skʼan te yakuk snopik ta lek te leyetik yuʼun Jehová te ants winiketike. Jaʼ yuʼun, la stikun principaletik sok levitaetik ta spamal Judá swenta ya yakʼik ta nopel te leyetik yuʼun Jehová ta stojol te lume.

Te nasionetik te nopol ayik ya xiwik yochintayel te Judá, melel snaʼojik te ya yichʼik koltayel yuʼun te Jehová. Jaʼnix jich ya yichʼbeyik bael majtʼaniletik-a te ajwalil Josafat. Pero te ants winiketik yuʼun Amón, Moab sok yantikxan lumetik te ayik ta skʼinal Seir, bajtʼ yakʼbeyik guerra te Judá. Te Josafat snaʼoj te ya skʼan koltayel yuʼun te Jehovae. Jich yuʼun la stsob ta Jerusalén spisil te winiketik, antsetik sok alaletik. Jich la skʼopon Dios te kʼalal tey ayik-ae: “Jehová, te manchuk ya akoltayonkotik, ma xjuʼ kuʼuntik tsalaw te jichuke. Awokoluk, albotik te bin ya skʼan ya jpastike”.

Te Jehová la yaʼiybey skʼop te Josafat, jich la sut: “Ma xiwex, joʼon ya jkoltayex. Baanik, lamana abaik, ilawilik te bin-utʼil ya jkoltayex”. ¿Bin-utʼil koltaywan te Jehovae?

Ta yan kʼajkʼal, te Josafat la stsa te machʼa ya xkʼayojinik sok la yaltiklanbey te jaʼ ya xnailajik ta stojol te soldadoetike. Lokʼik bael ta Jerusalén bajtʼik te banti ya yichʼ pasel te guerra ta lum Tecoa.

Te machʼatik kʼayojinik, tseʼel yoʼtanik ta skʼayojtayel ta tulan te Jehová. Te kʼalal jich yakik ta kʼayoj-ae, te Jehová yak ta skoltayel te lum yuʼune. La schʼaytesbey yoʼtan te amonetik sok te moabetik, jaʼnix och smil sbaik. Spisil lajik. Pero te Jehová la skanantay te ants winiketik yuʼun Judá, te soldadoetik sok te sacerdoteetike. Spisil te nasionetik te nopol ayike, la yaʼiyik stojol te bin la spas te Jehová sok la snaʼik stojol te maʼyuk bin-ora ya yijkʼitay ta skoltayel te lum yuʼun ta skʼab te skontratake. ¿Bin-utʼil ya skoltay Jehová te lum yuʼune? Bayal ta chajp te bin-utʼil ya spase. Te Jehová ma stuuntes ants winiketik yuʼun ya xkoltayot.