Ta lajunchajp stsʼumbal Israel bayal chopol ajwaliletik wentainwanik tey-a, pero te Acab kʼaxemtoxan-a te bin la spase. Nujpun sok jtul chopol ants te ya yichʼ ta mukʼ te dios Baal. Jezabel te sbiile. Te Acab sok te Jezabel la yakʼ te bayal ta tul ants winiketik ya yichʼik ta mukʼ te Baal. Jaʼnix jich la smilik bayal ta tul j-alwanejetik yuʼun Jehová. ¿Bin la spas te Jehová? La stikun te j-alwanej Elías swenta ay bin ya yalbey te Acab.

Te Elías la yalbey te Acab te maba ya yakʼ jaʼal ta Israel, melel kʼax chopol ajwalil stukel. Kʼaxem ta oxeb jaʼbil, maʼyuk bin chʼi ta lumkʼinal, te ants winiketik bayal swiʼnalik. Ta patil, te Jehová la stikun te Elías ta skʼoponel yan buelta te Acab. Te ajwalil Acab jich la yalbey te Elías: “Te jaʼate jaʼnax ya awakʼotik ta wokol. Jaʼ ta amul spisil ini”. Te Elías jich la sutbey: “Ma jaʼuk jmul te ma xyakʼ jaʼale. Kʼejp te kʼinal ta skaj te ya awichʼ ta mukʼ te Baal. Tsoba spisil te ants winiketik sok te j-alwanejetik yuʼun Baal ta wits Carmelo. Ya jpastik prueba”.

Te lum la stsob sbaik ta wits, jich te Elías la yaltiklanbey: “Yame skʼan ya atsaik machʼa ya atʼunik. Teme jaʼ Jehová te smelelil Diose, tʼunaik. Pero teme jaʼ smelelil dios te Baal, tʼunaik. Ya jpastik jun prueba, te 450 j-alwanejetik yuʼun te Baal akʼa schajpanik chikʼbil majtʼanil sok akʼa skʼoponik te dios yuʼunike. Jaʼnix jich te joʼon ya jchajpan chikʼbil majtʼanil sok ya jkʼopon te Jehová. Te dios te ya yakʼ tal kʼajkʼ, jaʼme te smelelil Diose”. Jich la spasik.

Jich yuʼun te j-alwanejetik yuʼun Baal la schajpanik te chikʼbil majtʼanile. Sjunal kʼajkʼal yakik ta skʼoponel: “¡Baal, aʼiya te jkʼoptike!”. Jich bitʼil te maba la sut kʼop te Baale, te Elías och ta slabanel jich la yal: “Tulan xa akʼoponik, wayalniwan sok ya skʼan te ay machʼa ya stij jajchele”. Och ta ijkʼubel te kʼinale, te j-alwanejetik yuʼun Baal yakik ta skʼoponel, pero maʼyuk machʼa sutbot yuʼun te skʼopike.

Te Elías la yakʼ te majtʼanil yuʼun ta skajtijib chikʼbil majtʼanil sok la yakʼbey bayal jaʼ ta sba. Ta patil la skʼopon te Jehová: “Jehová, akʼa yil te ants winiketik te jaʼat te smelelil Diose”. Ta oranax te Jehová la yakʼ tal kʼajkʼ ta chʼulchan ta schikʼel te majtʼanile. Te ants winiketik jich awunik:  “¡Jaʼ smelelil Dios te Jehovae!”. Jich te Elías la yal: “Mame xa awakʼ te kuxul ya xjil jtuluk te j-alwanejetik yuʼun Baal”. Ta kʼajkʼal-abi la yichʼ milel 450 ta tul j-alwanejetik yuʼun Baal.

Ta patil chiknaj tut tokal ta sba te mare, te Elías jich la yalbey te Acab: “Yak ta talel tulan yikʼal jaʼal. Chajpana te akarro sok baan ta ana”. Te chʼulchan noj ta ijkʼal tokal, tal ikʼ sok tulan jaʼal. Jich laj te kʼepel kʼinale. Te Acab bajtʼ ta oranax sok te skarroe. Te Jehová la skoltay te Elías swenta jaʼ ya x-animajxan ta oranax te bitʼil te karroe. Pero ¿teybal laj spisil-a te wokoliletik yuʼun te Eliase? Akʼa kiltik.