Te Jezabel la snaʼ stojol te bin kʼot ta pasel ta stojol te j-alwanejetik yuʼun Baal, bayal ilin yuʼun. Jich yuʼun la stikun jtul winik ta yalbeyel te Elías: “Pajel yame xlajat jich bitʼil te j-alwanejetik yuʼun Baal”. Te Elías bayal xiw yuʼun, jich bajtʼ ta anel ta jochol takin kʼinal. Tey la skʼopon-a te Diose: “Jehová ma stsʼijkix kuʼun. Koʼtan ya xlajonix”. Te Elías kʼax lujben-a, jich och swayel ta yeʼtal jpejt teʼ.

Pero jtul chʼul-abat la stij jajchel te Elías sok lamalnax la skʼopon: “Jajchan, weʼan”. Te Elías la yil jpejch pan te ay ta sba kʼixin tonetik sok jun jarra jaʼ. La sweʼ sok la yuchʼ, jich chaʼochxan swayel. Te chʼul-abat la stij jajchel yan buelta sok jich la yalbey: “Weʼan. Yame skʼan ay awip, melel namal te banti ya xbaate”. Jich yuʼun te Elías weʼxan jtebuk. Been 40 kʼajkʼal sok 40 ajkʼabal, jaʼto kʼalal kʼot ta wits Horeb. Och ta wayel ta jun chʼen. Te Jehová la skʼopon te Elías: “¿Elías, bin yakat ta spasel liʼ ini?”. Te Elías jich la yal: “Te israeletik maba la skʼotesik ta pasel te bin la yalik ta jamal te ya spasik ta atojole. La sjinik te skajtijib chikʼbil majtʼaniletik sok la smilik te j-alwanejetik awuʼune. Jaʼnix jich yoʼtan ya smilonik-euk”.

Te Jehová la yalbey te Elías: “Lokʼan tal, tejkʼana aba jilel tey ta wits”. Jich te Jehová la yakʼ tal tulan ikʼ, ta patil tal nijkʼel sok kʼajkʼ. Ta slajibal, te Elías la yaʼiy stojol te ay machʼa lamalnax kʼoponot yuʼune. Jich yuʼun la smuk sit yelaw ta skʼuʼ, tekʼel jilel ta stiʼil te chʼene. Jojkʼoybot yuʼun Jehová te bin yuʼun lokʼ ta anele. Jich la yal te Elías: “Joʼonxanix te j-alwanej te kuxulone”. Pero te Jehová jich la yal: “Maba atukel ayat. Ayto 7,000 ta tul ants winiketik ta Israel te ya yichʼonik ta mukʼe. Baan sok albeya te Eliseo te jaʼ tsabil yuʼun ya sjelolinat ta j-alwanej”. Ta oranax te Elías la spas te bin albot yuʼun te Jehovae. ¿Yabal skoltayat-euk te Jehová teme ya achʼuunbey te skʼope? Yak. Akʼa kiltik te bin kʼot ta pasel kʼalal kʼepel-a te kʼinale.