Te jayeb kʼajkʼal la yichʼ ta mukʼ Jehová te Salomone, ay lamalkʼinal ta Israel. Pero te Salomón nujpun sok bayal antsetik yuʼun yantik nasion te ya schʼuunik lokʼombaetik. Kʼunkʼun jelon yoʼtan te Salomón sok kaj schʼuun lokʼombaetik-euk. Bayal ilin te Jehová, jich la yalbey: “Yame jpojbey te wentainel yuʼun Israel te afamilia sok ya jxat ta cheb parte. Yame kakʼbey jtul j-aʼtel winik awuʼun te mukʼul parte, te afamilia jaʼnax ya swentain tut parte”.

Te Jehová ay bin yan la spas swenta ya xkʼot ta yoʼtanik-a te bin la yale. Jtul j-aʼtel winik yuʼun te Salomón te Jeroboam (Jeroboán) sbiile, lokʼem bael-a, la sta sba sok ta be te j-alwanej Ahías (Ahíya). Te j-alwanej la slokʼes te smukʼul kʼuʼ slapoj-ae sok la sjats ta 12 ta lijkʼ soknix jich la yalbey te Jeroboam: “Te Jehová ya spojbey te wentainel yuʼun Israel te sfamilia te Salomón sok ya xat ta cheb parte. Tsaka 10 ta lijkʼ te pakʼ ini, melel jaʼat ya xkʼoat ta ajwalil yuʼun te lajunchajp stsʼumbal Israel”. Kʼalal la snaʼ stojol te ajwalil Salomón te bin kʼot ta pasele, la skʼan smil te Jeroboam. Jich yuʼun te Jeroboam bajtʼ ta anel ta Egipto. Ta patil, laj te Salomone, jich jajch ta wentainwanej te Roboam (Rehoboam) te snichʼane. Jich yuʼun te Jeroboam la snop te maʼyukix kʼop, jich chaʼsujt tal ta Israel.

Ta patil te ancianoetik yuʼun Israel la yalbeyik te Roboam: “Teme lek ya awakʼ aba ta stojol te lume, junme yoʼtan ya yakʼ  sbaik ta atojol”. Pero te yamigotak te Roboam te jchʼieliktoe, jich la yalik: “Tulanme ya skʼan ya awakʼ aba ta stojol te lume. Suja ta spaselxan bayal aʼtel”. Te Roboam la schʼuunbey skʼop te yamigotak, jich la spas te bintik chopol ta stojol te ants winiketike. Jich yuʼun te ants winiketik la skʼaxuntayik kʼop, la yakʼik ta ajwalil te Jeroboam ta stojol te lajunchajp stsʼumbal Israel. Te wentainel yuʼun te lajunchajp tsʼumbalil la sbiilin wentainel yuʼun Israel. Te chaʼchajpxan stsʼumbal te Israele la sbiilin wentainel yuʼun Judá, jun yoʼtan la yakʼ sbaik ta stojol te Roboam. Jich la xat sba te lajchayeb ta chajp stsʼumbal Israel.

Te Jerusalén jaʼ la swentain te Roboam. Te Jeroboam ma la skʼan te ya xbajtʼik ta Jerusalén te ants winiketik ta yichʼel ta mukʼ te Jehovae. ¿Yabal anaʼ bin yuʼun? Jaʼ la sxiʼ teme pʼajotik yuʼune sok teme jaʼ kaj schʼuunbeyik skʼop te Roboame. Jich yuʼun te Jeroboam la spas chaʼkojt jkolel toroetik te pasbil ta oro sok la yalbey te lum yuʼune: “Kʼax namal ay te Jerusalén. Jaʼ lek te ya xjilex liʼ ini ta yichʼel ta mukʼ te chaʼkojt jkolel toroetike”. Jich la schʼuun te ants winiketik sok chʼay ta yoʼtanik te Jehová ta yan buelta.