Te Josías och ta wentainwanej ta Judá te kʼalal waxakebtonax yaʼbilal-ae. Ta skʼajkʼalel-abi te ants winiketik ya spasik magia sok ya schʼuunik lokʼombaetik. Te kʼalal 16 yaʼbilal-a te Josías la skʼan snop yichʼel ta mukʼ te Jehová te bitʼil ya skʼan pasele. Ta patil, te kʼalal ayix 20 yaʼbilal-ae kaj sjintiklan te lokʼombaetik sok te skajtijib chikʼbil majtʼanil ta spamal te lume. Jaʼ nix jich te kʼalal ayix 26 yaʼbilal-ae, la schajpan spisil swenta ya slekubtes te templo yuʼun te Jehová.

Te mukʼul sacerdote Hilcías (Hilquías) la sta ta templo te balbil jun yuʼun te Ley yuʼun te Diose. Te balbil jun-abi jaʼniwan la stsʼibay te Moisese. Te Safán te secretario yuʼun te ajwalil, la yichʼ bael te balbil jun ta stojol te Josías sok tulan la skʼopon. Te Josías la schʼam yaʼiy sok la snaʼ stojol te ayix bayal jaʼbil te maba schʼuunojbeyik skʼop Jehová te lume. Jich yuʼun te ajwalil Josías la yalbey te Hilcías: “Te Jehová kʼax ilinem ta jtojoltik. Kʼopona, swenta ya yalbotik te bin ya skʼan ya jpastike”. Te Jehová jich la yalbey te j-alwanej ants te Hulda sbiile: “Te lum Judá la yijkʼitayon. Ya xbajtʼ kakʼbey kastigo, pero mato ya jpas ta skaj te ayto ta ajwalil te Josías, melel pekʼel yoʼtan stukel”.

Kʼalal te ajwalil Josías la yaʼiy stojol te bin la yichʼ alele, bajtʼ ta templo sok la stsob spisil te lum yuʼun Judá. Ta patil, tulan la skʼopon te Ley yuʼun te Jehová ta stojol te lume. Te Josías sok te lum la yalik ta jamal te ya schʼuunbeyik skʼop te Jehová sok spisil yoʼtanik.

 Te lum yuʼun Judá bayalix jaʼbil te ma spasikix te Pascua. Pero te Josías la skʼopon ta Ley te ya skʼan pasel ta jujun jaʼbile, jich yuʼun la yalbey te lume: “Yame yichʼ pasel te kʼin yuʼun Pascua ta stojol te Jehová”. Ta patil te Josías la yakʼ mantaliletik swenta ya yichʼ akʼel bayal chikʼbil majtʼanil sok te ayuk machʼatik ya xkʼayojinik ta templo. Jich yuʼun la spasik te kʼin Pascua sok te Kʼin yuʼun Pan te maba yichʼoj Levadura te jalaj jukeb kʼajkʼal. Maʼyuk jich spasojik-a te kʼin Pascua jaʼto te kʼalal kuxulto-a te Samuele. Te Josías yuʼun-nix kʼux ta yoʼtan-a te Ley yuʼun te Diose. ¿Jaxan te jaʼate? ¿Yabal amulan snopel ta swenta te Jehovae?