Te lum Asiria yochintayojix-a te lajunchajp stsʼumbal Israel. Te ajwalil yuʼun Asiria, te Senaquerib, jaʼnix jich la skʼan yuʼunin te chaʼchajp stsʼumbal Judá. Jich yuʼun kʼunkʼun kaj yuʼunin te jujunpam lumetik yuʼun te Judá. Pero te lum te la smulanxan yuʼunine, jaʼ te Jerusalén. Te bin ma snaʼojuk te Senaquerib, jaʼ te kanantaybil yuʼun Jehová te lume.

Te Ezequías ajwalil yuʼun Judá, la yakʼbey bayal takʼin te Senaquerib swenta maba ya yochintay te Jerusalén. Te Senaquerib la stsak te takʼine, pero patil la stikun soldadoetik te ya snaʼik yakʼel guerra ta yochintayel te lume. Kʼax bayal xiwik te ants winiketik, melel yakik ta noptsajel tal ta oranax te asiriaetike. Jich yuʼun te Ezequías la yaltiklanbey: “Ma xiwex. Te asiriaetik bayal yipik, pero jaʼ ya yakʼbotikxan bayal kiptik te Jehová”.

Te Senaquerib la stikun te rabsaqué te j-abat yuʼune, swenta ya xbajtʼ slaban te ants winiketik ta Jerusalén. Te rabsaqué tekʼel jilel ta stiʼil te lum sok jich tulan awun: “Te Jehová ma xjuʼ yuʼun skoltaybelex. Ma xa awakʼ sloʼlayex te Ezequías. Maʼyuk jtuluk dios te ya skoltayex ta jkʼabkotik”.

Te Ezequías la sjojkʼoybey Jehová te bin ya xjuʼ ya spas ta swenta-abi, te Jehová jich la sut: “Ma xiwat yuʼun te bin ya yal te rabsaqué. Te Senaquerib maba ya yochintay te lum Jerusalén”. Ta patil, te Ezequías la yichʼ akʼbeyel kartaetik yuʼun te Senaquerib te jich ya yal: “Akʼa abaikix ta kʼabal. Te Jehová ma xjuʼ yuʼun skoltaybelex”. Jich yuʼun te Ezequías la skʼopon te Jehová: “Jehová, awokoluk, koltayawotik yuʼun jich ya snaʼik-a te jaʼat te smelelil Diose”. Te Jehová jich la yal: “Te ajwalil yuʼun Asiria maba ya yochintay te lum Jerusalén. Joʼon ya jkanantay te lum kuʼune”.

Te Senaquerib schapojix ta lek-a te ya yochintay te Jerusalén. Pero ta jun ajkʼabal, te Jehová la stikun jtul  chʼul-abat ta skampamento te asiriaetik, te ayikix ta stsʼeel te lume. ¡Te chʼul-abat la smil 185,000 ta tul soldadoetik! Te soldadoetik yuʼun te ajwalil Senaquerib te bayal yipike la yichʼtiklan milel, maʼyuk bin juʼix ta pasel yuʼun, jich sujt bael ta sna. Jich la yichʼ koltayel yuʼun Jehová te Ezequías sok te Jerusalén, jich bitʼil la yal ta jamal te ya spase. Te ayukat ta Jerusalén-ae, ¿labal awakʼ smukʼul awoʼtan ta stojol Jehová te jichuke?