Ta jpam mukʼul lum yuʼun Asiria te Nínive sbiil te ants winiketik tey-ae, mero kʼax chopolik. Te Jehová la stikun ta Nínive te Jonás te jaʼ jtul j-alwanej yuʼune, swenta ya xbajtʼ yalbey te ants winiketik te yakuk sjel te stalelike. Pero te Jonás maba bajtʼ ta Nínive, la sjel sbe mo ta jun barko te ya xbajtʼ ta Tarsis.

Kʼalal ay ta yolil mar-a te barko, tal tulan yikʼal jaʼal, te jtijbarkoetik bayal xiwik yuʼun. La skʼopon te diosetik yuʼunik sok la sjojkʼoybey sbaik: “¿Bin yuʼun te jich yak ta kʼaxel ta jtojoltike?”. Te Jonás jich la yaltiklanbey: “Joʼon jmul. Yakon ta anel yuʼun ma jkʼan ya jpas te bin la yalbon te Jehovae. Chʼojawonik ochel ta jaʼ swenta ya xlamaj-a te yikʼal jaʼale”. Te jtijbarkoetik ma la skʼan schʼojik ochel ta jaʼ te Jonase, pero la yalulan te jichuk akʼa spasbeyike. Jich yuʼun la schʼojik ochel ta mar, jich kom te tulan yikʼal jaʼale.

Te Jonás la skuy te ya xlaje. Kʼalal yak ta kʼubel ochel ta mar-ae la skʼopon te Jehová. Jich yuʼun te Jehová la stikun jkojt mukʼul chay te bikʼot yuʼun, pero maba milot. Ta yutil schʼujtʼ te chay, te Jonás la skʼopon te Jehová: “Ya kalbat ta jamal te spisil-ora ya jchʼuunbat te akʼope”. Te Jehová la yakʼ ayinuk oxeb kʼajkʼal te Jonás ta yutil schʼujtʼ te chaye, ta patil la yakʼ te xejtayot lokʼel ta lumkʼinal.

Te Jehová ma la yakʼ lajuk te Jonás, pero ¿yabal skʼan ya yal te maba ya yichʼix tikunel bael ta Nínive? Maʼuk. Te Jehová la stikun bael yan buelta, te Jonás la schʼuunix spasel-a. Bajtʼ sok jich la yalbey te chopol  ants winiketik tey-ae: “Ta 40 kʼajkʼal, te Jehová yame slajin te Nínive”. Jich yuʼun ay bin kʼot ta pasel te ma snaʼojuk-ae. Te ants winiketik yuʼun Nínive la schʼuunik te kʼope sok la sjel te stalelike. Te ajwalil yuʼun Nínive la yalbey te ants winiketik: “Albeyaik wokol te Dios sok sujtesa awoʼtanik ta stojol, jichniwan maba ya xlajotik”. Kʼalal la yil Jehová te la sujtes yoʼtanik te ants winiketike, maba la slajin te lume.

Te Jonás ilin, melel te Jehová maba la slajin te lume. Nopa awaʼiy jtsʼinuk. Te Jehová la snaʼ smaliyel te Jonás sok la snaʼbey yoʼbolil sba. Pero te Jonás maba la snaʼbey yoʼbolil sba stukel te ants winiketik ta Nínive. Te bin la spas jaʼ te bajtʼ sjujkan sba ta tiʼ lum ta yanil jpejt chʼupak teʼ sok chajpnax la yakʼ ta ilel sit yelaw-a. Ta patil, te jpejt teʼ takij, te Jonás bayal ilin. Jich yuʼun te Jehová la yalbey: “Jaʼ ayxan skʼoplal ta awoʼtan te jpejt teʼ te bitʼil te ants winiketik yuʼun Nínive. La jnaʼbey yoʼbolil sbaik, jaʼ yuʼun la sta skolelik”. ¿Bin la skʼan Jehová te yakuk xkʼot ta yoʼtan te Jonase? Jaʼ te jaʼ ayxan skʼoplal te ants winiketik yuʼun Nínive te bitʼil biluk teʼe.