Kermanotak:

Te bitʼil yakotik ta yichʼel ta mukʼ te Jehová kʼux ta koʼtantik te sKʼope. Schʼuunej koʼtantik te yuʼun-nix melel-a te aʼiyejetik te ya scholbey skʼoplal tey-ae, te lekil tsitsel ta swenta te jkuxlejaltike sok ya yakʼ ta ilel bayal ta chajp te skʼuxul yoʼtan te Jehová ta stojol te ants winiketike (Salmo 119:105; Lucas 1:3; 1 Juan 4:19). Te bin ya jkʼantik sok spisil koʼtantike, jaʼ te ya jkoltaytik te yantik ta snopel te smelelil kʼop te ayik ta Bibliae. Jaʼ swentail te ya kakʼbeyexkotik te libro ini: Te bintik ya yakʼbon jnop te Biblia. Ya jkʼan ya jcholbeyexkotik awaʼiyik te bin yilel te libro ini.

Te libro ini la yichʼ pasel ta swenta te alaletike. Jaʼnix jich ya xjuʼ xtuun yuʼunik-euk te machʼatik ayix yaʼbilalik te ya skʼan ya snopikxan te Bibliae. Jich bitʼil te jpisiltik ya xjuʼ ya jkʼopontik te Bibliae, jich yuʼun jnaʼojtik te bayal bintik lek ya xlokʼ kuʼuntik-a te kʼalal ya jchaʼiltik te bintik ya yakʼ ta nopele, melel ya skoltayotik ta stael te smelelil tseʼel-oʼtanile.

Ta swenta te bintik ya schol te Bibliae, te libro ini jaʼ ya scholbey skʼoplal te skuxlejal te ants winiketik jaʼto tal te kʼalal la yichʼ pasel te sbabial ants winike. La yichʼ pasel tulan swenta ma tulanuk ta ichʼbeyel swentail te aʼiyejetike. Jaʼnix jich la yichʼ pasel tulan yuʼun jich la yichʼ tsʼibayel te bitʼil kʼotik tal ta pasele.

Pero te libro ini, ma jaʼuknax ya schol te bintik kʼot tal ta pasel ta nameye. Te jujun kapituloetik sok te dibujoetik yichʼoje ya yakʼ kiltik kʼoem te bin-nix kʼax ta skuxlejalik-a te ants winiketike sok te bin-nix yaʼiyel la yaʼiy sbaik-ae.

Te libro ini ya yakʼ ta ilel bin-utʼil te Biblia ya yalbey skʼoplal ta swenta ants winiketik te la schʼuunbeyik skʼop te Jehová sok te machʼatik maba la schʼuunbeyik te skʼope. Jaʼnix jich ay bintik ya yakʼ jnoptik ta swenta te bintik la spasike (Romanos 15:4; 1 Corintios 10:6). Te libro ini yichʼoj 14 parte. Ta sjajchibal te jujun parte, ya scholbey skʼoplal jtebuk te bintik ya xbajtʼ jnoptik tey-ae.

 Teme ay awal anichʼnabe ya xjuʼ ya akʼoponik junuk kapitulo sok, jaʼnix jich ilbeyaik skʼoplal te dibujoetike. Ta patil ya xjuʼ ya akʼoponik te textoetik yuʼun Biblia te banti lokʼem skʼoplal te jujun kapituloe. Koltaya te awal anichʼnab yuʼun ya yil te bin-utʼil snitojbey sba skʼoplal te bin ya skʼoponik ta Biblia sok te bintik ya yakʼ ta nopel te jujun kapitulo yuʼun te libroe. Jichnix ya xjuʼ ta pasel sok te machʼatik ayix yaʼbilalik swenta ya snaʼik-a te bin ya yal ta spajkal te Bibliae.

Ay smukʼul koʼtankotik ta swenta te libro ini te ya xbajtʼ skoltay spisil te ants winiketik te lek yoʼtanike, jich bitʼil jchʼieletik soknix te machʼatik ayix yaʼbilalik ta snopel te sKʼop Diose sok te yakuk spas ta skuxlejalik te bintik ya yakʼ ta nopel te libroe. Jichme ya xjuʼ ya yichʼik ta mukʼ-euk te Jehová sok yame xjuʼ x-ochik tey-euk-a te banti te sfamilia te kʼux ta yoʼtane.