Alnichʼnajik te Adán sok te Evae, jich pʼol bayal ants winiketik ta Balumilal. Jaʼnix jich ay yantik chʼul abatetik te la skʼaxuntaybeyik smantal te Diose, jich bitʼil te la spas te Satanase.

Koik tal ta Balumilal sok la skʼatpʼun sbaik ta winiketik yuʼun la skʼan la yikʼ yinaminik te antsetike. La staik yal snichʼnabik te kʼax chopolik sok kʼax bayal yipik te bitʼil yantik ants winiketike.

Noj ta chopol ants winiketik te Balumilale. Te Biblia jich ya yal «te bayel bintic chopol yac spasbelic te machʼatic ayic ta bahlumilal» sok te spisil ora jaʼ baem ta yoʼtanik snopel spasel te bintik chopole.

Te Noé lekil winik kʼax ta kʼinal. Albot yuʼun Jehová te ya laj yichʼ lajinel ta nojel jaʼ, o ta pulemal te chopol ants winiketike.

Te Jehová la yalbey te Noé te akʼa spas jun mukʼul kaxa te ya xjuʼ xlikot moel yuʼun te jaʼe, te naʼbil sba jich bitʼil arca. La yotseslan spisil te jayeb machʼatik ay yuʼune soknix spisil ta chajp chambalametik.

Te Noé la yaltiklambey te yantik ants winiketik te ya xtal te pulemale, jaʼukmeto ma la schʼuunik. Ay chaʼoxtul te tseʼlaywanike sok ay yantik te ilinik bayal yuʼune.

Te kʼalal pastaj yuʼun te arca te Noé, la yotseslan tey-a te chambalametike.