¿Bin ya skʼan ya schʼuun te alumnoe?
Te Pedro ma snaʼ bin ya spas sok jajch ta xiwel. Te smaestra lajeltonax scholbey skʼoplal te bin la yal te Charles Darwin ta swenta te evolución te jaʼ tijbotxan yoʼtan te cientificoetik yuʼun ya yilbeyikxan skʼoplal. Ta swenta te bin la staik ta ilele la yichʼ ilel te manix jichuk-a te bin schʼuunejik te ants winiketik. Ta patil, te maestra ya sjojkʼoy bin ya snopik te alumnoetike.
Ma snaʼ bin ya schʼuun te kereme, melel akʼbil snop yuʼun te smeʼ stat te jaʼ la spas Dios te Balumilal sok spisil te bintik ay tey-ae. Akʼbil snop te smelelil te bin ya yal te Biblia ta swenta te la yichʼ pasel spisil te bintik aye sok te lotil spisil te bin ya yichʼ alel ta swenta te evolución, melel maʼyuk pruebaetik te ya yakʼ ta ilel te yuʼun-nix jich-ae. Te smeʼ stat sok te smaestrae ya skʼan ya xkoltaywanik, pero ¿machʼa ya skʼan ya schʼuunbey skʼop te Pedroe?
Jich ya xkʼot ta pasel ta stojol bayal alumnoetik ta swolol Balumilal. ¿Bin ya skʼan ya spas te Pedro sok te yantik alumnoetike? ¿Mabal jichuk te jaʼiknix ya skʼan ya staik ta nopel te bin ya schʼuunike? Jichnix-a. Ya skʼan ya yilik te pruebaetik te ya yichʼ akʼel ta swenta te evolución sok te pruebaetik ta swenta te la yichʼ pasel spisil te bintik aye, jichme ya staik ta nopel te bin ya schʼuunike.
Te Biblia ya yal te ma skʼan te orauknax ya jchʼuuntik te bin ya yal te yantike, jich ya yal: «Te machʼa ma snaʼ qʼuinal spisil ya schʼuhun, yan te machʼa pʼij yoʼtan ya stsahtay te banti ya xbehene» (Proverbios 14:15). Te Biblia ya yalbotik te ya skʼan ya jtuuntestik te jpʼijiltik yuʼun ya kiltik teme melel spisil te bin ya kichʼtik albeyele (Romanos 12:1, 2).
Te jun ini ma jaʼuk ya skoltaybey skʼoplal te religionetik te jaʼ ya skʼanik te ya yichʼ akʼel ta nopel ta escuelaetik te pasbil spisil te bintik aye. Jaʼ ya yalbey skʼoplal chaʼoxtul te machʼa ya yalik te jichnax chiknaj tal te kuxlejalil sok te lotil-laj te bin ya yal te Biblia ta swenta te la yichʼ pasel spisil te bintik aye.
Jaʼ ya kilbeytik skʼoplal te célula, melel jaʼ te bin ay yuʼun spisil te bintik kuxajtike. Jaʼ ya kilbeytik skʼoplal te chajpnax bin-utʼil pasbil-a te celulaetik sok te bin ya yichʼ alel ta swenta te evolucione.
Ta jpisiltik ya skʼan te ay bin-ora ya jojkʼoybey jbatik: «¿Aybal machʼa la spasotik, o chiknajotik ta swenta evolución?». Ayniwan bin anopojix ta swenta-abi. Te folleto ini ya yakʼ ta naʼel cheʼoxeb pruebaetik te bayal ants winiketik koltaybilik swenta ya yilik te ay Jpaswanej kuʼuntike.
