Te kʼalal la akʼopon te folleto ini, ¿chajpnaxbal la awil-a te bintik ya yal te Biblia ta swenta te ciencia tabil ta ilel te yuʼun-nix jich-ae? Bayal machʼatik chajpnax ya yaʼiyik-abi, jaʼnix jich chajpnax ya yaʼiyik-a te ay bin ya yal te Biblia te yan bitʼil ya scholik te religionetike, jich bitʼil te wakebnax kʼajkʼal te yichʼoj veinticuatro ora pastaj yuʼun Dios te bintik ay ta chʼulchan sok ta Balumilal. Maʼyuk bin ya yal te ya skontrain te bin staoj ta ilel te cientificoetik ta swenta te jayebix jaʼbil ay te chʼulchan sok te Balumilale. *

Te Biblia maba bayal ya yalbey skʼoplal te bin-utʼil la schiknajtes Dios te kuxlejalil liʼ ta Balumilal, jaʼ yuʼun ayto bayal bin ya xjuʼ ya yichʼ pasel investigar, jaʼnix jich bayal te bintik ya xjuʼ ya yalik te cientificoetike. Te Biblia ya yal te Dios la spas spisil te bintik kuxajtike ta jujunchajp la spas (Génesis 1:11, 21, 24). Te bintik ya yal te Bibliae ay maba pajal sok te bintik ya yakʼ ta nopel te cienciae, pero maba ya skontrain stukel te bintik staojix ta ilel te ciencia te yuʼun-nix jich-ae. Te jayebix jaʼbil kʼaxeme, te ciencia yakʼoj ta ilel te ay ya xjelon te bintik ya yakʼik ta nopele, pero te bin staojik ta ilel te yuʼun-nix jich-ae, ma xjelon stukel.

Bayal ants winiketik ma skʼan ya yilik te bin ya yakʼ ta nopel te Bibliae, melel chebajem yoʼtanik ta skaj te bin ya spas te religione. Ya yilik te ta religione ma spasik te bin ya yal te Biblia bayal bintik ma lek ya spasik sok ya schʼik sbaik ta guerra, pero ¿stojilbal te ma jkʼan ya jkʼopontik te Biblia ta skajnax te bin ya spasik te religionetike? Ay cientificoetik te pekʼel yoʼtanik kʼax maba lek yilojik bin-utʼil te ay ants winiketik jaʼ ya stuuntesik te bin ya yakʼ ta nopel te evolución yuʼun ya spʼajik te ants winiketike. ¿Ta swenta-abi snujpʼbal te ya kaltik te ma lekuk te bin ya yichʼ akʼel ta nopel ta swenta te evolucione? Jaʼ ya skʼan tael ta ilel ta lek te bin yichʼoj alel ta swenta-abi sok ta yilel te pruebaetike.

Ya kikʼatkotik ta snopel ta lek te bin ya yal te Bibliae. Yame ata ta ilel te ma pajal te bin ya yakʼ ta nopel te Biblia sok te bin ya yakʼ ta nopel te religionetike. Te Biblia ma jaʼuknax ya yakʼ ta nopel te ma skʼan ya schʼik sbaik ta guerra te j-abatetik yuʼun te Diose, jaʼnix jich ya yakʼ ta nopel te ma skʼan ya schʼites ta yoʼtanik te pʼajawe (Isaías 2:2-4; Mateo 5:43, 44; 26:52). Te Biblia ya yakʼ ta nopel te ma skʼan te tojolnax bin ya x-och jchʼuuntik, jaʼ ya skʼan te ayuk banti stsakoj yip te bin ya jchʼuuntik sok te ya skʼan ya jtuuntestik ta lek te jpensartik yuʼun ya kichʼtik ta mukʼ te Dios (Romanos 12:1; Hebreos 11:1). Jaʼnix jich ya stij koʼtantik ta yilbeyelxan skʼoplal te jojkʼoyeletik te bayal buelta spasojbey sbaik te ants winiketike.

Jich bitʼil ayniwan ajojkʼoybeyoj aba bin yuʼun te ay wokolil, teme aynix-a te Diose. Te Biblia ya yakʼbey sujtib-abi soknix yantik jojkʼoyeletik. * Jaʼuk xa achʼuun te bin smelelile. Leknax te sujtib ya yakʼ te Bibliae sok xcholetnax, pero te bin mukʼxan skʼoplale jaʼ te ay pruebaetik ya yakʼe. Spisil-abi ma jichuknax chiknaj.