Ta swenta te chʼul espiritue, te jpuk-kʼop Pablo la yalbey skʼoplal te ay baeltik ya skʼan ya smuk sjolik te hermanaetik te kʼalal ya spasik aʼtelil ta stojol te Jehová. ¿Bin-ora sok bin yuʼun? Akʼa kiltik te bin la yal te jpuk-kʼop Pablo ta 1 Corintios 11:3-16 te banti ya yal chaʼoxchajp te bin-utʼil ya skʼan pasel te aʼtelile yuʼun jich ya yichʼik ta mukʼ te Diose. Ay oxchajp te bin la yalbey skʼoplale: 1) te bintik aʼtelil ya spasik te puersa ya skʼan ya smuk te sjolike, 2) te banti ya spasik te aʼtelile, sok 3) te bin yuʼun ya smuk sjol te antse.

 Te bintik aʼtelil ya spasik. Ay chaʼchajp la yalbey skʼoplal te Pabloe, jaʼ te skʼoponel Dios sok te yalel skʼop j-alwanej (versículo 4, 5). Jnaʼojtik te skʼoponel Diose, jaʼme jich ya kichʼtik ta mukʼ-a te Jehovae, te yalel te skʼop j-alwanej te xchie, jaʼme te kʼalal ya yakʼik pʼijubteswanej ta swenta Biblia te hermanoetik sok te hermanaetik ta kʼajkʼal ini. Jich yuʼun, ¿labal skʼan la yal te Pablo te spisil-ora ya smuk sjolik te hermanaetik te kʼalal ya skʼoponik Dios o ya xpʼijubteswanik ta swenta te Bibliae? Maʼuk. Jaʼ chikan te banti ya yichʼ pasel-abi.

Te banti ya spasik te aʼtelile. Ay chaʼchajp la yalbey skʼoplal te Pabloe, jaʼ ta yutil na sok ta congregación. Jich la stsʼibay: «Te winic ha jolal yuʼun te ants, [...] spisil antsetic te ma ba smucoj sjol a te ya scʼoponic Dios o te ya yalic te scʼop-jalwanej, ya yacʼ ta qʼuexlal te sjole» (versículo 3, 5). Te winike jaʼ jolol yuʼun te ants ta yutil sna, melel jaʼ akʼbil yaʼtel yuʼun te Jehovae. Jich yuʼun, ¿bin ya xkʼot ta pasel teme ay ya spas aʼtelil te ants te jaʼnax ay ta swenta te jolol yuʼune? Teme ma xyakʼ ta ilel te ya yichʼbey ta mukʼ te yaʼtel yichʼoj te smamlale, yame yakʼ ta kʼexlal. Akʼa kiltik chaʼoxchajpuk te bin-utʼil ya xjuʼ ya xkʼot ta pasel-abi. Jnop kaʼiytik te ay jtul hermana te tey ay-a te smamlal te kʼalal ya yakʼ pʼijubtesel ta swenta Biblia. Jich bitʼil te ya yichʼbey ta mukʼ te yaʼtel yichʼoj te smamlale, jaʼ yuʼun ya smuk sjol. Chikan teme yichʼoj jaʼ o maʼuke, melel jaʼ jolol ta yutil na. * ¿Jaxan teme ay jtul hermana ya skʼopon Dios o ya yakʼ pʼijubtesel ta swenta Biblia te kʼalal tey ay-a te skerem al te pekʼelto yaʼbilal te yichʼojix jaʼe? Manchukme ma jaʼuk jolol ta yutil na, te smeʼe yame skʼan ya smuk sjol. ¿Bin yuʼun? Melel ya yichʼbey ta mukʼ yaʼtel te winiketik te yichʼojik ta congregacione.

Te schebal banti ya yichʼ pasel te la yal te Pablo, jaʼ ta congregacione, jich la stsʼibay: «Teme ay machʼa ya scʼan ya shach cʼop, acʼa snaʼ te mayuc yan costumbre cuʼuntic o yuʼun te [congregacionetik]  yuʼun Dios» (versículo 16). Te Jehová yakʼojbey yaʼtel te winiketik te yichʼojikix jaʼ ta swentainel te congregacione (1 Timoteo 2:11-14; Hebreos 13:17). Jaʼnax ya yakʼbey yaʼtel ta ancianoil sok ta siervo ministerial te winiketik swenta ya skanantayik te tuminchijetike (Hechos 20:28). Jaʼukmeto ayniwan jtul hermana te jaʼ ya xjuʼ ya spas te aʼtelil te ay ta swenta jtul winik te yichʼoj jaʼ sok te pʼijubenix ta spasele. Jich bitʼil te jaʼniwan ay ya swol te tsoblej swenta scholel skʼop Dios ta skaj te maʼyuk jtuluk winik te yichʼoj jaʼ te tsabil yuʼun te ancianoetike. Melel te tsoblej-abi jaʼ pajal sok te pʼijubtesel ya yichʼ akʼel ta congregacion te banti jaʼnax ya swol jtul hermano. Jaʼnix jich teme ay jtul hermana te ya yakʼ nojptesel yuʼun Biblia yame skʼan ya smuk sjol teme jokinbil yuʼun jtul hermano te yichʼojix jaʼe. * Melel ya spas jun aʼtelil te jaʼnax ay ta swenta jtul winik.

Jaʼukmeto ma puersa ya smuk sjol te hermana te kʼalal ay bintik ya yichʼ pasel ta swenta yichʼel ta mukʼ te Diose. Jich bitʼil te kʼalal ya yakʼ skomentario ta tsoblej, ta scholel skʼop Dios ta nanatik (manchukme jokinbil yuʼun te smamlale o yan hermano te yichʼoj jaʼe) soknix te kʼalal ya skʼopon Dios o te kʼalal ya snopik te Biblia sok te yalatak te mato yichʼojuk jaʼe. Jaʼukmeto, ¿bin ya xjuʼ ya spas teme ay ma snaʼ te bin-ora ya smuk te sjole? Te bin nail ya skʼan ya spase, jaʼ te ya yil ta lek te banti ay-ae sok te bin ya xbajtʼ spase. * Jaʼukmeto teme mananix snaʼ bin ya spas-ae, sok teme ya x-albot yuʼun te yoʼtan te akʼa smuk te  sjole, maba chopol teme jich ya spase, jich bitʼil chikan ta ilel ta lokʼomba.

Te bin yuʼun ya smuk sjol te antse. Ta versículo 10 ay cheb bin ya jtabeytik skʼoplal tey-a te bin yuʼun ya skʼan ya smuk sjol te hermanae: «Ya scʼan te ay seña yip yaʼtel ta sjol te ants, ta scaj te chʼul aʼbatetique». Te sbabiale, jaʼ te «ay seña yip yaʼtel ta sjol te ants». Jich yuʼun te pakʼ ya stuuntes te ants te ya smuk sjol-ae, jaʼ jun seña te ya yichʼbey ta mukʼ te yaʼtel te winiketik te yichʼojikix jaʼ te ya swentainik te congregacione. Ta swenta te ya smuk sjol te antse, jich ya yakʼ ta ilel te jun yoʼtan ta stojol te Dios sok te kʼux ta yoʼtane. ¿Bin-a te schebal swentail yuʼun ya smuk sjol te antse? Jich bitʼil la yal te versiculoe, «ta scaj te chʼul aʼbatetique». Jaʼukmeto ¿bin-utʼil ya yilik te chʼul abatetik te ay yuʼelik te kʼalal ya smuk sjol te antse?

Te chʼul abatetik ya yilik spisil te machʼatik ayik ta organización yuʼun te Jehová, jich bitʼil te machʼatik ya x-abatinik ta chʼulchan sok ta Balumilal, jaʼ baem ta yoʼtanik yilel te bin-utʼil ya yakʼik ta ilel te ya yichʼik ta mukʼ te bitʼil ya xmantalteswan te Diose. Jaʼnix jich ya snopbeyik stalel te ants winiketik te ma tojukik te kʼalal ya yilik te bin-utʼil ya schʼuunik mantale. Melel te chʼul abatetik-abi, jaʼnix jich ya skʼan te ya yakʼik ta ilel-euk te ya yakʼ sbaik ta wentainel yuʼun te machʼatik kajal yuʼunike, te ma spisilukik jich la spasik ta nameye (Judas 6). Ta jujun buelta te jtul hermana stukel ya xlokʼ ta yoʼtan te ya yichʼbey ta mukʼ yaʼtel jtul hermano te yichʼojix jaʼe, manchukme jaʼ bayalxan bintik ya snaʼ o pʼijxan, ta swenta-abi, bayal bin ya snopik te chʼul abatetike. Kʼaxtoxan lek bin ya snopik ta stojol teme jaʼ jtul hermana te tsabil yuʼun ya xbajtʼ ta chʼulchane. ¿Bin yuʼun? Melel te hermana-abi yame sjokin ta mantalteswanej te Cristo ta chʼulchan te banti jaʼ mukʼxan yaʼtel ya yichʼ ta stojol te chʼul abatetike. Jich bitʼil te la kiltikixe, jaʼ mukʼul majtʼanil te bin ay ta swentaik spasel te hermanaetike. Ta swenta te bitʼil jun yoʼtanik sok te ya yakʼ sbaik ta wentainele, jich ya yakʼik ta ilel pekʼel-oʼtanil sok schʼuunel mantal ta stojol bayal millón ta tul chʼul abatetik.