1, 2. ¿Machʼatik tseʼel yoʼtanik yuʼun te kʼalal ya yilik te machʼatik ya yichʼik jaʼe?

¿AYIXBAL bayal jaʼbil te yakat ta abatinel ta stojol te Jehovae? Teme jiche, ayniwan bayal buelta awaʼiyojix te discurso yuʼun ichʼ jaʼe. Chikan te jayebix buelta awaʼiyoj stojole, bayal ya stij koʼtantik kʼalal ya kiltik te machʼatik nakalik ta sbabial juktajibaletik ta mukʼul tsoblejetik sok te kʼalal ya stejkʼan sbaik ta yalel ta jamal te ya yakʼ sbaik ta stojol te Jehovae. Te kʼalal jich ya spasik-abi, ya jpakʼ jkʼabtik yuʼun sok ay ya x-okʼotik yuʼun tseʼel-oʼtanil. ¡Kʼax bayal ya yakʼ sbujtsʼkʼinal te kʼalal ya kiltik te yantik ya yakʼ sbaik ta stojol te Jehovae!

² Jaʼ-abi, ya kiltik cheʼoxeb bueltanax ta jujun jaʼbil. Jaʼukmeto ay machʼatik te bayal buelta ya yilik stukel-abi, jaʼ te chʼul abatetike. ¿Yabal xtal ta awoʼtan te jayebto «yutsil-oʼtanil ta chʼulchan» kʼalal ya yilik ta jujun semana te ay bayal mil ta tul yakik ta yakʼel sbaik ta stojol te Jehová ta swolol Balumilale? (Lucas 15:7, 10.) Ta melel ya x-akʼbotik bayal tseʼel-oʼtanil kʼalal ya yilik te yak ta mukʼubel te organización yuʼun te Jehová ta Balumilale (Hageo 2:7).

3. ¿Bin yuʼun te Satanás «hich te bin utʼil choj» sok bin yak ta sleel?

³ Jaʼukmeto, te chopol espirituetike maba tseʼel yoʼtanik yuʼun te ay bayal mil ta tul ants winiketik ya yijkʼitay jilel spasel te bintik ilaytik sba yuʼun te balumilal sok te ya yichʼik jaʼe. Te chopol espirituetike ya xlajik yuʼun slab yoʼtanik. Jaʼ-abi ma chajpuknax ya kaʼiytik, melel te Satanás la yal te malaj ayuk machʼa ta swenta skʼuxul yoʼtan ya yakʼ sba ta abatinel ta stojol Jehovae sok te malaj ayuk machʼa jun yoʼtan ya yakʼ sba te kʼalal ay tulan tsajel ta stojole (kʼopona te sjun Job 2:4, 5). Jaʼ yuʼun te kʼalal ay machʼa ya yakʼ sba ta stojol te Jehovae, jich ya yakʼ ta ilel te jaʼ jpaslot te  Satanás sok jich kʼoem te ya spakʼbey ta majel yelawe. Ta skaj te yak ta pakʼbeyel ta majel yelaw kʼoem te Satanás yuʼun te bayal ta mil ants winiketike, jaʼ swentail te bayal lijkʼem sjol te bayuk yak ta beel «hich te bin utʼil choj, ta slehel machʼa ya slajin [ta swenta te schʼuunel yoʼtane]» (1 Pedro 5:8). Ta swenta-abi, yananix sle-a te bin-utʼil ya kijkʼitaytik ta yamigoinel te Diose o ya sjin ta jkʼaxel (Salmo 7:1, 2; 2 Timoteo 3:12).

4, 5. 1) ¿Bin-a te chaʼchajp kombil ta spasel te Satanás yuʼun te Jehovae? 2) ¿Bin jamal ya yalbotik te Bibliae?

⁴ Manchukme kʼax xiʼbantik sba «hich te bin utʼil choj», maba ya skʼan ya jxiʼtik. ¿Bin yuʼun? Melel te Jehová ay cheb te bin skomoj ta spasele. ¿Bintik-a? Jaʼ te maʼyuk bin-ora ya xjuʼ yuʼun slajinel ta jkʼaxel te lum yuʼun te Diose. Jaʼ-abi snaʼoj te Satanase, te Jehová yaloj te ya xkol jilel ta «tulan wokolil» te «ipal ants winiketik» jaʼik te smelelil j-abatetik yuʼun te Diose, melel spisil te bin ya yale yananix xkʼot ta pasel-a (Apocalipsis 7:9, 14, TNM).

⁵ Ta schebal, te Satanase maba ya slajin te machʼa nopol ay ta stojol te Jehovae. Jaʼ-abi yuʼun-nix smelelil-a te j-alwanej Azarías jich la yalbey te ajwalil Asá: «Ya me sjoquinex te Jehová teme jun awoʼtan yac awacʼ abahic ta stojol» (2 Crónicas 15:2; kʼopona te 1 Corintios 10:13). Ay bayal machʼatik ya jtabeytik skʼoplal ta Biblia te maba la yakʼ sbaik ta loʼlayel yuʼun te Satanase (Hebreos 11:4-40). Teme nopol ya kakʼ jbatik ta stojol-euk te Diose, maba jaʼnax ya skoltayotik ta sitintayel jbatik sok te Pukuje, ya xjuʼ ya jtsaltik. Jich jamal ya yalbotik te Bibliae: «Pasaic ta contro te pucuje, jich me ya yijqʼuitayat jilel» (Santiago 4:7, XCD).

6. ¿Bin-utʼil ya skʼan ya slajinotik ta tulutul te Satanase?

⁶ Jich te bitʼil la kiltikixe, te Pukuje maʼyuk bin-ora ya slajin te lum yuʼun te Diose. Jaʼukmeto ya xjuʼ ya slajinotik ta tulutul teme maba ya jkanantay jbatike. ¿Bin-utʼil? Jaʼ te ya spejkʼanbotik te schʼuunel koʼtantik ta stojol Jehová yuʼun jich ya slajinotik-a. Jaʼ yuʼun ya xkaj yakʼ tal tulan utsʼinel, ta tulutul ya jtsal jbatik sok, jaʼnix jich ya sle bintik-utʼil ya sloʼlayotik. Kilbeytik skʼoplal oxchajpuk te loʼlayel yuʼune.

7. ¿Bin yuʼun te kʼaxto sok slab yoʼtan skontrainej te lum yuʼun Dios te Satanase?

⁷ Tulan utsʼinel. Te jpuk-kʼop Juan la yal te «ay ta scʼab pucuj swohlol te bahlumilale» (1 Juan 5:19). Te kʼopiletik-abi, ay bin ya sjultesbotik ta koʼtantik. Jich bitʼil te Satanás sloʼlayejix spisil te ants winiketike, jaʼ yuʼun yoʼtaninej skontrainel sok slab yoʼtan te lum yuʼun Dios te maba juʼem yuʼun slajinele (Miqueas 4:1; Juan 15:19; Apocalipsis 12:12, 17). Ta skaj te maʼyukix bayal kʼajkʼal yuʼune, kʼax lijkʼem sjol, jaʼ yuʼun yakʼojbeyxan yipal ta kontrainwanej. Ta kʼajkʼal ini yakotik ta sitintayel te slajibal utsʼinel ya yakʼbotik te kʼax xiʼbantik sbae, jaʼ te ya skʼan ya slajin ta jkʼaxel te schʼuunel koʼtantik ta stojol te Diose.

8. ¿Bin la skʼan la yal te Pablo te ya jtsal jbatik sok te chopol espirituetik?

⁸ Ta tulutul ya jtsal jbatik sok. Te Pablo jich la stsʼibaybey te jchʼuunjeletike: «Ha ya jtsal jbahtic soc [...] chopol espírituhetic te ay yipic te ayic ta toyol» (Efesios 6:12). ¿Binwan la skʼan la yal sok te kʼopil «tsalel», te xchie? Ta kʼopil griego ya skʼan ya yal te ay machʼa ya stsak sbaik ta majele, ma jaʼuk te namalto yiloj  sbaike. Jich la yakʼ ta naʼel te Pablo te jujuntulotik ya jtsak jbatik sok te chopol espirituetike. Chikan te banti ay jlumaltike teme ya schʼuun yoʼtanik o maʼuk te ay chopol espirituetik te ants winiketike. Mame xchʼay ta koʼtantik te kʼalal la kakʼ jbatik ta stojol te Jehovae, jich kʼot te bitʼil ochotik ta jtsalbel jbatik sok te chopol espirituetike. Jaʼtonix te kʼalal la kichʼtik jaʼe, maba jkuxoj koʼtantik ta stsalbel jbatik sok. Jaʼ yuʼun te Pablo oxeb buelta la yalbey ta mantal te jchʼuunjeletik ta Éfeso te ayuk yip yoʼtanike (Efesios 6:11, 13, 14).

9. 1) ¿Bin yuʼun ya stuuntesik bayal ta chajp loʼlayel te Pukuj sok te chopol espirituetike? 2) ¿Bin yuʼun ya sjowiytesbey te snopjibal yuʼun te jchʼuunjeletik te Pukuje sok bin-utʼil maba ya kakʼ jbatik ta tsalel? (Ilawil te « ¡Tsajtayame aba yuʼun te bintik ya xloʼlaywan-a te Satanase!».) 3) ¿Bin yanxan ya kilbeytik skʼoplal?

⁹ Ya sle bintik-utʼil ya sloʼlayotik. Te jpuk-kʼop Pablo la yal te manchuk ya kakʼ jbatik ta tsalel yuʼun te bayal ta chajp «loʼloyel» yuʼun te Satanase (Efesios 6:11). Te kʼalal te Pablo la stuuntes te kʼopil «loʼloyel» ta griegoe, jaʼ la skʼan la yakʼ ta naʼel te ay bayal ta chajp te bin-utʼil ya xloʼlaywan te Pukuj sok te chopol espirituetik yuʼune. Ay bayal swentail te bin yuʼun jich ya spasike. Melel yilojik te ay chaʼoxtul j-abatetik yuʼun Dios te ay ya xjuʼ yuʼunik stsalel te tsajel ya xtal ta stojolike, jaʼukmeto te kʼalal ya xtal yan tsajel ta stojolike ay tey ya xchʼayikix-a. Jaʼ yuʼun te Pukuj sok te chopol espirituetike, ya yilik ta lek te bin ya jpastik ta jujuntule. Ya sleik te banti pekʼel ayotik ta swenta te schʼuunel koʼtantik yuʼun tey ya stsalotik-a. Te bin ya yakʼ smukʼul koʼtantike, jaʼ te bitʼil chapalotik ta leke, melel te Biblia ya sjultesbotik ta koʼtantik te bintik ya stuuntes ta loʼlaywanej te Pukuje (2 Corintios 2:11). Ta libro ini, la jnopbeytikix skʼoplal bayal  chajp loʼlayel, jich bitʼil te sleel bayal jbiluktik, chopol joʼtaktik sok te yalel ta mulile. Akʼa kiltikxan yan: jaʼ te yaʼtel te chopol espirituetike.

10. 1) ¿Bin smakojbey skʼoplal te yaʼtel chopol espirituetike? 2) ¿Bin ya snop Jehová ta swenta te yaʼtel chopol espirituetike sok bin ya snop awoʼtan-euk?

¹⁰ Te yaʼtel chopol espirituetike, jaʼ smakojbey skʼoplal spisil te machʼa ya x-aʼtej ta jnaʼojel, j-akʼchamel, te machʼa ya skʼopon te machʼa lajemikixe sok te bintik swenta magia. Te machʼatik jich ya spasik-abi jaʼ ayik ta skʼab te Pukuje, melel jaʼ ya skʼopon sbaik sok te chopol espirituetike. Jich bitʼil te jnopojtikixe, jkʼaxel «ihlaybil» yuʼun te Jehovae (Deuteronomio 18:10-12; Apocalipsis 21:8). Te Jehová ya yalbotik «ihlayahic te bin chopol», jaʼ yuʼun maʼyuk bin-ora ya xtal ta koʼtantik yakʼel ta kʼabal kʼoem te Jehová ta swenta skʼoponel te chopol espirituetike (Romanos 12:9). Ta melel maʼyuk bin-ora jich ya jnop jpastik-abi.

11. Ta jujun buelta te kʼalal ya xjuʼ yuʼun sloʼlaybelotik te Satanás ta sleel koltayel ta swenta te chopol espirituetike, ¿bin ya yal yuʼun? Ala kaʼiytik sok jun lokʼombakʼop.

¹¹ Ta melel, te spasel yaʼtel te chopol espirituetike, jaʼ ya jwalakʼpatiytik te Jehovae. Jaʼ yuʼun te Pukuje ya sle bin-utʼil ya xyalotik ta spasel-abi. Ta jujun buelta te kʼalal ya xjuʼ yuʼune, ya yal te juʼix yuʼun tsalawe. ¿Bin-utʼil? Jnop kaʼiytik te lokʼombakʼop ini. Teme ay jtul chopol ants winik ya yakʼbey ta yoʼtan jtul awamigo te ya swalakʼpatiyate, ta swenta-abi ya x-akʼbot stseʼelil yoʼtan yuʼun. Yaniwan stuuntes te awamigo swenta ya sbolkʼoptayat sok ya skʼexlaltesat. Jaʼ jich ya xkʼot teme ay jtul j-abat yuʼun Dios te ya sle koltayel  ta swenta te chopol espirituetike, jich spasemal yoʼtan yak ta schʼuunbeyel skʼop te Satanase sok jich ya swalakʼpatiy te Jehovae. ¡Nopanax awaʼiy jayebto stseʼelil yoʼtan ya x-akʼbot te Satanase! ¿Yabal jkʼantik te tseʼel yoʼtan kuʼuntik te Satanase? Maʼuk, melel maʼyuk bin-ora ya jwalakʼpatiytik te Diose.

12. ¿Bin ya stuuntes te Satanás yuʼun ya sjel te bin jnopojtik ta swenta te yaʼtel te chopol espirituetik?

¹² Maba ya kichʼtik loʼlayel yuʼun ta swenta te yaʼtel chopol espirituetik teme jkʼaxel ya jpʼajtike. Te Satanase, snaʼoj stojol-abi, jaʼ yuʼun ya spas tulan ta sjeltayel te bin ya jnoptike. ¿Bin-utʼil? Jaʼ ya yakʼ jchʼuuntik te jaʼ «lec te bin ma lecuc soc te ma lecuc te bin leque» (Isaías 5:20). Bayal buelta jaʼ ya stuuntes te bin yilojix te ya stsalotik-ae: jaʼ te ya stuuntes jojkʼoyeletik te ya schebajtes koʼtantik ta swenta te smelelil kʼope.

13. Ala kaʼiytik cheʼoxebuk jojkʼoyeletik te stuuntesoj te Satanás yuʼun ya schebajtes koʼtantik ta swenta te smelelil kʼope.

¹³ Akʼa kiltik chaʼoxchajp te bintik-utʼil ya xloʼlaywan te Pukuje. Ta tsʼunbil kʼinal jich la sjojkʼoybey te Evae: «¿Hich bal la yalbat te Diose: Ma me xaloʼbe sit spisil te teʼetic ayic ta tsʼumbil qʼuinal?». Ta skʼajkʼalel te Job, te Satanás kʼot ta chʼulchan te banti stsoboj sbaik te chʼul abatetike, jich la yal ta swenta te tojil winik Job: «¿Yuʼun bal tojol yichʼoj ta mucʼ Dios te Job?». Bayal ta cien jaʼbil ta patil, kʼalal jajcheltonax ta scholel skʼop Dios-a te Cristoe, jich albot yuʼun te Pukuje: «Teme haʼat Snichʼanat Dios, hala te yacuc xcʼatpʼuj ta pan te tonetic ini». Mananix ayuk kʼexlal ta yoʼtan-a, melel te kʼalal jich la yale, jaʼ yak ta slabanel-a te bin la yal te Jehová te ayix  tal wakeb semana-ae, jich la yal: «Ha Jnichʼan ini te cʼux ta coʼtan, te bayel yutsil coʼtan ta stojol» (Génesis 3:1; Job 1:9; Mateo 3:17; 4:3).

14. 1) ¿Bin-utʼil juʼem yuʼun te Pukuj te ya yakʼ ta koʼtantik te maniwan chopoluk te yaʼtel te chopol espirituetike? 2) ¿Bin ya jnopbeytikxan skʼoplal?

¹⁴ Jich bitʼil te nameye, te Pukuje jaʼnix yak ta stuuntesel te loʼlayel-abi. Jich bitʼil, yaniwan yakʼ ta koʼtantik te ma chopoluk te yaʼtel te chopol espirituetike. Mel-oʼtantik sba te ay chaʼoxtul j-abatetik yuʼun Dios te ya sjojkʼoybey sbaik teme yuʼun-nix chopol spisil-a te yaʼtel te chopol espirituetike (2 Corintios 11:3). Jaʼ yuʼun, ¿bin-utʼil ya jkoltaytik yuʼun ya stojobtes te snopjibal yuʼunike? ¿Sok bin ya skoltayotik swenta maba jich ya jnoptik-euk? Swenta ya jtabeytik sujtib te jojkʼoyeletik-abi, kiltik chaʼchajp te banti yotsesoj Satanás te yaʼtel te chopol espirituetike. Jaʼ te bintik ya jkʼasestik kʼajkʼal-ae sok te bin-utʼil ya jpoxtay jbatike.

15. 1) ¿Bin yilel ya yilik te yaʼtel chopol espirituetik ta yantik lumetike? 2) ¿Bin-utʼil ay yichʼojbeyikix te snopjibal yuʼun ants winiketik ta swenta te yaʼtel chopol espirituetik te j-abatetik yuʼun te Diose?

¹⁵ Ta kʼajkʼal ini, te ants winiketike jaʼ ya xbajtʼxan ta yoʼtanik ta sleel koltayel ta swenta te yaʼtel chopol espirituetik, j-akʼchameletik sok yantikxan te bintik ya spasik swenta ay bin ya snaʼik ta skʼopik, jaʼ-abi kʼaxemtoxan jich ya spasik te ants winiketik ta yantik lumetike. Bayal ta chajp pelikulaetik, libroetik, programaetik yuʼun videojuego ya yakʼik ta ilel te yaʼtel chopol espirituetik te mulantiknax sba sok te ma chopoluk ta pasel yilele. Soknix ay libroetik sok pelikulaetik te jaʼnax ya yakʼ ta nopel te bintik swenta  chopol espirituetik te pujkem skʼoplal ta bayuknaxe. Te chopol espirituetike juʼem yuʼunik ta yakʼbeyel ta yoʼtan te ants winiketik te malaj x-utsʼinwan te aʼtelil ya spasike. ¿Aybal jich ya snopik-euk te j-abatetik yuʼun te Diose? Ay. ¿Bin-utʼil? Kalbeytik skʼoplal junuk te bayal jich ya xkʼot ta pasele, jtul j-abat yuʼun Dios te la yil jun pelikula te nojel ta bintik swenta magia o yantikxan, jich la yal: «Laj, la kil te pelikulae, jaʼukmeto ma pajaluk sok te spasel yaʼtel te chopol espirituetike». ¿Bin yuʼun te kʼax xiʼbantik sba te jich ya jnoptik-abi?

16. ¿Bin yuʼun te xiʼbantik sba te ya jmulantik yilel te bintik ya skʼasesik kʼajkʼal-a te kapal sok te yaʼtel chopol espirituetike?

¹⁶ Ta melel, te yilel bintik swenta yaʼtel chopol espirituetike ma pajaluk sok te mero joʼotik ya jpastike, jaʼukmeto maba ya skʼan ya yal te ma xyutsʼinotike. ¿Bin yuʼun? Nopa awaʼiy te bin ya yal te Bibliae, te Satanás sok te chopol espirituetike ma xjuʼ yuʼunik snaʼel te bin ya jnoptike. * Jaʼukmeto, jich bitʼil te ya skʼan ya snaʼik te bin ya jnoptik sok te banti pekʼel te schʼuunel koʼtantike, ya yilik spisil te bintik rya jpastike teyme smakojbey skʼoplal-a te bintik ya jmulantik skʼasesel kʼajkʼal-ae. Jich yuʼun teme ay machʼa ya yakʼ ta ilel te ya smulan yilel pelikulaetik sok libroetik ta swenta machʼatik ya skʼoponik chopol espirituetik, j-akʼchameletik, te ochem Pukuj ta yoʼtanik, sok yantikxan, jich yak ta yakʼel ta ilel te banti ya xjuʼ ta tsalele. Jich te chopol espirituetike yame spasikxan tulan  ta smajel kʼoem te machʼa jich ya spas-abi, jich ya xjuʼ yuʼunik slajinel ta jkʼaxel. Ta melel, ta skaj te ay smulanojik yilel te bintik ya skʼasesik kʼajkʼal-a te kapal sok te yaʼtel chopol espirituetike, jaʼ ikʼotik bael ta spasel te yaʼtel chopol espirituetike (kʼopona te sjun Gálatas 6:7).

17. Te machʼa chebajem yoʼtan ta skaj te ay ta chamele, ¿bin ya xjuʼ ya sujot yuʼun te Pukuje?

¹⁷ Te Satanase ma jaʼuknax ya stuuntes te bin ya jmulantik skʼasesel kʼajkʼal-ae, jaʼnix jich ta swenta te bin ya xtuun kuʼuntik te kʼalal ya stsakotik chamele. Jich bitʼil teme ay jtul j-abat yuʼun Dios te ay ta chamele yaniwan xchebaj yoʼtan yuʼun te kʼalal ya yil te maʼyuk junuk poxil ya xlekubtesot yuʼune (Marcos 5:25, 26). ¿Binwan-utʼil ya stuuntes te Satanás sok te chopol espirituetik te bitʼil ya yilik te chebajem yoʼtane? Jaʼ te yaniwan xjuʼ ya sujik te machʼa ay ta chamel te ya schʼuun yichʼel poxiletik o te bintik ya stuuntesik ta swenta yuʼel magia o j-akʼchamel (Isaías 1:13, TNM). Teme ya xyalotik ta spasel-abi, yame yutsʼin te bitʼil jun koʼtan jbatik sok te Diose. ¿Bin-utʼil?

18. ¿Bintik poxiletik sok ta swenta te bin-utʼil ya yichʼ ilel te chamel te ya skʼan ya jpʼajtike, sok bin yuʼun?

¹⁸ Te israeletik te la stuuntesik te yuʼel magiae, jich albotik yuʼun te Jehová: «Te cʼalal yac ahach acʼabic ta jtojol, ya jnacʼ jsit ta atojolic; aunque bayel yac acʼopononic, ma ba ya jcaʼiybeyex» (Isaías 1:15). Ta melel, te joʼotike maba ya jkʼantik te jich ya jpastike. Mame ayuk bintik ya jpastik te jich maba yaʼiyix jkʼoptik-a te Jehová sok te maba ya skoltayotikixe sok kʼaxemtoxan-a te bitʼil ayotik ta chamele (Salmo 41:3). Jich yuʼun, ¿bin ya jnoptik teme ay poxiletik  o ta swenta te bin-utʼil ya yichʼ ilel te chamel teme ay kapal sok te yaʼtel chopol espirituetike? Jkʼaxel ya skʼan ya jpʼajtik (Mateo 6:13). * Jichme maba ya jchʼaytik te bitʼil lek yoʼtan kuʼuntik te Jehovae (ilawil te recuadro « ¿Jaʼbal yaʼtel chopol espirituetik ini?»).

19. 1) ¿Bin yakʼojbey schʼuun te ants winiketik te Pukuj ta swenta te yuʼele? 2) ¿Bintik-a te ma skʼan ya kaʼantabeytik skʼoplal jich bitʼil te j-abatotik yuʼun te Diose?

¹⁹ Jteb ma spisiluk te lumetik, maba ya sxiʼik te bintik ya spas te Satanase, jaʼukmeto ay yantik lumetik te maba jich ya yil stukelike. Bayal ta tul ants winiketik schʼuunejik te kʼax bayalaj yuʼele. Jich yuʼun spisilnanix-ora ayik ta xiwel-a. Jaʼukmeto, ya smulanik yaʼiybeyel skʼoplal sok yaʼantabeyel skʼoplal te chajp aʼteliletik ya spas te chopol espirituetike. Jich yuʼun, ¿lekbal te ya jchʼam kaʼiytik o te ya kaʼantabeytik skʼoplal-abi? Maʼuk, yame kilbeytik chaʼchajp skʼoplal te bin yuʼune.

20. ¿Binwan-utʼil ya jtoybeytik skʼoplal te Satanás manchukme maba jich jnopoj ta koʼtantik te ya jpastike?

 ²⁰ Te sbabiale, teme ya jpukbeytik skʼoplal te bintik chajpto ya spas te chopol espirituetike, jich yakotik ta stoybeyel skʼoplal te Satanase. ¿Bin-utʼil? Manchukme te Biblia ya yal te ay yuʼel ta spasel milagroetike, jaʼnix jich ya yakʼ ta ilel «señahiletic soc jchahp aʼteliletic scuenta loʼloyel, soc spisil loʼloyel» (2 Tesalonicenses 2:9, 10). Te Satanase jaʼ te mukʼul jloʼlaywanej tel chiknajeme, sok ya snaʼ sloʼlaybeyel snopjibal yuʼun te machʼatik ya x-ikʼbot yoʼtanik yuʼun te yaʼtel chopol espirituetike. Ta swenta te bin yilik o ya yaʼiyik te manix jichuk kʼoem ta pasel-ae, jaʼ-abi jich ya yakʼbey schʼuun te ants winiketike. Ta patil yaniwan scholik te yuʼun-nix jich kʼoem ta pasel yaʼiyel-ae ta swenta te bayal ya yichʼ aʼantabeyel skʼoplale, ya xjuʼ te chajpnaxix ta aʼiyel ta patil-ae. ¿Binwan ya  xkʼot ta pasel teme ay jtul j-abat yuʼun Dios ya spukbey skʼoplal-euke? Jaʼ te yak ta spasbeyel skʼanojel yoʼtan te «tatil yuʼun lot». ¡Jich yak ta stoybeyel skʼoplal te Satanase! (Juan 8:44; 2 Timoteo 2:16.)

21. ¿Bintik lek ya skʼan ya kalbeytik skʼoplal?

²¹ Manchukme ay machʼa ya yal te yuʼun-nix utsʼinot yuʼun te chopol espirituetike, te schebal bin swentail te maba ya kaʼantabeytik yaʼiy te kermanotaktike, jaʼ yuʼun te ya jkʼan kakʼ ta koʼtantik te Cristoe, ma jaʼuk te Satanase. Jaʼ ya skʼan ya «jtʼojan jsitic ta Jesús, te machʼa la shach soc te ya shuʼtes te schʼuhunel coʼtantic» (Hebreos 12:2). Ta melel, te kʼalal ay ta Balumilal-a te Jesuse, ma jaʼuk bajtʼ yoʼtan ta yalel te bintik chajp aʼtelil ya spasik te chopol espirituetike, manchukme snaʼoj spisil te bintik ya xjuʼ o ma xjuʼ yuʼun spasel te Pukuje. Jaʼ bajtʼ yoʼtan ta spukbeyel skʼoplal te Ajwalinel yuʼun te Diose. Jaʼ lek te ya jnopbeytik stalel te Jesús sok te jpuk-kʼopetik yuʼun te jaʼuk ya kaʼantabeytik skʼoplal te bintik ya yakʼ yip koʼtantike, jich bitʼil «te yutsil yaʼtel te Diose» (Hechos 2:11; Lucas 8:1; Romanos 1:11, 12).

22. ¿Bin-utʼil ya kakʼbeytik sbujtsʼ yoʼtan te chʼul abatetik ta chʼulchane?

²² Jich bitʼil la kiltikixe, te Satanase ya sle bayal bin ya sloʼlayotik-a, jich bitʼil te yaʼtel te chopol espirituetik swenta jich ya slajin-a te bin-utʼil jun koʼtantik ayotik ta stojol te Jehovae. Jaʼukmeto, teme spisil-ora ya jpʼajtik te bintik chopol sok teme jaʼ baem ta koʼtantik spasel te bintik leke, jich maʼyuk bin-ora ya yikʼ koʼtantik te yaʼtel te chopol espirituetike (kʼopona te sjun Efesios 4:27). ¡Nopanax awaʼiy te jayebto «yutsil-oʼtanil ta chʼulchan» kʼalal ya yilik te chʼul abatetik te maʼyuk bin-ora ya kakʼ jbatik «ta loʼlayel yuʼun te pucuj» jaʼto te kʼalal ya yichʼ lajinele! (Lucas 15:7; Efesios 6:11.)