1, 2. ¿Bin yuʼun tulan skʼoplal te ayuk sfoco te machʼa ya xbeen ta ijkʼal kʼinale? ¿Bin-utʼil pajal kʼoem sok te bin ya yalbotik te koʼtantike?

NOPA awaʼiy te ay machʼa yak ta beel ta ajkʼabale. ¿Binwan ya skʼan ya yichʼ bael yuʼun jich ma xyal sok ma sta wokol ta be? Ya skʼan ya yichʼ bael sfoco yuʼun jich ya yil sbe-a.

² Teme maʼyuk afocoe ma xjuʼ ya awil te abee, ya xjuʼ ya xyalat sok ya ata awokol. Te focoe ya yakʼbat awil kʼinal sok ya skoltaybat akuxlejal. Jaʼ yuʼun, te Jehová yakʼojbotik jun majtʼanil te pajal sok te focoe, jaʼ te koʼtantik te ya xjuʼ ya yalbotik teme ay bin lek o ma lekuk jpasojtike (Santiago 1:17). Te manchuk ay kuʼuntik te majtʼanil-abi, maba ya jnaʼtik te bin ya jpastike. Te kʼalal ya jnaʼtik lek stuuntesele, ya skoltayotik ta sleel te tojil be ta jkuxlejaltik sok jich ma xlokʼotik tey-a. Jich bitʼil te la kiltike jaʼ jun majtʼanil te kʼax mukʼ skʼoplale. Jich yuʼun, ya skʼan ya kiltik bin-a sok bin-utʼil ya x-aʼtej te oʼtanil te ya yakʼ jnaʼtik te bin lek o ma lekuke, ta patil ya kilbeytik chaʼoxchajpuk skʼoplal: 1) ¿Bin-utʼil ya jpʼijubtestik te bin ya yalbotik te koʼtantike? 2) ¿Bin yuʼun ya skʼan ya kichʼtik ta mukʼ te bin ya yal yoʼtanik te yantike? 3) ¿Bintik  lekilal ya jtatik te kʼalal lek ay te bin ya yalbotik te koʼtantike?

3. Ta swenta te kʼopil ta griego te ya stuuntes te Bibliae, ¿bin-utʼil te maba pajalotik sok te bintik spasoj Dios te kuxajtik ta Balumilale?

³ Te Biblia ya stuuntes jpʼal kʼopil ta griego te ya skʼan ya yal «te jaʼatnix ya anaʼ te bin-utʼil ayate». Te Biblia tseltal jich la skʼases ini: «[Te] bin ya yalbat awoʼtan». Jaʼ yuʼun maba pajalotik sok te bintik spasoj Dios te kuxajtik ta Balumilale. Te bin ya yal te koʼtantike jaʼ ya yakʼ jnaʼtik teme toj o ma tojuk te bin yakotik ta spasele, teme lek o ma lekuk te jtaleltike, teme lek te bin la jtatik ta nopele o teme ma lekuke. Teme la jnaʼtik snopel ta lek te bin ya jpastike, lek ya kaʼiy jbatik yuʼun o teme ma lekuk te bin la jpastike maba lamal koʼtantik yuʼun.

4, 5. 1) ¿Bin-utʼil ya jnaʼtik te la yichʼik akʼbeyel yuʼun Jehová te ay bin ya x-albot ta yoʼtanik te Adán sok te Evae? 2) ¿Machʼatik skʼoplal ya jtatik ta Biblia te la yichʼik ta mukʼ te bin albot te yoʼtanike?

⁴ Te Adán sok te Eva akʼbotik yuʼun Jehová te ay bin ya x-albot ta yoʼtanike, jich bitʼil chiknaj ta ilel te kʼalal kʼexawik yuʼun te la sta smulike (Génesis 3:7, 8). Jaʼukmeto, maʼyukix skʼoplal-a te kʼalal jich albotik yuʼun te yoʼtanike. ¿Bin yuʼun? Jaʼ yuʼun te yoloj la skʼaxuntayik te mantale, melel tojil ants winiketik-a, jich yuʼun snaʼojik ta lek te bin la spasike sok maʼyuk bin juʼix yuʼunik spasel-a.

⁵ Ay bayal ta tul ants winiketik manchukme jmulawiletik, ya yichʼik ta wenta te bin ya x-albot te yoʼtanike, ma jichuk te bitʼil la spasik te Adán sok te Evae. Jich bitʼil la spas te Job te jun yoʼtan la yakʼ sba ta  stojol te Diose, jich la yal: «Ya calulan te toj ayon, ma ba ya jquehchan; ta spisil jcuxlejal ma ba ya yal coʼtan te ay jmul» (Job 27:6). * Te Job nail la yichʼ ta wenta te bin albot yuʼun te yoʼtan te kʼalal ay bin la snop la spase. Jaʼ yuʼun jamal la yal te maʼyuk bin ya x-utsʼinbot yuʼun te yoʼtane, maʼyuk woklaj yuʼun smul sok maʼyuk bin la skʼex. Yan stukel te Davide ma jichuk la spas, melel utsʼinot yuʼun te yoʼtane. Te Biblia ya yal te «patil la snaʼ te ma lecuc te bin la spas» te kʼalal ma la yichʼ ta mukʼ te Saúl te ajwalil tsabil yuʼun-a te Jehovae (1 Samuel 24:5). Ta swenta te bitʼil maba lek la yaʼiy sba ta patile, jich la snop te ya skʼan ya x-ichʼawan ta mukʼe.

6. ¿Bin-utʼil ya xchiknaj ta ilel te jpisiltik kichʼojtik te majtʼanil te snaʼel te bin lek sok te bin ma lekuke?

⁶ Ma jaʼuknax te j-abatetik yuʼun Jehová te ay bin lek sok bin ma lekuk ya x-albotik yuʼun te yoʼtanike. Te jpuk-kʼop Pablo la yal: «Te jyanlumetic te ma ba yichʼojic te Ley, teme ya spasic te bin ya yal te Ley, haʼic nix ley cʼohemic, yuʼun ya yaqʼuic ta ilel te ha tsʼihbabil ta yoʼtanic te bin ya yal te Ley, soc ha nix ya xhalbotic yuʼun te yoʼtanic, ay ya xhalbot smulic yuʼun, o ay ya xhalbot te lec ay te snopojibal yuʼunic» (Romanos 2:14, 15). Ay junchebuk buelta te ya x-albot yuʼun yoʼtanik te ants winiketik te ya spasik ta skuxlejalik te mantaliletik yuʼun te Diose, manchukme ma snaʼik ta jkʼaxel te leyetik yuʼun te Jehovae.

7. ¿Bin yuʼun te ay ma x-aʼtej lek te bin ya yalbotik te koʼtantike?

⁷ Jaʼukmeto ma spisiluk-ora lek te bin ya yalbotik  te koʼtantike. ¿Bin yuʼun? Akʼa jnop kaʼiytik te lokʼombakʼop ta swenta te focoe, te kʼalal maʼyukix yip te spilaule, maba ya xtilix te skʼajkʼale, jich ma xjuʼ ya kiltik te jbetike. Pajal kʼoem sok te bin ya yalbotik te koʼtantike, teme ma jnoptik te sKʼop Diose, ma xjuʼ kuʼuntik stsajtayel te bin lek o te bin ma lekuke. Jaʼ yuʼun, teme ay bintik chopol ya snop te koʼtantike, yame yakʼotik ta chʼayel. Swenta yuʼun lek ya x-aʼtej kʼoem te koʼtantike, yame skʼan te jaʼ ya skoltayotik te chʼul espiritue. Jich bitʼil la yal te jpuk-kʼop Pablo: «Hich ya yalbon te coʼtan ta scuenta te Chʼul Espíritu» (Romanos 9:1). Jich yuʼun, ¿bin-utʼil ya xjuʼ ya x-aʼtej lek te koʼtantik ta swenta te chʼul espíritu yuʼun te Jehovae? Jich bitʼil ya kiltik ta ora ini, jaʼnax ya xjuʼ kuʼuntik teme ya jpʼijubtestike.

8. 1) ¿Bin-utʼil ya yutsʼinotik te bin ya yalbotik te koʼtantike? ¿Bin tulanxan skʼoplal ya skʼan ya kichʼtik ta mukʼ te kʼalal ay bin ya jtatik ta nopele? 2) ¿Bin yuʼun te ma tikʼuk-a teme lek te bin ya yalbotik te koʼtantike? (Ilawil te nota.)

⁸ ¿Bin-utʼil ya xjuʼ ya skoltayotik te bin ya yalbotik te koʼtantik te kʼalal ay bin ya jnoptik spasele? Bayal machʼatik ya skuyik te tikʼ-a te bin ya yal te yoʼtanike. Ta patil yaniwan yalik: «Ya yalbon te koʼtan te lek ta pasele». Jaʼnax yuʼun, mame xchʼay ta koʼtantik te jaʼ tulanxan yip te bin ya skʼan te koʼtantike sok ya xjuʼ ya yutsʼin te bin lek ya yalbotik te koʼtantike. Jich jamal ya yal te Bibliae: «Mero jloʼloywanej te oʼtanile, cʼax hich a te bin utʼil spisil bintic ay. Cʼax chopol, ¿machʼa ya xhuʼ ya snaʼbe sba?» (Jeremías 17:9). Jaʼ yuʼun, te bin tulanxan skʼoplal ta  koʼtantike jaʼ te ya kakʼbeytik sbujtsʼ yoʼtan te Jehovae ma jaʼuk te koʼtantike. *

9. ¿Bin-a te xiʼel te Diose, bin-utʼil snitoj sba sok te bin ya yalbotik te koʼtantike?

⁹ Te kʼalal ay bin ya jnop ya jpastike, te machʼa pʼijubenix lek te yoʼtane ma jaʼuk ya spas te bin ya skʼan yotane. Jaʼ ya yakʼ sba ta tojobtesel yuʼun te xiʼel te Diose, jaʼ ya skʼan ya yal te ya xiʼ teme ay bin ma lekuk la spas ta stojol te jTatik ay ta chʼulchane. Jich ya yakʼ ta ilel te bin la spas te Nehemías. Jich bitʼil te jaʼ gobernador ta Jerusalén-ae, ay ta swenta skʼanbeyel patan te machʼatik swentainoje. Jaʼukmeto, ma jichuk la spas. ¿Bin yuʼun? Jaʼnix stukel la yal te bin yuʼune: «Ta scaj la jxiʼ te Diose» (Nehemías 5:15). Ma la skʼan jxujtʼuk spasel te bin ma lekuk ya yil te Jehová ta yutsʼinel te lume. Bayalme skʼoplal te jichuk ya jxiʼtik-euk te Jehovae, melel jaʼ ya stijbotik koʼtantik sleel ta Biblia spisil-ora te kʼalal ay bin ya jkʼan ya jnoptik spasele.

10, 11. ¿Bin-utʼil ya skoltayotik te Biblia ta snopel teme ya xjuʼ ya kuchʼtik te tragoe? ¿Bin ya skʼan ya jpastik yuʼun jich ya skoltayotik te Diose?

¹⁰ Kiltik ta swenta te yuchʼel tragoe. Jaʼ ini ya skʼan te jich ya jnoptik ta jujuntule: «¿Yabal kuchʼ o maʼuk?».  Swenta yuʼun ya jtatik ta nopel ta lek, nail ya skʼan ya jpʼijubtestik te bin ya yalbotik te koʼtantik te kʼalal ya kiltik te tojobtesel ya yakʼbotik te Bibliae. Te sJun Diose maba kontra ya yil teme tsajtaybilnax ya yichʼ uchʼel te tragoe, melel ya yalbey yutsil skʼoplal Dios te bitʼil la yakʼbotik te vinoe (Salmo 104:14, 15). Jaʼukmeto, te Biblia ya yal te maba lek teme ay machʼa ya xjelaw yuʼun te uchʼbajele sok teme ya xkʼatpʼuj bael ta bolkʼine (Lucas 21:34; Romanos 13:13). Te yakubele jaʼnix jich tey ochem skʼoplal-euk-a ta banti te tulan muliletik jich bitʼil jtul ants sok winik te ya xway sok te machʼa ma jaʼuk nujpunem soke (1 Corintios 6:9, 10). *

¹¹ Te j-abat yuʼun Dios te spʼijubtesojix yoʼtan ta spasel ta skuxlejal te mantaliletik yuʼun Diose, ya xjuʼ ya x-albot te yoʼtan te kʼalal ay bin lek o ma lekuk ta pasele. Jich yuʼun, teme ay ya kichʼtik ikʼel ta weʼel uchʼel sok te machʼatik jun schʼuunel koʼtantik sok te banti yaniwan yakʼik tragoe, ya xjuʼ ya jpasbey jbatik te jojkʼoyeletik ini: «¿Binwan ya spasik tey-a? ¿Yabal xjuʼ ya xkʼatpʼuj ta bolkʼin? ¿Jaxan te joʼone, jkʼaxelbal ya jkʼan ya kuchʼ? ¿Puersabal ya kuchʼ te tragoe? ¿Yabal jtuuntes yuʼun ya jchʼay ta koʼtan te kʼopetik jtaoje? ¿Yabal xjuʼ kuʼun yalel te tikʼonix-ae?». Te kʼalal ya kiltik te tojobtesel ya yakʼbotik te Biblia o te kʼalal ay bin ya jojkʼoytik ta swenta bin ya skʼan ya jpastik ta jkuxlejaltik, ya skʼan ya jkʼopontik te Jehovae (kʼopona te sjun Salmo 139:23, 24). Jichme ya kakʼ stojobtesotik ta swenta te schʼul espiritue, soknix ya jnojptestik te koʼtantik ta spasel te mantaliletik yuʼun te  Diose. Jaʼnix jich te kʼalal ay bin ya jnop ya jpastike aytome bin yan ya skʼan ya kichʼtik ta wenta.

12, 13. ¿Bin yuʼun te yanyantik-a te bin ya x-albot yoʼtanik te jchʼuunjeletike? ¿Bin-utʼil ya skʼan ya kiltik ta swenta-abi?

¹² Ayniwan te chajpnax ya kaʼiytik te bitʼil yanyantik-a te bin ya x-albot yoʼtan te machʼatik ayik ta congregacione. Ma chajpuk ta aʼiyel te ay machʼa ya yal te ma lekuk ya yil jun costumbre o jun talelil, jaʼukmeto ay machʼa te ma chopoluk ya yil stukele. Ya jchaʼkaltik ta swenta te uchʼ tragoe, ay te machʼatik ya smulanik yuchʼel jtebuk trago sok te yamigotake, jaʼukmeto ay te machʼatik chopol ya yilik-abi. ¿Binwan yuʼun te ma pajaluk te snopjibal yuʼunike? ¿Bin ya skʼan ya kichʼtik ta wenta te kʼalal ay bin ya jnop jpastike?

¹³ Ay bayal te bintik yuʼun yanyantik-a te jtaleltike. Jich bitʼil te ma pajaluk te bitʼil kuxinotik te wojey chaʼjeye. Ay jchʼuunjeletik te ya xjul ta yoʼtanik te ay pejkʼaj schʼuunel yoʼtanik la yaʼiy sbaike te jich chaʼchʼayik ta mulile (1 Reyes 8:38, 39). Akʼa jnop kaʼiytik te ya yulaʼtayotik jtul hermano te wokol la yaʼiy yijkʼitayel yuchʼel te trago, jich yuʼun ma smulan lek yalbeyel skʼoplal ta swenta-abi. Teme ay ya kakʼbeytik yuchʼ jtebuknax tragoe, ayniwan ya x-albot yuʼun yoʼtan te ya skʼan ya stsajtay sbae sok jich maba ya yuchʼ. ¿Yabal x-ilinotik yuʼun? ¿Yabal jsujtik ta yuchʼel te tragoe? Maba lek te jich ya jpastike. Ta skaj te skʼuxul koʼtantik ta stojole, yame kichʼtik ta mukʼ te bin la snop ta yoʼtan spasele, manchukme ay la scholbotik kaʼiytik o maʼuk te bin yuʼun jich kʼot ta nopel yuʼune.

14, 15. ¿Bin kʼop aʼyej jajch ta sbabial siglo ta swenta te yanyantik-a te bin ya x-albot yoʼtanik te jchʼuunjeletike? ¿Bin la yal te Pablo te ya xjuʼ ta pasele?

 ¹⁴ Kʼalalto ta sbabial siglo te jpuk-kʼop Pablo la yil te yanyantik-a te bin ya x-albot yoʼtan te machʼatik ayik ta congregacione. Jich bitʼil ay chaʼoxtul jchʼuunjeletik te la sxiʼik sweʼel chaʼoxchajp weʼelil te la yakʼbeyik ta majtʼanil te lokʼombaetik te patil la schonik ta mercado (1 Corintios 10:25). Jaʼukmeto te jpuk-kʼop Pablo maba chopol la yil stukel. Maʼyuk skʼoplal ta yoʼtan te lokʼombaetike, melel te weʼelile ma jaʼuk yuʼun te lokʼombaetike, jaʼ yuʼun te Jehová te jaʼ la spase. Ta swenta-abi te jpuk-kʼop Pablo snaʼoj te bitʼil ay machʼatik maba ya xbajtʼ smulanik te jich ya snope. Melel ay chaʼoxtul te la yichʼik ta mukʼ te lokʼombaetik te kʼalal mato schʼuunejik-a te Cristoe, jich yuʼun kʼax ilaytik sba la yilik spisil te bintik snitojbey sba skʼoplal sok te yichʼel ta mukʼ lokʼombaetike. ¿Bin-utʼil la yichʼ chapel-abi?

¹⁵ Te jpuk-kʼop Pablo jich la yal: «Hoʼotic te ay yip coʼtantic ya scʼan te ya xcuhch cuʼuntic te machʼatic mayuc yip yoʼtanic, ma me haʼuc ya jlehtic te bin lec coʼtantic yuʼun ta jtuqueltic. Como ha nix hich te Cristo ma haʼuc la sle te bin lec yoʼtan yuʼun stuquel» (Romanos 15:1, 3). Jaʼ-abi, ya skʼan ya yal te jich bitʼil te Jesuse, yame skʼan te jaʼuk nail ya jlebeytik slekilal te kermanotaktike. Ta yan texto te pajal skʼoplal sok ini, te Pablo la yal te jaʼ lek te ma stiʼ tiʼbal yuʼun jich ma yakʼ xyal-a te yermano te jaʼ tojbot skuxlejal yuʼun te Cristoe (kʼopona te 1 Corintios 8:13; 10:23, 24, 31-33).

16. ¿Bin yuʼun ma skʼan te ya jbolobtesbeytik skʼoplal te machʼatik ay bin ya spasik te ma jichuk ya yalbotik te koʼtantike?

¹⁶ Jich yuʼun, teme ay yantik j-abatetik yuʼun Dios te ay bin ya spasik te ma jichuk ya yalbotik te koʼtantike, mame skʼan te ya jbolobtesbeytik skʼoplal yuʼune,  te ya jkuytik te pajalnax te snopjibal kuʼuntik ta swenta te bin ya jnoptik spasel ta jtukeltiknaxe (kʼopona te sjun Romanos 14:10). Ta smelelil, te bin ya yalbotik te koʼtantike ya xtuun kuʼuntik ta yilel te bin-utʼil ayotik ta jtukeltike ma jaʼuk te bitʼil ayik te yantike. Mame xchʼay ta koʼtantik te jich la yal te Jesuse: «Ma me xawilbeyic yaʼtel yan, scuenta yuʼun ma ba ya xʼilot awaʼtelic a te haʼexe» (Mateo 7:1). Mame skʼan te ay machʼa ya sjach kʼop ta yutil congregación swentanax te bitʼil yanyantik-a te bin ya yalbotik te koʼtantike. Mame jaʼuk ya jkʼantik te talel kʼaxel ya jlajin jbatike, jaʼ ya skʼan te ya jmukʼubtesbey jbatik te koʼtantik te ya kakʼtik ta ilel kʼuxul-oʼtanil sok te jun-nax ya kakʼ jbatik ta jpisiltike (Romanos 14:19).

17. ¿Bin kʼoem ta pasel ta stojol yoʼtanik bayal ta tul ants winiketik?

¹⁷ Te jpuk-kʼop Pedro la sjultesbey ta yoʼtanik te jchʼuunjeletike: «Lecuc me bin ya yalbat awoʼtan» (1 Pedro 3:16). Jteb ma spisiluk te ants winiketike ma smulanbeyik yutsilal te lek ya x-ilotik yuʼun Jehová ta swenta te lek bin ya x-albot yuʼun te yoʼtanike. Jich bitʼil la yal te Pablo, «te tsajuben ta cʼahcʼ cʼoem te bin ya yal te yoʼtanique» (1 Timoteo 4:2). Te kʼalal ya yichʼ akʼbeyel smarca te wakax ta takʼin te kʼax tsajuben ta kʼajkʼe ya schikʼbot te snujkʼulel sok kʼajkʼem ya xjil te maʼyuk bin ya yaʼiyix-ae. Pajal kʼoem sok te yoʼtan bayal ta tul ants winiketik te maʼyuk bin ya x-albotikix  yuʼune, lajemix kʼoem. Jaʼ yuʼun maʼyuk bin ya x-albotix yoʼtanik yuʼun te kʼalal bayal buelta ya spasik te bin chopol ta pasele, maba ya smel yoʼtanik ni yakuk sujtes yoʼtanik, sok maʼyukix smul ya yaʼiy sbaik o kʼexlal ta yoʼtanik. Te machʼatik jich ya spasik-abi chikan ta ilel te maba ya smelix yoʼtanik jxujtʼuke.

18, 19. 1) Te kʼalal ya xkʼexawotik sok te ay jmul ya kaʼiy jbatike, ¿bin-utʼil ya xjuʼ ya skoltayotik-abi? 2) ¿Bin ya xjuʼ ya jpastik teme ma xkom ta yutsʼinbelotik te koʼtantik manchukme la sujtestikix te koʼtantike?

¹⁸ Bayal buelta te kʼalal ay jmul ya kaʼiy jbatike jich ya yakʼ jnaʼtik te yuʼun ay bin maba lek la jpastike. Teme ya kichʼtik ta mukʼ te bin ya yalbotik te koʼtantik sok teme ya jsujtes koʼtantike, yame tatik perdón manchukme kʼax tulan te mulil jpasojtike. Jich kʼot ta swenta te ajwalil David te la spas tulan muliletike, jaʼukmeto pasbot perdón yuʼun Dios ta skaj te la sujtes yoʼtan ta smelelile. La spʼaj te bin chopol la spase sok la yakʼ ta yoʼtan te maʼyukix bin-ora ya skʼaxuntaybey smantal-a te Diose, jich ta stukelnix la yil te lek yoʼtan te Jehová sok te jpasperdon stukele (Salmo 51:1-19; 86:5). Jaʼukmeto, ayniwan ya xkʼexawotik sok ya yutsʼinotik te koʼtantik ta skaj te mulil jpasojtike manchukme la sujtesix koʼtantik sok la kichʼtikix pasbeyel perdón. ¿Bin ya xjuʼ ya jpastik yuʼun-abi?

¹⁹ Teme la jsujtesix koʼtantike, maʼyukix skʼoplal-a te yato yutsʼinotik te koʼtantik ta skaj te mulil jpasojtike. Teme ma xkom ta yutsʼinbelotik te koʼtantike, ya skʼan te akʼa kakʼ ta koʼtantik te bitʼil jaʼ mukʼxan te Jehová te bitʼil te koʼtantike. Ya skʼan ya xjul ta koʼtantik te kʼuxotik ta yoʼtan te Jehová sok ya jchʼuuntik te ya spasbotik perdón jich te bitʼil ayniwan kalojbeytik te yantik ta yakʼbeyel smukʼul yoʼtanike (kʼopona te  1 Juan 3:19, 20). Te kʼalal lekix spisil-a te bin ya yalbotik te koʼtantike yame yakʼbotik lamal-oʼtanil sok bujtsʼanax kʼinal ya kaʼiytik yuʼun te maʼyuk jich ya smulanik te ants winiketik te ma snaʼbeyik sba te Diose. Bayal ta tul ants winiketik te la spasik tulan mulil ta nailtoe staojikix lamal-oʼtanil, te yakikix ta abatinel ta stojol te Jehová te banti lek te bin ya x-albot yuʼun te yoʼtanike (1 Corintios 6:11).

20, 21. 1) ¿Bin swentail te la yichʼ pasel te libro ini? 2) ¿Bin-a te libre ayotik yuʼun te Diose? ¿Bin-utʼil ya skʼan ya jtuuntestik ta lek?

²⁰ Te bin swentail te libro ini jaʼ te ya skoltayotik ta stael sbujtsʼ-oʼtanil sok lekuk te bin ya yalbotik te koʼtantik jich bitʼil te ya jsitintay jbatik sok te bintik yuʼun te Satanás ta slajibal kʼajkʼal ini. Ta melel manix xjuʼ ya yalbey skʼoplal te libro ini spisil te leyetik sok te mantaliletik te ay ta Biblia te ya skoltayotik ta jujun kʼajkʼal ta jkuxlejaltike. Jaʼnix jich te kʼalal ya yalbey skʼoplal ta swenta te bintik ya yalbotik te koʼtantike jaʼnix jich maba ya scholbotik kaʼiytik spisil te bin ya xjuʼ ya jpastik ta swenta jujunchajp aʼyej jtaojtike. Te bin-nax ya yalbey skʼoplal jaʼ te bin-utʼil ya xjuʼ ya jpastik ta jkuxlejaltik te nojptesel ya yakʼ te sKʼop Diose, jich ya skoltayotik ta stojobtesel te bin ya yalbotik te koʼtantike sok te manchuk ya xtulanube. Mame xchʼay ta koʼtantik te kʼalal ay ta ichʼel ta mukʼ-a te Ley yuʼun Moisés jaʼ mukʼ skʼoplal te ya yichʼ chʼuunel te mantaliletike, jaʼukmeto «te ley yuʼun Cristo» jaʼ ya yakʼbeyxan mukʼ skʼoplal te bin ya yalbotik te koʼtantike sok te ya stojobtesotik te mantaliletik yuʼun te Biblia (Gálatas 6:2). Ta melel, te Jehová yakʼojotik ta libre. Jaʼukmeto te Biblia ya yalbotik te maba jaʼ libre ayotik ta spasel te bin chopole, jaʼ lek te ya jtuuntestik ta swenta te bintik lek ta pasele yuʼun jich ya  kakʼbeytik yil Jehová te kʼaxto kʼux ta koʼtantike.(1 Pedro 2:16).

²¹ Te kʼalal jajch anaʼbey sba-a te Jehovae, jich kʼoem te jajchat ta beel ta be yuʼun te kuxlejalile. Swenta ma xa akom aba ta beel tey-a yame skʼan te nail ya akʼopon Dios jich ya anaʼ bin-utʼil ya apas ta akuxlejal te mantaliletik yuʼun te Bibliae ta patil jich ya awaʼtelin. Teme jich ya apasulane yame anop stsajtayel te bintik lek sok te bintik ma lekuke (Hebreos 5:14). Te kʼalal tojobtesbilix yuʼun Biblia te bin ya yalbat te awoʼtane, bayalme ya skoltayat. Jich bitʼil te foco ya yakʼ kiltik te bee, jich pajal kʼoem sok te bin ya yalbat te awoʼtan te ya stojobtesat sok te ya skoltayat ta snopel ta lek te bin ya apas ta akuxlejal te lek ya smulan te aTat te ay ta chʼulchane. Jaʼnix jich ya skoltayat te ya x-ayinat ta stojol te skʼuxul yoʼtan te Diose.