LECCIÓN 01
¿Yabal xtuun kuʼuntik te Bibliae?
Ta jpisiltik ya jkʼan ya jnaʼtik te bin yuʼun ay jwokoltik, bin yuʼun ya xlajotik sok bin ya xkʼot ta pasel ta pajel chaʼbej. Jaʼnix jich ya jmel koʼtantik ta swenta te bitʼil ya xkuxinotik ta jujun kʼajkʼal, jich bitʼil te sleel jtakʼintik yuʼun ya jwentaintik te jfamiliatike. Pero, ¿yabal anaʼ? Bayal ta tul ants winiketik koltaybilik yuʼun te Bibliae. Ma jaʼuknax-abi, jaʼnix jich staojik tojobtesel tey-a, ¿mabal jichuk te jpisiltik ya xtuun kuʼuntik te Bibliae?
1. ¿Bintik ya yakʼ jnaʼtik te Bibliae?
Te Biblia ya schol kaʼiytik ini: ¿Bin yuʼun te kuxulotike? ¿Bin yuʼun ya xwoklaj te machʼatik lek yoʼtanike? ¿Aybal bin kuxul ya xjil kuʼuntik te kʼalal ya xlajotike? ¿Bin yuʼun te ay guerraetike? ¿Yanixbal xlaj-a te Balumilale? Te machʼatik skʼoponojik te Biblia staojbeyik sujtib te jojkʼoyeletik-abi.
2. ¿Bin-utʼil ya jmulanbeytik yutsilal te jkuxlejaltik?
Te Biblia ya skoltayotik yuʼun tseʼeluk koʼtantik sok te jfamiliatik soknix te yakuk jmulantik te kaʼteltike. Kʼunkʼun ya jnoptik bael te bin ya yal te Biblia ta swenta-abi sok yantikxan te bin ya yakʼ ta nopele. Yame awil te spisil te bin ay ta Biblia ya xtuun kuʼuntik (2 Timoteo 3:16).
Ma Bibliauk te jun ini, pero ya skoltayat ta snaʼel te bin ya yal te Bibliae. Jich yuʼun ya jkʼantik te yakuk ale spisil te textoetik sok te yakuk apaj sok te bin yakatix ta snopele.
JNOPTIKXAN TA LEK
Kiltik bin-utʼil bayal machʼatik koltaybilik yuʼun te Biblia sok bin ya xjuʼ ya stij koʼtantik ta skʼoponel te Bibliae. Jaʼnix jich kiltik bin lekilal ya jtatik teme ay machʼa ya scholbotik kaʼiytik te bin ya jkʼopontike.
3. Te Biblia ya stojobtesotik
Te Biblia jich kʼoem te bin-utʼil tsumbil kʼajkʼ te ya yakʼ kiltik te bee. Jaʼme ya skoltayotik ta stael ta nopel ta lek te bin ya jpas ta jkuxlejaltik sok ya yakʼ jnaʼtik te bin ya xkʼot ta pasel ta pajel chaʼbej.
Kʼoponaik Salmo 119:105 sok albeyaik skʼoplal ini:
-
¿Bin yilel la yil te Biblia te machʼa la stsʼibay te salmoe?
-
Jaxan te jaʼate, ¿bin yilel ya awil te Bibliae?
4. Te Biblia ya schol kaʼiytik te bin ya jkʼan ya jnaʼtike
Ay jtul ants te jaʼ koltayot yuʼun te Biblia ta snaʼbeyel swentail spisil te bin ya skʼan ya snaʼ-ae. Ilawilik te VIDEO sok albeyaik skʼoplal ini:
-
¿Bintik ya skʼan ya snaʼ-a te antse?
-
¿Bin-utʼil koltayot yuʼun te Bibliae?
Te Biblia ya yal te yakuk jlebeytik sujtib te bin ya jkʼan ya jnaʼtik stojole. Kʼoponaik Mateo 7:7 sok albeyaik skʼoplal ini:
-
¿Yabal xjuʼ ya ata ta Biblia te bin ya akʼan ya anaʼ stojole? ¿Bin-a te ya akʼan ya anaʼ te jaʼate?
5. Ya xjuʼ ya jmulantik skʼoponel te Bibliae
Bayal machʼatik ya smulanik skʼoponel te Biblia sok staojik koltayel tey-a. Ilawilik te VIDEO sok albeyaik skʼoplal ini:
-
¿Yabal smulanik skʼoponel jun te jchʼieletike?
-
¿Bin yuʼun ya smulanik skʼoponel te Biblia te jchʼieletike?
Te bin ya yal te Biblia ya yakʼbotik smukʼul koʼtantik. Kʼoponaik Romanos 15:4 sok albeyaik skʼoplal ini:
-
¿Yabal akʼan anaʼxan ta swenta te mukʼul oʼtanil ya yakʼ te Bibliae?
6. Ay machʼa ya xjuʼ ya skoltayat ta snopel te Bibliae
Lek te ya akʼopon te Biblia ta atukele, pero bayal machʼatik staojik ta ilel te jaʼ kʼax lekxan te ayuk machʼa ya xkoltayotik ta yichʼbeyel swentail te bin ya yal te Bibliae. Kʼoponaik Hechos 8:26-31 sok albeyaik skʼoplal ini:
-
¿Bin ya skoltayat swenta ya xkʼot ta awoʼtan te bin ya yal te Bibliae? (Ilawilik te versículo 30 sok 31).
Te etíope-winik la skʼan koltayel yuʼun ya xkʼot ta yoʼtan te bin ya yal te sKʼop Dios. Jaʼnix jichat, ya skoltayat te ay machʼa ya scholbat awaʼiy te bin ya yal te Bibliae.
AY MACHʼATIK JICH YA YALIK: «Schʼayelnax tiempo te snopel te Bibliae».
-
¿Bin ya awal te jaʼate? ¿Bin yuʼun te jich ya awale?
¿BINTIK LA JNOPTIK?
Te Biblia ya skoltayotik ta jkuxlejaltik sok ya yakʼ jnoptik te bin ya jkʼan ya jnaʼtik soknix ya yakʼbotik smukʼul koʼtantik.
¿Jilbal ta awoʼtan into?
-
¿Bin-utʼil ya xjuʼ ya skoltayotik te Bibliae?
-
¿Bintik ya skoltayotik ta snaʼel te Bibliae?
-
¿Bin ya akʼan ya anop ta Biblia?
YA XJUʼ YA ANOPXAN INI
Ilawil bin yuʼun bayal ya skoltayotik te bin ya yal te Bibliae.
«Sbajtʼelkʼinal ay te pʼijubtesel ya yakʼ te Biblia» (Te J-ilkʼinal ta toyol, núm. 1 2018)
Ilawil bin-utʼil koltayot yuʼun te Biblia jtul winik te ay swokol ta yalalilto.
Ilawil bin-utʼil ya skoltayat te Biblia swenta lek ya xkuxinat sok te afamilia.
«¿Bin-utʼil ta tael te tseʼel oʼtanil ta familia?» (¡Wikʼame asit!, núm. 2 2018)
Ilawil bin ya yal te Biblia ta swenta te machʼanix ay ta skʼab-a te balumilale.
Yaniwan amulan-euk sk'oponel ini
TE BINTIK YA SJOJKʼOYLANIK
¿Bin-utʼil ya yakʼik te nojptesel yuʼun Biblia te testigoetik yuʼun Jehová?
Ya xjuʼ ya atuuntes biluk Bibliail te kʼalal ya awichʼ te nojptesel te ya yakʼik te testigoetik yuʼun Jehová. Jaʼnix jich ya xjuʼ ya apas invitar te afamilia sok te awamigotak.
