1. Cholbeya skʼoplal bin yak ta kʼoel ta pasel ta kʼin yuʼun Pentecostés.

 TA Jerusalén bayal bin yakik ta spasel-a te ants winiketike. a Ta templo yak ta lokʼel chʼail ta skajtajib te chikʼbil majtanil kʼalal te levitaetik yakik ta skʼayojtayel te Hallel (te Salmo 113 kʼalal ta 118). Ayniwan jun grupo te yakik ta kʼayoje, te yan grupo ya sjakʼik ta kʼayoj-euk. Te calleetik nojel ta ants winiketik te namal talemik jich bitʼil Elam, Mesopotamia, Capadocia, Ponto, Egipto sok Roma. b Yakik ta spasel te Kʼin yuʼun Pentecostés, o te «scʼahcʼalel te sba sit» awal tsʼunubil (Núm. 28:26). Jaʼ te kʼin te ya spasik ta jujun jaʼbil te kʼalal ya xlaj ta tsobeyel sit te cebada sok te jaʼ ya xjajchix ta tsobeyel sit te trigo.

2. ¿Bin-a te chajpnax kʼot ta pasel ta Pentecostés ta jaʼbil 33?

² Ta jaʼbil 33, ta baluneb ora ta sab ay bin chajpnax kʼot ta pasel te ya yichʼ naʼel ta bayal jaʼbil. «Ta repentenax ay bin kʼopoj tal ta chʼulchan, jich te bin-utʼil tulan ikʼ te xjuʼetnaxe» (Hech. 2:2). Te bin kʼopoj jul spul sba ta yutil na te banti stsoboj sbaik 120 ta tulniwan jnopojeletik yuʼun Jesús. Chamnax yoʼtanik yuʼun, la yilik te chiknaj chʼin kʼajkʼ te jich yilel te bin-utʼil xlemlon kʼajkʼ te la spuk sba ta stojolik ta jujuntul. c Ta oranax noj ta yoʼtanik te chʼul espíritu sok jajchik ta kʼop ta yanyantik kʼopiletik. Te kʼalal lokʼik ta calle, chamnax yoʼtanik yuʼun te jyanlumetik te kʼalal «la yaʼiyik ta skʼopiknix te bin yakik ta yalel te jnopojeletike» (Hech. 2:1-6).

3. 1) ¿Bin yuʼun ma xchʼay ta oʼtanil te bin kʼot ta pasel ta Pentecostés ta jaʼbil 33? 2) ¿Bin-utʼil la stuuntes te Pedro te sbabial llave?

³ Ta swenta te bin kʼot ta pasel chiknaj te Israel yuʼun Dios te jaʼik te machʼatik tsabilik yuʼun ya xbajtik ta chʼulchan (Gál. 6:16). Pero ma jaʼuknax-abi. Ta kʼajkʼalnix-abi, pero ta mal kʼajkʼal, te Pedro kʼopoj ta stojol te ants winiketik. Jich la stuuntes te sbabial «llaveetik yuʼun te  Wentainel» yuʼun ya yichʼ akʼbeyel mukʼul majtanil te ants winiketik te yanyantik stsʼumbalike (Mat. 16:18, 19). Sok te sbabial llave, te judioetik sok te jyanlumetik te yakʼoj sbaik ta judioil d ya xjuʼ ya snopik te lek yachʼil kʼop sok ya xjuʼ ya yichʼik tsael ta swenta te chʼul espíritu. Ta swenta-abi ya xjuʼ ya x-ochik ta sacerdote sok te ya xwentainwanik ta Wentainel yuʼun te Diose (Apoc. 5:9, 10). Te mukʼul aʼtelil-abi jaʼnix jich ya xjuʼ ya yichʼik ta patil te samaritanoetik, ta slajibal, te jyanlumetike (te ma jaʼuk judioetik soknix maba yakʼoj sbaik ta judioil). ¿Bin ya yakʼ jnoptik te bin kʼot ta pasel ta Pentecostés?

4. ¿Bin yuʼun ya kaltik te chiknaj tal ta jaʼbil 33 te lum yuʼun Dios ta kʼajkʼal ini?

⁴ Jich bitʼil la kiltikix, chiknaj te sbabial congregación kʼalal la yichʼik tsael yuʼun te chʼul espíritu te 120 ta tulniwan jnopojeletik te «jun-nax te banti stsoboj sbaik-ae» (Hech. 2:1). Pero, ta mal kʼajkʼal bayal ta mil ants winiketik la yichʼik jaʼ. Jaʼ jich jajch tal te organización te yakto ta mukʼubel ta ora ini. Ta kʼajkʼal ini, te lum yuʼun Dios jaʼik te ants winiketik te kʼux ta yoʼtanik te Dios sok te ya scholik «ta swolol balumilal te lek yachʼil kʼop yuʼun te Wentainel yuʼun te Diose, jichme ya yaʼiyik te skʼop Dios spisil te ants winiketik» te bitʼil mato xtal te slajibal kʼajkʼale (Mat. 24:14).

5. ¿Bin lekilal la staik te machʼatik ayik ta congregación ta sbabial siglo soknix ta kʼajkʼal ini?

⁵ Te congregación te chiknaj ta Pentecostés jaʼnix jich ya yakʼbey yip te schʼuunel yoʼtanik te machʼatik tsabilik te ya xbajtik ta chʼulchan  soknix te «yantik tuminchijetik» (Juan 10:16). Te Pablo bayal skʼoplal ta yoʼtan-a te talel kʼaxel ya skoltay sbaik te hermanoetik. Jaʼ yuʼun, jich la stsʼibay ta stojol te jchʼuunjeletik ta Roma: «Koʼtanukix te ya kilex yuʼun ya kakʼbeyex te bendición yuʼun te Dios swenta jich ya yakʼbeyex yip awoʼtanik, te bin ya jkʼan ya kale jaʼ te talel kʼaxel ya kakʼbey jba smukʼul koʼtantik ta swenta te schʼuunel awoʼtanik soknix te schʼuunel koʼtan-euke» (Rom. 1:11, 12).

6, 7. ¿Bin-utʼil yakik ta scholel skʼop Dios ta swolol Balumilal te testigoetik yuʼun Jehová?

⁶ Te congregación ta kʼajkʼal ini jaʼnix jich ay ta swentaik spasel te aʼtelil la yichʼ pasel ta sbabial siglo. Jaʼ te ya spasik te bin la yal te Jesús ta stojol te jnopojeletik: «Otsesaik ta jnopojel te ants winiketik ta spisil nacionetik. Akʼtiklanbeyaik yichʼik jaʼ ta sbiil te Tatil, te Nichʼanil sok te chʼul espíritu. Akʼtiklanbeyaik snop te akʼa schʼuunik spasel spisil te bin la kalbeyex ta mantale» (Mat. 28:19, 20).

⁷ Te testigoetik yuʼun Jehová jaʼ ya xtuuntesotik yuʼun Dios ta kʼajkʼal ini yuʼun ya spasik te aʼtelile. Ma jaʼuk makbilik yuʼun te ay bayal ta chajp kʼopiletik, melel ya skʼasesik ta kʼaxem ta mil kʼopiletik te junetik te lokʼemik ta Biblia. ¿Yabal xbaat ta tsoblejetik, ya achol skʼop Dios sok ya awotses jnopojeletik? Teme yake, ya skʼan te tseʼeluk awoʼtane, melel maʼyuk bayalik ta tul te ya spasik te tʼujbil aʼtelil te jaʼ te yakʼel ta nopel te sbiil te Jehová.

8. ¿Bintik bendición ya ata ta congregación?

⁸ Ta skaj te ay bayal wokolil, ya xjuʼ ya xchʼay te stseʼelil koʼtantik sok te ya xchebaj koʼtantik, pero te Jehová ya skoltayotik ta swenta te kermanotaktik te ayik ta swolol Balumilal. Kiltik te bin la stsʼibay te Pablo ta stojol te jchʼuunjel hebreoetik: «Talel kʼaxel ayukme skʼoplal ta koʼtantik te yantik yuʼun jich ya jtijbey jba koʼtantik ta yakʼel ta ilel kʼuxul oʼtanil sok ta spasel lekil aʼteliletik, mame jkom jbatik ta stsobilanel jbatik jich te bin-utʼil ay machʼatik kʼayemik ta spasele, jaʼ lekxan te  talel kʼaxel ya kakʼbey jba smukʼul koʼtantik kʼaxemtoxan-a te ya kiltik te nopolix te skʼajkʼalel te Diose» (Heb. 10:24, 25). Jaʼ jun bendición yuʼun Jehová te ya xjuʼ ya awakʼ sok te ya awichʼ smukʼul awoʼtan ta congregación. Jaʼ yuʼun mame xnamajat ta stojol te hermanoetik sok mame xa awijkitay te tsoblejetik.

9, 10. ¿Bin ya spas chaʼoxtul hermanoetik yuʼun ya scholik skʼop Dios ta yantik kʼopiletik?

⁹ Kʼax tseʼel yoʼtan la yaʼiy sbaik te judioetik sok te jyanlumetik kʼalal «ta jujuntul la yaʼiyik ta skʼopiknix te bin yakik ta yalel te jnopojeletike», melel ma jaʼuk skʼopik te griego o hebreo (Hech. 2:6). Kʼot ta yoʼtanik te lek yachʼil kʼop kʼalal la yaʼiyik ta skʼopiknix. Ta ora ini maʼyukix te milagro yuʼun ya xkʼopojotik ta bayal ta chajp kʼopiletik. Pero, bayal machʼatik ya spasik tulan yuʼun ya yalbeyik yaʼiy te lek yachʼil kʼop te ants winiketik te yanyantik snacionik. ¿Bin-utʼil ya spasik? Ay machʼatik ya snopik yantik kʼopiletik yuʼun ya xbajtik ta abatinel ta yan congregación o nación. Te machʼatik ya scholbeyik yaʼiy te skʼop Dios mukʼ skʼoplal ya yilik te ya xnopbotik te skʼopike.

¹⁰ Jich la spas te Christine, la snop te kʼopil gujaratí sok juktulxan hermanoetik. Kʼalal la sta te sjoy ta aʼtel te ya xkʼopoj ta kʼopil gujaratí, la spatbey yoʼtan ta kʼopil-abi. Chamnax yoʼtan te achʼix sok la sjojkʼoy bin yuʼun te yak ta snopel jun kʼopil te kʼax wokol ta nopele. Te Christine la scholbey skʼop Dios sok jich la yal te achʼixe: «Yuʼun-nix kʼax mukʼ skʼoplal-a te bin ya apukik ta alele».

11. ¿Bin-utʼil ya xjuʼ ya jchajpan jbatik yuʼun ya jcholtik skʼop Dios ta yan kʼopil?

¹¹ Melelnix-a te ma jpisiltikuk ya xjuʼ kuʼuntik snopel yan kʼopil. Pero  ya xjuʼ te spisil-ora chapalotik ta scholbeyel skʼop Dios te ants winiketik te yan skʼopike. ¿Bin-utʼil? Jun ejemplo jaʼ te ya jtuuntestik te aplicación JW Language^® banti ya xjuʼ ya anop bin-utʼil ya apat oʼtanil ta kʼopil te ya xkʼopojik-a te ants winiketik ta alumal. Jaʼnix jich ya xjuʼ ya anop bintik ya xjuʼ ya awal te ya xtijbot yoʼtanike. Ya xjuʼ ya awalbey te akʼa ochuk ta jw.org o akʼbeya yil te videoetik sok junetik te kʼasesbil ta kʼopil ya xkʼopoje. Jtuuntestik te aʼtejibaletik ini, jichme tseʼel koʼtan ya kaʼiy jbatik jich bitʼil te sbabial jchʼuunjeletik kʼalal la scholbeyik skʼop Dios te ants winiketik ta skʼopiknix.

12. 1) ¿Bin-utʼil la scholbey skʼoplal te j-alwanej Joel te milagro kʼot ta pasel ta Pentecostés? 2) ¿Bin yuʼun yakik ta smaliyel-a te ya xkʼot ta pasel ta sbabial siglo te bin la yal te j-alwanej Joel?

¹² «Te Pedro la stejkʼan sba» ta skʼoponel te ants winiketik te yanyantik skʼopike (Hech. 2:14). La scholbey yaʼiy te ants winiketik te jich tsʼibaybilix-a te ya xkʼopojik ta yanyantik kʼopiletik, melel te Dios jich yalojbeyix-a te j-alwanej Joel: «Ya jmal cohel te Espíritu cuʼun ta stojol spisil ants-winiquetic» (Joel 2:28). Ta melel, jaʼnix-a te bin yakik ta smaliyel te jnopojeletik ta sbabial siglo, melel te kʼalal nopol ya xmoix bael ta chʼulchan-a te Jesuse, jich la yaltiklanbey ta jamal te jnopojeletik yuʼune: «Joʼon ya jkʼanbey te Tatil te akʼa stikunbeyex yan jkoltaywanej [...] jaʼ te chʼul espíritu» (Juan 14:16, 17).

13, 14. ¿Bin-utʼil la skʼopon te Pedro te ants winiketik, sok bin-utʼil ya jkʼayinbeytik stalel?

¹³ Te Pedro jich la yal te kʼalal laj yoʼtan ta kʼope: «Akʼa snaʼik ta jamal spisil te lum Israel te Dios la yakʼ kʼotuk ta Kajwaltik sok ta Cristo te Jesús te jaʼexnix la amilik te kʼalal la ajijpanik ta teʼe» (Hech. 2:36). Manchukme ma spisiluk tey ayik-a te kʼalal la yichʼ milel te Jesuse, pero te bitʼil jun snacionik jaʼ smul kʼotik-euk. Te jpuk-kʼop Pedro jaʼ la skʼan te ya stijbey  yoʼtan te judioetik, jaʼ yuʼun leknax la skʼoponlan. Ma la yichʼtiklan ta kʼop yuʼun te smulik, jaʼ la skʼan te yakuk sujtes yoʼtanik. Jaʼ yuʼun maba ilinik, pero «kʼax kʼux la yaʼiyik kʼalalto ta yoʼtanik» sok jich la sjojkʼoyik: «¿Bin ya skʼan ya jpaskotik?». Te bin-utʼil kʼopoj te Pedro jaʼ koltayotik swenta ya sujtes yoʼtanik (Hech. 2:37).

¹⁴ Ya xjuʼ ya jkʼayinbeytik stalel te Pedro yuʼun jich ya xkʼot ta yoʼtanik te ants winiketik te bin ya kalbeytike. Te kʼalal ya jcholtik te skʼop Diose, ma xkalbeytik te ants winiketik te maba lek te bintik schʼuunojike. Jaʼuk ya kalbeytik skʼoplal te bin pajal jchʼuunojtik soke, patil ya kakʼbeytik yil te bin ya yal te Biblia ta swenta-abi. Teme leknax ya xkʼopojotik jich bitʼil la spas te Pedro, bayal ants winiketik ya smulanik te skʼop Diose.

15. 1) ¿Bin la yal te Pedro ta stojol te judioetik sok te jyanlumetik, sok bin yaʼiyel la yaʼiy sbaik yuʼun? 2) ¿Bin-utʼil ya jnaʼtik te chapalikix-a te machʼatik la yichʼik jaʼ?

¹⁵ Ta kʼajkʼal-abi, te Pedro jich la yalbey te judioetik sok te jyanlumetik te yakʼoj sbaik ta judioil: «Sujtesa awoʼtanik, sok ichʼaik jaʼ ta jujuntul» (Hech. 2:38). Ta swenta-abi, ayniwan 3 mil ta tul ants winiketik te la yichʼik jaʼ, teyniwan la yichʼik jaʼ ta estanqueetik te ay ta Jerusalén sok ta sjoyobal. e ¿Yuʼun-naxbal la smulan yoʼtanik te jich la spasike? ¿Yabal yakʼ ta naʼel te oranax ya skʼan ya yichʼik jaʼ te estudianteetik sok te alnichʼanetik yuʼun te Testigoetik manchukme maba chapalik? ¡Maʼuk! Melel te judioetik sok te jyanlumetik te yakʼoj sbaik ta judioil te la yichʼik jaʼ ta Pentecostés ya snaʼikix ta lek-a te skʼop Diose sok ayik ta jun nación te tsabil yuʼun te Jehová. Jaʼnix jich yakʼojik ta ilel te ya yichʼik ta mukʼ te Diose, melel namal ya xbeenik yuʼun ya xkʼotik ta  kʼin yuʼun Pentecostés. Jaʼxanix ya skʼan ya xkʼot ta yoʼtanik-a te aʼtelil akʼbot yuʼun Dios te Jesús. Te kʼalal kʼot ta yoʼtanik, jun yoʼtan la yichʼik ta mukʼ te Dios, pero jich bitʼil jnopojeletik yuʼun Cristo te yichʼojikix jaʼe.

16. ¿Bin-utʼil la yakʼik ta ilel slekil yoʼtanik te jchʼuunjeletik ta sbabial siglo?

¹⁶ Chikan ta ilel te yichʼojik te bendición yuʼun te Jehová te grupo-abi. Te relato jich ya yalxan: «Spisil te machʼatik la schʼuunik Dios jun-nax la yakʼ sbaik sok la yakʼbey sbaik spisil te bintik ay yuʼunike, la schon skʼinalik sok te bintik ay yuʼunik, te takʼin la staike la spuktiklanbey te yantik jaʼ chikan te bin-utʼil ya xtuun yuʼunike» (Hech. 2:44, 45). f Ya yakʼ ta ilel te ya skʼan ya jkʼayinbeytik te skʼuxul yoʼtanik sok te slekil yoʼtanike.

17. ¿Bintik ya skʼan ya spas te machʼa ya yichʼ jaʼ?

¹⁷ Te machʼa ya skʼan ya yakʼ sba ta stojol Dios sok te ya yichʼ jaʼ ay chaʼoxchajp te bin nail ya skʼan ya spas te ya yal te Biblia. Ta nail ya skʼan ya snop te Biblia (Juan 17:3). Ta patil ya skʼan ya yakʼ ta ilel schʼuunel yoʼtan sok ya sujtes yoʼtan ta swenta te bin maba lek la spas ta namey, jich ya yakʼ ta ilel te maba ya skʼan ya spasixe (Hech. 3:19). Jaʼnix jich ya skʼan ya sjeltay ta jkʼaxel te skuxlejal sok te ya xjajch spas lekil aʼteliletik te ya smulan te Jehová (Rom. 12:2; Efes. 4:23, 24). Ta slajibal ya skʼan ya spas jun oración te banti ya yal te ya yakʼ te skuxlejal ta stojol Dios, ta patil ya yichʼ jaʼ (Mat. 16:24; 1 Ped. 3:21).

18. ¿Bin mukʼul majtanil staoj te machʼa yichʼojix jaʼe?

¹⁸ ¿Jaxan te jaʼate? ¿Labal awakʼix aba ta stojol Jehová sok la awichʼix jaʼ? Teme jiche, te Jehová ya yakʼbat te schʼul espíritu jich bitʼil la spas sok te jnopojeletik ta sbabial siglo swenta ya achol ta tsʼakal te smelelil kʼop sok ya apasbey te skʼanojel yoʼtan te Diose. ¡Jaʼ jun mukʼul majtanil!