AY BAELTIK te Jehová kʼax tʼujbilnax te bin-utʼil ya skanantay te jchʼieletik te ma xjuʼ ya skanantay sba ta stukelike. Teme ay ya xbaat ta paxial ta jaʼmaleltik, yaniwan ata ta ilel te bin-utʼil ya xkanantaywan te Jehová manchukme ma xkʼot ta awoʼtan te bin-utʼil ya spase.

Nopa awaʼiy te yakat ta beel bael sok ya ata ta ilel jkojt jaʼmal mut te ya xkojtaj nopol te banti ayate. Jich yilel te wakʼem xikʼe. Te kʼalal ya akʼan ya xnoptsajat baele, ya xnamaj bael, teme ya atʼun baele, ya xnamajxan bael. Ta patil, ya awil te ya xwil baele. Ta melel ma ejchenajem. ¿Yabal anaʼ bin yuʼun te jich ya spase?...

Jaʼ yuʼun te nopol ay spechech ta jaʼmaleltik te banti ayat-ae. Sok ya skuy te ya atabey te spechech sok te ya awutsʼin o ya amilbey te yalatake. Jaʼ yuʼun jich la spasbat te ejchenajem yilel sok la yakʼ te ya atʼun baele. ¿Yabal anaʼ machʼa jich ya xjuʼ ya skanantayotik te bitʼil te chʼin jaʼmal mut ya skanantay te yalatake?... Ta Biblia, te Jehová jich ya yichʼ pajbeyel skʼoplal te bin-utʼil jkojt águila te ya skanantay te yalatake (Deuteronomio 32:11, 12).

Te Jesús jaʼ sNichʼan te Jehová te kʼax kʼux ta oʼtanile. Te kʼalal ay ta chʼulchan-ae, jaʼ jun espíritu te bayal yuʼel jich bitʼil te sTate sok ya xjuʼ ya skanantay sba ta stukel. Pero te kʼalal ayin ta Balumilale, jaʼ chʼin alal-a te ya skʼan te ay machʼa ya xkanantayot yuʼune.

Swenta ya spas te aʼtelil akʼbot yuʼun Jehová, te Jesús nail ya skʼan ya xmukʼub. Pero te Satanás kʼan smil te kʼalal alalto-ae. Kʼax tʼujbil ta kʼoponel te bin-utʼil kanantayot yuʼun te Jehová te kʼalal kʼan milotuk te kʼalal alalto-ae. ¿Yabal akʼan ya awaʼiy?...

Te kʼalal mato jaluk yayinel-a te Jesuse, te Satanás ay bin la yakʼ ta chʼulchan te banti ya xlokʼ tal te kʼajkʼal te jich yilel te bin-utʼil te ekʼe. Ay chaʼoxtul winiketik te ya yilbeyik skʼoplal te ekʼetike, jaʼ la stʼunik bael bayal kilómetro jaʼto te kʼalal kʼotik ta Jerusalén. Tey la sjojkʼoyik banti ya x-ayin te machʼa ya xkʼot ta ajwalil yuʼun te judioetik. Ta patil la spasbeyik te jojkʼoyel ini te winiketik te ya snaʼik bin ya yal te Biblia, sok jich la sutik: «Ta Belén» (Mateo 2:1-6).

Kʼalal te chopol ajwalil yuʼun Jerusalén, te Herodes sbiil, la snaʼ stojol te ayinix ta Belén te machʼa ya x-och ta ajwalil te kʼalal ya xmukʼube, jich la yalbey te machʼatik la stʼunik bael te ekʼetike: ‹Leaik te alale, te kʼalal ya ataike, ya xtal awalbonik›. ¿Yabal anaʼ bin yuʼun te Herodes ya skʼan ya snaʼ banti ay te Jesuse?... ¡Jaʼ ta skaj te ma skʼan ya x-och ta ajwalil te kʼalal ya xmukʼube sok ya skʼan ya smil!

¿Bin-utʼil la skanantay te sNichʼan te Diose?... Te kʼalal la staik te Jesús te machʼatik la stʼunik bael te ekʼetik sok la yakʼbeyik majtaniletik, te Dios la yaltiklanbey ta jun wayichil te manchuk ya sujtik bael te banti ay te Herodese. Jich yuʼun yan be la stʼunik bael-a te kʼalal sujtik bael ta slumalik, jich ma kʼaxikix ta Jerusalén. Kʼalal te Herodes la snaʼ stojol-abi, kʼax bayal ilin. Te bitʼil ya skʼan ya smil-a te Jesuse, la yal ta mantal te akʼa smilik spisil te alaletik ta Belén te mato sta cheb yaʼbilalike. Pero te Jesús ma tey ayix-a.

¿Bin-utʼil maba la yichʼ milel tey-a te Jesuse?... Kʼalal sujtik bael te winiketik te kʼot yilik te Jesús, te Jehová la yalbey te José, te smamalal te María, te akʼa anukik bael ta Egipto. Jich te Jesús ma la yichʼix milel yuʼun te Herodes. Bayal jaʼbil ta patil, kʼalal te María sok te José lokʼik tal ta Egipto, te Dios la schaʼkʼopon te José. Ta jun wayichil la yalbey te akʼa bajtukik ta Nazaret, te banti maʼyukix machʼa ya skʼan ya smil te chʼin Jesuse (Mateo 2:7-23).

¿Yabal xkʼot ta awoʼtan bin-utʼil te Jehová la skanantay te sNichʼane?... ¿Machʼa pajal kʼoem sok te chʼin mutetik te ya yichʼik kanantayel yuʼun te smeʼe? ¿O jich bitʼil te Jesús te kʼalal chʼinto-ae? ¿Mabal jichuk te pajalat soke?... Jaʼnix jich te jaʼate ay machʼatik ya skʼan ya yutsʼinat. ¿Yabal anaʼ machʼatik-a?...

Te Biblia ya yal te jich kʼoem bitʼil jkojt choj te Satanás te ya skʼan ya sweʼotike. Jich bin-utʼil te chojetik te jaʼ ya stsaik te chʼin chambalametik yuʼun ya stsak sweʼik, te Satanás sok te pukujetik jaʼ ya stsaik te alaletike (1 Pedro 5:8). Pero te Jehová jaʼ bayalxan yuʼel, ma jaʼuk te Satanás sok ya xjuʼ ya skanantay te alaletik ta swenta te bin ma lek ya yichʼik pasbeyel yuʼun te Satanase.

Jich te bin-utʼil la kiltik ta capítulo 10 yuʼun te libro ini, te Satanás sok te pukujetik yuʼune ¿bin ya skʼanik te ya jpastike?... Jaʼ ya skʼanik te ayuk machʼa ya jokintik ta wayel ta spasel mulil te ma lek ya yil te Diose. ¿Yabal xjul ta awoʼtan machʼatiknax-a te ya xjuʼ ya sjokin sbaik ta wayel?... Jaʼnax te winik sok te yinam.

Pero mel-oʼtantik sba te machʼatik mukʼikix ay jaʼ ya smulanik sjokinel ta wayel ta spasel mulil te alaletike. Ay baeltik te alaletik-abi ya spasik te bintik ma lekuk ta skaj te la yilik te jich ya spasik te machʼatik mukʼikixe, sok ma lek ya stuuntes te skʼunil sbakʼetalike. Jich kʼot ta pasel ayix bayal jaʼbil ta jpam lum te Sodoma sbiil. Te Biblia ya yal te «jcolel chʼihyeletic soc mamaletic», kʼan sjokinik ta wayel ta spasel mulil te winiketik te kʼotik ta sna te Lot (Génesis 19:4, 5).

Jich bitʼil te Jesús te la skʼan ay machʼa kanantayot yuʼune, jaʼnix jich te jaʼat ya skʼan ya awichʼ kanantayel ta stojol te machʼatik mukʼikix, —o ta stojol te alaletik— te ya skʼanik te ya xwayat sok ta spasel mulil. Yaniwan yalbat te jaʼ awamigoe. Ayniwan bin ya awichʼ akʼbeyel swenta maʼyuk machʼa ya awalbey. Pero jaʼnax ya skʼan ya spasik te bin ya skʼan yoʼtanik, jich bitʼil te Satanás sok te pukujetik yuʼune. Jaʼnax ya skʼan ya sleik te bin ya smulan spasel te sbakʼetalike, jaʼ yuʼun ya xwayik ta spasel mulil sok te alaletike. ¡Kʼax ma lek te bin ya spasike!

¿Yabal anaʼ bin-a te ya spasike?... Yaniwan skʼan ya spiktiklanbat te skʼunil abakʼetal, o ya slakʼ te skʼunil sbakʼetal sok te awuʼune. Pero mame ayuk bin-ora ya skʼan ya awakʼ te ay machʼa ya spiktiklanbat te skʼunil abakʼetale. Ni jaʼuk te abankil, awijtsʼin o awix ni jaʼuk te ameʼ atate. Maʼyuk machʼa ya skʼan ya spiktiklanbat.

¿Bin-utʼil ya xjuʼ ya akanantay te abakʼetal ta stojol te machʼatik ay bin ma lek ya skʼan ya spasbate?... Ta sbabial, ma xa awakʼ te ay machʼa ya spiktiklanbat te skʼunil abakʼetale. Teme ay machʼa jich ya skʼan ya spase, tulanme xa awal: «¡Ma xa apikon! ¡Ya jlebat amul!». Teme ya yalbat te jaʼ amul te bin kʼot ta pasele, ma xa achʼuunbey. Jaʼ slot. Chikan machʼa-a te ay bin ma lek ya skʼan ya spasbate, ayuk machʼa xa awalbey manchukme ya yalbat te maʼyuk machʼa ya awalbey te bin kʼan spasbate. Ma xa achʼuun teme ya yalbat te ya yakʼbat amajtan o ya xiwtesat, ya skʼan te oranax ya xlokʼat bael sok ayuk machʼa xa awalbey.

Ma skʼan te ya xiwate, pero ya skʼan ya akanantay aba. Kʼalal te ameʼ atat ya yalbat te ay machʼa ma lek ya ajokin o te ay banti ma skʼan ya xbaate, yame skʼan ya achʼuun swenta jich maʼyuk machʼa ya yutsʼinat.