Koltaya te machʼatik ya schʼam yaʼiyik te akʼop te jaʼuknix ya yil sbaik te bitʼil ayike. Pasa jojkʼoyeletik yuʼun ya akoltay ta snaʼel te bin-nix ay ta yoʼtanik-ae.

Tijbeya yoʼtan te machʼatik ya schʼam yaʼiyik te akʼop yuʼun ya spasik te bin leke. Tijbeya yoʼtan yuʼun ya snopik bin yuʼun yakik ta spasel lekil aʼtelil. Koltaya ta snaʼel te jaʼuk ya spasik yuʼun kʼux ta yoʼtanik te Jehová, te jpatxujktik sok te bintik ya yakʼ ta nopel te Biblia. Akʼtiklana ta pensar, mame jaʼuknax ya awalulanbey te bintik ya skʼan ya spasike. Ta swenta te bin ya awale yame skʼan ya xtijbot yoʼtanik ta spaselxan ta lek te yaʼtelike, mame jaʼuk te kʼexawen ya xjilike.

Jaʼ xa awalbey skʼoplal te Jehová. Akʼa ta naʼel bin-utʼil te nojptesel ya yakʼ te Biblia, te bintik smelelil ya xtojobteswan tey-a sok te mantaliletik yuʼune, ya yakʼ jnaʼbeytik sba ta lek te Dios sok te kʼuxotik ta yoʼtane. Koltaya te machʼatik ya schʼam yaʼiyik te akʼop yuʼun yakuk xkʼot ta yoʼtanik te bin yaʼiyel ya yaʼiy sba te Jehová sok te yakuk yakʼbeyik stseʼelil yoʼtane.