LEKSION 2
Jichuknix ya xkʼopojat te bitʼil ya xkʼopojate
2 Corintios 2:17
TE BIN YA SKʼAN YA ANOP: Mame chujkʼuluk te bitʼil ya xkʼopojat sok jichuknix ya xkʼopojat te bitʼil ya xkʼopojate, jichme ya awakʼ ta ilel te kʼalalto ta awoʼtan ya xlokʼ tal te bin ya awal ta swenta te tema sok te ay ta awoʼtan te machʼatik ya schʼam yaʼiyike.
¿BIN-UTʼIL TA PASEL?
-
Kʼopona Dios sok chajpana aba ta lek. Kʼanbeya koltayel te Jehová swenta jaʼ ay skʼoplal ya xkʼot te bin ya achole, mame jaʼuk te bin-utʼil ya apase. Ayuk ta awoʼtan te puntoetik te mukʼ skʼoplal ya akʼan ya awale. Mame jaʼuknax ya akʼopon te bin tsʼibaybile, jaʼ xa achol te bitʼil kʼot ta awoʼtane.
-
Lokʼemuk ta awoʼtan te bin ya awale. Nopa awaʼiy te bin yuʼun ya skʼan ya yaʼiyik te informasion te machʼatik ya schʼam yaʼiyike sok akʼa ta awoʼtan-abi. Jich yuʼun yame xchiknaj ta ilel ta swenta te bitʼil ya atejkʼan aba, te bitʼil ya atij aba sok te bin yilel te asit awelaw te yuʼun-nix smelelil-a te bin ya awale.
-
Ilbeya sit te machʼatik ya schʼam yaʼiyik te akʼope. Teme ma chopoluk ta pasele, mame xa akom aba ta spasel. Te kʼalal ya awakʼ diskurso, ilbeya sit ta jujuntul, mame jmeluknax ya awil ta spisilik.
