Ya skʼan te yak «awaʼiyiquix pʼijubteswanej» (Heb. 5:12). ¡Nopanax awaʼiy ini! Te Jehová, te lekil Jpʼijubteswanej ta chʼulchan sok ta Balumilal, ya yikʼotik ta snojptesel te yantik ta swenta te bin jnaʼojtik ta stojole. Te yakʼel ta nopel ta swenta Jehová ta familia, ta kongregasion o ta scholel skʼop Dios, jaʼ jun mukʼul majtʼanil sok mukʼul aʼtelil te ya skʼan pasele. Pero, ¿bin-utʼil ya xjuʼ xkʼootik ta lekil jpʼijubteswanej?

Te sujtibe ya jtatik ta kʼopetik te la stsʼibay te jpuk-kʼop Pablo ta stojol te Timoteo: «Aʼtelina yilel te Shun Dios, soc aʼtelina tsitsaw soc pʼijubteswanej». Sok la yalxan: «Teme hich yac apase, hich ya xcolat a soc te machʼatic ya yaʼiybat te acʼope» (1 Tim. 4:13, 16). Te bin ya kakʼtik ta nopele ya yakʼ kuxlejalil. Jich yuʼun bayal skʼoplal te ya apas tulan ta snaʼel skʼoponel ta lek te june sok ta pʼijubteswanej. Te foyeto ini jaʼme ya skoltayat. Akʼa kiltik cheʼoxebuk te bin-utʼil pasbile.

Maʼyuk jtuluk «jpʼijubteswanej» te pajal sok te Jehovae (Job 36:22). Te foyeto ini yame skoltayat ta slekubtesel te bin-utʼil ya akʼopon te june sok te bin-utʼil ya xpʼijubteswanat ta leke, pero mame xchʼay ta awoʼtan te jaʼ talem ta stojol Jehová te bin ya awakʼ ta nopele sok te jaʼnix ya yikʼ tal ta stojol te ants winiketike (Juan 6:44). Jich yuʼun kʼana chʼul espiritu sok tuuntesa te sJun Dios ta spisil-ora. Jaʼ xa awalbey skʼoplal te bintik ya snop te Jehová sok te bintik ya yale, ma jaʼuk te bin ya anope. Pasa tulan yuʼun kʼuxuk ya xkʼot ta yoʼtanik te Jehová te machʼatik ya yaʼiyik te akʼope.

Ikʼbilatme ta scholel te skʼop Dios te kʼax mukʼ skʼoplal te maʼyuk jich pasbil ta swolol Balumilal. Ya jnaʼtik te ya xjuʼ awuʼun pasel ta swenta te yip te Diose (1 Ped. 4:11).

Te ajoʼtak ta pʼijubteswanej,

Jtsojb Jwolwanejetik yuʼun te sTestigotak Jehová