Ta jpisiltik ay ta jwentatik stsael teme ya x-abatinotik ta stojol Jehová, o ta stojol te Satanás sok te pukujetik yuʼun. Ma xjuʼ ya jpastik ta schebal. ¡Kʼax lek te jaʼ ya x-abatinotik ta stojol te Jehová!

Jich bin-utʼil la kiltikix, te pukujetik ya smulanik yutsʼinel sok sloʼlayel te ants winiketik. Pero te Jehová ma jichuk stukel. Kʼux ta yoʼtan te ants winiketik jich bitʼil ya spas jtul tatil te kʼux ta yoʼtan te snichʼnab. «Spisil te bin lec aʼbibilotic soc spisil lequil mahtanil» jaʼ talem ta stojol te Jehová (Santiago 1:17). Te Jehová spisil-ora ya yakʼbey te bin lek te ants winiketike, manchukme ay toyol stojol te bin ya spase (Efesios 2:4-7).

Nopanax awaʼiy te bin la spas te Jesús kʼalal ay ta Balumilal-ae. La yakʼ kʼopojuk te umaʼetik sok la sjambey sit te machʼatik ma xyilik kʼinale. La slekubtes te machʼatik yichʼojik kʼaʼel chamel sok te koxoetik. La slokʼeslan pukujetik sok la slekubteslan spisil te machʼatik ayik ta chamel. Jaʼnix jich ta swenta te yuʼel te Diose, te Jesús la schaʼkuxajtes te machʼatik lajemike (Mateo 9:32-35; 15:30, 31; Lucas 7:11-15).

Te Dios spisil-ora ya yal te bin smelelil, ma spas lot. Maʼyuk machʼa ya sloʼlay (Números 23:19).

Jich bitʼil kojt us te lapʼal ya xjil ta sna am, bayal millón ta tul ants winiketik yichʼojik loʼlayel ta swenta te bintik lotil ya schʼuunike. Ya xiʼik te machʼatik lajemik. Sok ya xiʼik te pukujetik. Ya smel yoʼtanik te ay bin ma lek ya yichʼik pasbeyel, te bin ya yal te jnaʼojeletik sok te j-akʼchameletik. Ya x-akʼbot ta yoʼtanik schʼuunel te lotiletik yuʼun te Satanás. Pero te j-abatetik yuʼun te Dios ma xyakʼ sbaik te loʼlayel yuʼun-abi.

Te Jehová jaʼ bayalxan yuʼel te bitʼil te Satanás. Teme jaʼat ya x-abatinat ta stojol te Jehová, jaʼme ya skanantayat ta skʼab te pukujetik (Santiago 4:7). Te bintik ya spas te pukujetik ma xyutsʼinat. Jun ejemplo, ta Nigeria oxtul j-akʼchameletik kʼan smilik jtul testigo yuʼun Jehová te ma la skʼan lokʼ bael ta slumale. Te kʼalal ma juʼ yuʼunik smilele, te jtule bayal xiw yoʼtan, jaʼ yuʼun bajt skʼopon te testigo yuʼun Jehová sok la skʼanbey perdón.

Teme ya yutsʼinat te pukujetik, ya xjuʼ ya akʼopon te Jehová, ya awalbey sbiil, jichme ya skanantayat (Proverbios 18:10). Pero swenta ya skanantayat te Diose, yame skʼan ya awijkitay ta jkʼaxel te bintik smakojbey skʼoplal te espiritismo sok te yichʼel ta mukʼ te pukujetik. Jich la spasik te jchʼuunjeletik yuʼun Dios ta Éfeso. La stsob spisil te slibroik yuʼun magia sok la schikʼik (Hechos 19:​19, 20). Jaʼ jich ya skʼan ya spasik-euk te j-abatetik yuʼun Dios ta ora ini. Ya skʼan ya kijkitaytik stuuntesel amuletoetik, te bintik ya yichʼ chukel ta jkʼabtik o ta jnukʼtik, libroetik yuʼun magia sok yantikxan te bintik smakoj te espiritismo.

Teme ya akʼan te lek ya yilat te Diose, mame tikʼuk-a te ya awijkitay te lotil nojptesel sok te ya awijkitay spasel te bin ma leke. Yame skʼan ya apas ta akuxlejal ta spisil-ora te bin smelelile. Te Biblia ya yakʼ kiltik bin-a te ya skʼan pasele:

Te Satanás sok te pukujetik ya stuuntesik ants winiketik ta Balumilal yuʼun ya yakʼik ta nopel te bintik ma lek ta pasele. Pero te Jehová ay j-abatetik yuʼun-euk. Jaʼ te testigoetik yuʼun Jehová (Isaías 43:10). Ta swolol Balumilal kʼaxemix ta 6 millón ta tul testigoetik yuʼun Jehová. Spisilik-abi ya spasik tulan ta spasel lekil aʼteliletik sok ya yakʼbeyik snop te ants winiketik te smelelil kʼope. Ta bayal nacionetik ya xjuʼ ya awil te ayik ta sNail Tsoblejetik, teme ya xkʼoat tey-ae tseʼelnax yoʼtanik yuʼun.

Te aʼtel ya spasike, jaʼ te ya skoltayik te yantik yuʼun ya x-abatinik ta stojol te Dios. Ya yakʼbatik nojptesel ta Biblia ta ana, sok ya yakʼbatik anop bin-utʼil ya skʼan ichʼel ta mukʼ te Jehová. Te nojptesele maba tojbil. Te testigoetik yuʼun Jehová tseʼelnax yoʼtanik ya yakʼik ta nopel te smelelil kʼope, melel kʼux ta yoʼtanik te ants winiketik sok kʼux ta yoʼtanik te Jehová.