¡Yuʼun-nanix ay-a te espirituetik! Ay lekil espirituetik sok chopol espirituetik. ¿Jaʼbal ants winiketik te ay kuxinik sok lajik ta Balumilal?

Maʼuk. Te kʼalal ay machʼa ya xlaje, maba ya xbajt te banti ay te espirituetik, jich bitʼil bayal ya schʼuunike. ¿Bin yuʼun te jich ya kaltike? Jaʼ yuʼun te jich ya yakʼ ta nopel te Biblia. Te Biblia jaʼ jun libro te ya yal te smelelile sok talem ta stojol te jip jtul smelelil Dios, te Jehová sbiile. Te Jehová jaʼ la spas spisil te ants winiketik; jaʼ yuʼun ya snaʼ ta lek te bin ya xkʼot ta stojolik te kʼalal ya xlajike (Salmo 83:18; 2 Timoteo 3:16).

Te Biblia ya yal te Dios la spas «ta tsʼubil lum» te Adán, te sbabial winike (Génesis 2:7). Te Dios la yakʼ ta nichimal kʼinal, ta tsʼunbil kʼinal Edén. Te lajuk schʼuunbey smantal Jehová te Adane, maba laj sok kuxulto ta Balumilal ta ora ini te jichuke. Pero kʼalal ta spasemal yoʼtan te Adán la skʼaxuntaybey smantal te Diose, jich albot yuʼun: «Ya xcʼatpʼujat ta lum, como tey chicnajemat talel a; ta tsʼubil lum pasbilat, ta tsʼubil lum ya suhtat» (Génesis 3:19).

¿Bin ya yakʼ jnoptik ini? Bueno, ¿banti ay-a te Adán te kʼalal mato spasoj-a te Jehovae? Maʼyuk banti ay-a. Sok ma jaʼuk jun espíritu ta chʼulchan te mato ayinem-ae. Maʼyuk banti kuxul-a. Jaʼ yuʼun, kʼalal te Jehová la yalbey te Adán te ya xchaʼsujt ta tsʼubil lum, jaʼ la skʼan la yal te ya xlaje. Te Adán maba bajt te banti ay te espirituetik. Te kʼalal laj te Adán, tey tupʼ skuxlejal-a.

Pero ¿bin ya kaltik yuʼun te yantik ants winiketik te lajemikixe? ¿Kuxuliktobal? Te Biblia ya yakʼbey sujtib.

• «Spisil [te ants-winiquetic soc te chambahlametic] ya xbahtic ta junax awilal; spisil pasbil ta tsʼubilum, soc spisil ya suht xan ta tsʼubilum» (Eclesiastés 3:20).

• «Te machʼatic chamenic mayuc bin ya snaʼic» (Eclesiastés 9:5).

• «Chʼayemiquix te scʼuxul yoʼtanic, te yil-oʼtantaywanejic» (Eclesiastés 9:6).

• «Ta stsobojibal machʼatic chamenic, te banti ya xbahat, mayuc aʼtel, mayuc bin ay ta chahpanel, mayuc bin ay ta naʼel soc mayuc pʼijil-oʼtanil tey a» (Eclesiastés 9:10).

• «[Te ants winiketik] ya suht ta tsʼubil lum; ha nix yorahil a ya xchʼay te bintic snopojique» (Salmo 146:4).

¿Wokolbal ya awaʼiy schʼuunel te bin ya yal te textoetik ini? Teme jiche, nopa awaʼiy ini: Ta bayal familiaetik jaʼ te mamalalil te machʼa ya sle te takʼin te ya xtuun yuʼunike. Jaʼ yuʼun te kʼalal ya xlaje, ya sta swokol te sfamiliae. Ay baeltik te inamil sok te yal snichʼnabik maʼyuk bayal stakʼinik yuʼun ya sman-a te sweʼel yuchʼelike. Sok ayniwan te ya yichʼik utsʼinel yuʼun te skontratak te smamalal te lajemixe. Jaʼ yuʼun jojkʼoybeya aba ini: «Teme kuxulto te winik te banti ay te espirituetik, ¿bin yuʼun ma yakix ta smakʼlinel te sfamiliae? ¿Bin yuʼun ma skanantay te sfamilia te ya yichʼik utsʼinel yuʼun te chopol ants winiketike?». Jaʼ yuʼun te maba kuxulix te winike; maʼyukix bin ya xjuʼ ya spas. Jich bitʼil la kiltik ta textoetik-abi (Salmo 115:17).

¿Yabal skʼan ya yal-abi te maʼyukix bin-ora ya xchaʼkuxajik tal te machʼatik lajemikixe? Maʼuk. Ta patil bael ya kilbeytik skʼoplal te chaʼkuxajel. Pero te bin smelelile, jaʼ te machʼatik lajemike ma snaʼik te bin ya apase. Ma xjuʼ ya yilat, ya yaʼiybat akʼop ni jaʼuk te ya skʼoponate. Jaʼ yuʼun ma skʼan ya axiʼ. Te machʼatik lajemikix ma xjuʼ ya skoltayat ni jaʼuk te ya yutsʼinate (Eclesiastés 9:4; Isaías 26:14).