Te Satanás sok te pukujetik yuʼun, spisil-ora kʼax chopolik sok ya x-utsʼinwanik. Ta namey te Satanás la smilbey te schambalam te Job sok te j-abatetik yuʼun. Jaʼnix jich la smiltiklanbey te lajuntul snichʼnab te Job «tal tulan icʼ» jin koel te na jich lajik. Ta patil te Satanás «la yehchentes ta cʼaʼel chin te Job, hahch ta stahn yoc cʼalal ta sjol» (Job 1:7-19; 2:7).

Kʼalal liʼ ay ta balumilal-a te Jesús te pukujetik la skʼatpʼun ta umaʼ sok ta tsʼoʼsit chaʼoxtul ants winiketik (Mateo 9:32, 33; 12:22). Ay jtul winik te la yakʼbeyik swokol sok la yakʼbeyik te ya yejchentes sba ta ton (Marcos 5:5). Soknix ay jtul kerem te la yakʼik te ya x-awun, te ya schʼoj sba ta lum yuʼunik «soc tulan yucʼot» (Lucas 9:42).

Te Satanás sok te pukujetik yuʼun, jaʼnix jich jmilawaletik ta kʼajkʼal ini. Jaʼto tal te la yichʼik chʼojel koel tal ta balumilal esmajem te bin chopol ya spasike. Te bin ya yichʼ alel ta swolol Balumilal ya yakʼ ta naʼel te yuʼun-nix kʼax chopolik-a. Ya yakʼbeyik chamel chaʼoxtul ants winiketik. Ay yantik te ma x-och swayelik o ay bin ya yakʼtiklanbey swayichinik. Ay yantik te ya stsakotik ta utsʼinel yuʼun te pukujetik. Sok ya stijbeyik yoʼtan ta spasel te bin chopol, ya yaʼiyik milaw o jaʼnix ya smil sbaik.

Te Lintina, te kuxinem ta Surinam, ya scholbey skʼoplal jtul pukuj o chopol espíritu la smil 16 ta jtul te machʼatik ay ta sfamilia sok ejchentesot sok utsʼinbot yoʼtan 18 jaʼbil. Te bitʼil jich kʼaxem ta stojole, te pukujetik «ya smulanik yutsʼinel, yejchentesel sok ya smilik te ants winiketik».

Pero te Jehová ya skanantay te j-abatetik swenta ma x-utsʼinot yuʼun-a te Satanás (Proverbios 18:10).