Te pukujetik jaʼ ya skʼanik te ya jkʼaxuntaybeytik skʼop te Diose
Ay costumbreetik te ya yakʼik ta naʼel te yalaj xjuʼ ya yilotik te machʼatik lajemike
Pero ¿bin yuʼun te Satanás sok te pukujetik ya spasik tulan ta sloʼlayel te ants winiketike? Melel ya skʼanik te ya jokintik ta skʼaxuntayel smantal te Diose. Jaʼ ya skʼanik te ya yichʼik ichʼel ta mukʼe. Ya skʼanik te ya jchʼuuntik te lotiletik sok te ya jpastik te bintik ma smulan te Jehovae. Bayal ta chajp te bin ya yakʼik ta nopele snitojbey sba skʼoplal sok costumbreetik ta swenta te machʼatik lajemikixe.
Kʼalal ay machʼa ya xlaj kuʼuntike kʼax kʼux ta aʼiyel sok stalel te jich ya kaʼiy jbatik yuʼune. Jich la yaʼiy sba te Jesús, melel «ocʼ» te kʼalal laj te yamigo Lazaroe (Juan 11:35).
Ta swolol balumilal ay bayal ta chajp costumbreetik te snitojbey sba skʼoplal sok te machʼatik lajemikixe, bayal ta chajp te costumbreetik-abi maba ya skontrain te bin ya yal te Bibliae. Pero ay costumbreetik te ya yakʼik ta naʼel te kuxajtiklaj te machʼatik lajemikixe sok te ya xjuʼ ya x-ilawanike. Ay costumbreetik jich bitʼil te ya skanantayik te machʼa laje sok chajpnax ya yakʼik ta ilel-a te yakik ta mel-oʼtan sok te ya spasik mukʼul kʼin, melel ya skuyik teme ma jichuk ya spasike ya xjuʼ ya x-utsʼinotik yuʼun te machʼa laje. Pero spisil te machʼatik ya spasik te costumbreetik-abi yakik ta yakʼel ta nopel te bin ya yal te Satanás, melel te Biblia ya yal «te machʼatic chamenic mayuc bin ya snaʼic» (Eclesiastés 9:5).
Ay yantik costumbreetik te ya yakʼik ta naʼel te yalaj skʼanik koltayel te machʼatik lajemike
Ay yantik costumbreetik o kʼinetik te ya spasik ta stojol te machʼatik lajemikixe, melel teme ma jichuk ya spasike yalaj xjuʼ ya x-utsʼinwanik. Ay nacionetik te banti ya spasbeyik skʼin te machʼa laje kʼalal kʼaxemix 40 kʼajkʼal-a o jun jaʼbil slajele. Kʼalal jich ya spasike yakiklaj ta skoltayel yuʼun ‹ya xkʼot› te banti ay te espirituetike. Te yanxan costumbre ya spasike jaʼ te ya yakʼbeyik sweʼel yuchʼel te machʼatik lajemikixe.
Spisil te costumbreetik-abi ma lekik ta spasel, melel jaʼ te lotiletik te ya yakʼ ta nopel te Satanás ta swenta te machʼatik lajemikixe. ¿Lekbal ya yil Jehová te ya jpastik te costumbreetik te ya yakʼik ta nopel te pukujetike? ¡Ma lek ya yil! (2 Corintios 6:14-18).
Te smelelil j-abatetik yuʼun Dios maba ya spasik ta jkʼaxel te costumbreetik te ya yalbeyik skʼoplal te lotiletik yuʼun te Satanás. Te bin ya spasike, jaʼ te ya spasik tulan ta yakʼbeyel yip yoʼtan sok ta skoltayel te machʼatik kuxajtikto-e. Kʼoem ta yoʼtanik te kʼalal ay machʼa ya xlaje, jaʼnax te Jehová ya xjuʼ ya skoltay (Job 14:14, 15).
Ilaybil yuʼun Jehová te espiritismo
Ay ants winiketik te ya xkʼopojik sok te pukujetik o ya stuuntesik jtul espiritista. Te vudú, te akʼ chamel, te magia, te yakʼel suerte sok te ya skʼoponik te machʼatik lajemikix jaʼme smakojbey skʼoplal te espiritismo.
Spisil ini ya yilay te Diose. Jaʼnax ya skʼan ichʼel ta mukʼ stukel (Éxodo 20:5).
Te Biblia jamal ya yal bintik-a te ya yilay te Jehovae: «Ma me xchicnaj ta awohlilic [...] te machʼa ya xʼaʼtej ta jnaʼojel, te machʼa ya spasbe seña snaʼel te bin chopol ya xcʼoht ta pasel, te machʼa ya snaʼ spasel chopol señahetic, jʼacʼ-chamel, jyahaltaywanej, te machʼa ya scʼopon chʼuhlelal, jpas señahiletic, o te machʼa ya scʼopon te machʼa chamene. Como ihlaybil yuʼun Jehová machʼayuc a te hich ya spas» (Deuteronomio 18:10-12).
¿Bin yuʼun te Jehová ya sjultes ta koʼtantik te ma skʼan ya jpastik te bintik ya yilaye?
Te Jehová ya sjultesbotik ta koʼtantik, melel maba ya skʼan te ya xkʼax jwokoltik. Te Jehová ay skʼuxul yoʼtan, ay skʼoplal ta yoʼtan te ants winiketik sok snaʼoj teme ay machʼa ya spas te bintik ya spas te pukujetike yame sta swokol.
Te machʼa jich la spase jaʼ te Nilda, te ya x-aʼtej ta espiritista-a ta Brasil. Akʼbot swokol yuʼun te pukujetik. Jich la yal: «Ya yuʼuninonik-a [...] te pukujetik. Ay baeltik te ya xchʼay kʼinal ya kaʼiye, jaʼ yuʼun la kichʼ otsesel ta jun hospital swenta ya yilbonik te jchamele. Te pukujetik bayal la yutsʼinonik jaʼ yuʼun jajchon ta bayal xiwel. La kuchʼ poxetik yuʼun ya xlamaj-a te bin yaʼiyel ya kaʼiy jbae sok jajchon ta yuchʼel trago sok ta snukʼel may. Bayal jaʼbil jich la jpas».
Te machʼatik ya spasik te espiritismo ya sta swokolik. Ya yijkitay sfamiliaik, ya x-ochik ta chukel sok ya smil sbaik
Ta patil ta swenta te koltayel akʼbot yuʼun te Jehová sok te Testigoetike, te Nilda ijkitayot yuʼun te pukujetik ta ora ini tseʼelix yoʼtan sok maʼyuk ta chamel. Jich ya yal: «Ya kalbeyex ta apisilik te mame xa achʼik abaik ni xujtʼuk, sok te bintik smakbeyoj skʼoplal te [chopol] espirituetik».