Te Dauda —te jaʼ slumal Sierra Leona— jich ya yal: «Chʼion ta chʼin jpam lum te ay ta provincia norteña. Ta jun buelta, te kʼalal chʼinonto-ae, te jfamilia sok yan familia la spasik tulan kʼop ta skaj jpam kʼinal. Ya yalik te schebal familia te jaʼ yuʼunik te kʼinale. Swenta ya xchajpaj-a te kʼope la yikʼik tal jtul jnaʼojel. Te jnaʼojele la yakʼbey stsak jun espejo jtul winik sok la spots ta sakil pakʼ. Ta patil te winik te potsbil ta sakil pakʼ jajch ta chikʼ sok ta nijkel. La yil te espejo sok la yal: ‹¡Ya jta ta ilel te yak ta talel jtul winik te bayalix yaʼbilal! Sak skʼuʼ spakʼ. Toyol winik, mamalix, sakix sjol sok kʼujul ya xbeen›.

»¡Jaʼ yak ta yalbeyel skʼoplal-a te jmamuche! Te winik bayal la xiʼ, jaʼ yuʼun jich la yal: ‹¡Teme ma xa achʼuunik te bin yakon ta yilele, laʼ ilawilik ta espejo!›. Ta melel, ¡maʼyuk machʼa la skʼan la yil! Swenta ya xlamaj-a te winike te jnaʼojel jajch stsijtsin ta jaʼ te yichʼoj jaʼmaletik te spachoj ta skʼab.

»Ta swenta te winik te stsakoj-a te espejoe, ‹te jmamuch› la yal te jaʼ yuʼun te jfamilia te kʼinale. La yalbey te jchuchuʼ meʼel te akʼa stuuntes te kʼinale. Te yan familia la schʼuun te bin la yichʼ alele. Jich schajpan jilel te kʼope».

Jich bitʼil la kiltikixe bayal jich ya xkʼot ta pasel ta África occidental. Tey-a sok ta yantik nacionetik, bayal millón ta tul ants winiketik ya schʼuunik te machʼatik lajemikix yalaj xbajtik te banti ay te espirituetike, te bantilaj ya xjuʼ ya yilik tal te ants winiketik te kuxinemik ta Balumilal sok te aylaj bin ya xjuʼ ya spasbeyike. ¿Melelbal te bin schʼuunojike? ¿Melelbal te kuxulikto te machʼatik lajemikixe? Teme ma meleluke, ¿machʼatik-a te ya skuy sbaik ta espirituetike? Kʼax mukʼ skʼoplal te ya jnaʼbeytik sujtib te jojkʼoyeletik ini, melel ya xjuʼ ya xlajotik yuʼun o ya jta jkuxlejaltik.