Te Satanás sok te pukujetik yuʼun ma bayalix tiempo ya sloʼlay te ants winiketike. Te Jehová la schʼojix koel tal ta Balumilal (Apocalipsis 12:9). Ta pajel chaʼbejxanix te Dios ya xbajt yichʼ ta kʼop yan buelta te Satanás sok te pukujetik yuʼun. Ta jun najalsitil te akʼbot yil yuʼun Dios, te jpuk-kʼop Juan jich la yal: «La jquil yac ta cohel tal ta chʼulchan jtuhl chʼul aʼbat, yichʼoj llave yuʼun te xahab soc slicoj mucʼul cadena ta scʼab. La stsac te dragón, te antiguo chan, ha te pucuj o Satanás, la schuc lajunwinic yoxbahcʼ (1,000) haʼbil. La schʼoj cohel ta xahab, la smac hilel ta llave soc la yaʼbe sello, scuenta yuʼun ma ba ya sloʼloylanix a te nacionetic, ha to cʼalal ya stsʼacay te lajunwinic yoxbahcʼ (1,000) haʼbile» (Apocalipsis 20:1-3). Ta patil, te Satanás sok te pukujetik yuʼun yame yichʼik lajinel ta jkʼaxel (Apocalipsis 20:10).

Jaʼnix jich ya yichʼik lajinel te chopol ants winiketik ta Balumilal (Salmo 37:9, 10; Lucas 13:5).

Te kʼalal la yichʼix lajinel-a te Satanás sok te pukujetik yuʼun, te Jehová ya yakʼbey bayal bendición te ants winiketik ta Balumilal. Juluk ta awoʼtan te ma kuxulikix te machʼatik lajemik. Te Jesús la spajbey skʼoplal te lajel sok te kʼalal ya xkʼub jwayeltik te ma xkaʼiytik kʼinal (Juan 11:11-14). Jich la yal, melel snaʼoj-a te ya xkʼot skʼajkʼalel te ya xchaʼjajchik tal te machʼatik lajemike. Jich la yal: «Ya me sta yorahil te spisil machʼatic ayic ta muquenal [...] ya me xloqʼuic talel» (Juan 5:28, 29; paja sok Hechos 24:15).

Te machʼatik ya xchaʼkuxajik tal ya xkuxinik liʼ ta Balumilal. Maba ya kaʼiybeytikix skʼoplal te ay machʼa ya xlaje, jaʼ ya kaʼiybeytik skʼoplal te ay machʼa ya xchaʼkuxajik tale. ¡Bayalme stseʼelil koʼtantik kʼalal ya kiltik te ya xchaʼkuxajik tal te machʼatik lajem kuʼuntike!