LECCIÓN 6
¿Aybal bin ya smaliyik te machʼatik lajemikixe?
1. ¿Bin ya smaliyik te machʼatik lajemikixe?
Ta jun buelta, te kʼalal ayto ta Balumilal-a te Jesuse, laj te Lázaro te yamigoe. Te Lazaroe ay ta nainel ta lum Betania-a, te jaʼ jun tut lum te nopol yiloj sba sok te Jerusalene. Kʼalal kʼot tey-a te Jesuse, te Lazaroe ayix chaneb kʼajkʼal slajel-a. Te Jesús bajtʼ ta mukenal jokimbil bael yuʼun te Marta sok te María te jaʼ sbankil swix yijtsʼin sbaik sok te chawinike, ta oranax la stsob sbaik tal bayal ta jtul ants winiketik. ¿Yabal xkʼot ta awoʼtan te sbujtsʼ kʼinal la yaʼiy te Marta sok te María kʼalal la yilik te Jesús te la schaʼkuxajtes te Lazaroe? Akʼa yichʼ kʼoponel te sjun Juan 11:21-24, 38-44.
Te yan lek yachʼil kʼop te ya jtatik ta Bibliae, jaʼ te bitʼil ya yichʼ maliyel te chaʼkuxajele. Te Marta snopojix-a te bitʼil jamal ya yal te Jehová te ya schaʼkuxajtes te machʼatik lajemikixe, swenta yuʼun ya xnainik ta Balumilal. Akʼa yichʼ kʼoponel te sjun Job 14:14, 15.
2. ¿Bin utʼil ayik te machʼatik lajemikixe?
Te Dios la yalbey te Adán: «Ta tsʼubil lum pasbilat, ta tsʼubil lum ya suhtat» (GÉNESIS 3:19)
Te ants winiketike pasbilik ta «tsʼubil lum» (Génesis 2:7; 3:19). Maʼyuk jun jchʼuleltik te ma xlaj te ay ta yutil jbakʼetaltike. Te kʼalal ya xlajotike maʼyuk bin kuxul ya xjil kuʼuntik. Te kʼalal ya xlaj te jchinamtike ya xtupʼ spisil te bintik jnopojtike. Jaʼ yuʼun te machʼatik lajemikixe maʼyuk bin ya snaʼikix sok maʼyukik ta wokol. Jaʼ yuʼun te kʼalal chaʼkuxaj te Lazaroe, maʼyuk bin la yalbey skʼoplal teme ay bin la spas te kʼalal lajem-ae. Akʼa yichʼ kʼoponel te sjun Eclesiastés 9:5, 6, 10.
Ay chaʼoxtul te machʼatik ya schʼuunik te ay infierno te banti ya yichʼik chikʼel yuʼun Dios te ants winiketik te kʼalal ya xlajike, jaʼukmeto ma meleluk. Jich bitʼil te la jnoptikixe, maʼyuk bin ya snaʼikix ta jkʼaxel te machʼatik lajemikixe. Jaʼ yuʼun te nojptesel ta swenta te infiernoe lotil sok ya xbolobtesbot skʼoplal yuʼun te Jehovae. Te Jehová ma xkʼax jxujtʼuk ta yoʼtan te ay machʼa ya yakʼbey swokol ta kʼajkʼe, melel jkʼaxel ya yilay stukel. Akʼa yichʼ kʼoponel te sjun Jeremías 7:31.
3. ¿Yabal xjuʼ ta kʼoponel te machʼatik lajemikixe?
Te machʼatik lajemikixe ma xkʼopojikix sok maʼyuk bin ya yaʼiyikix stojol (Salmo 115:17). Jaʼukmeto, ay chopol espirituetik te ya skʼoponik te ants winiketik sok jaʼ ya skuy sbaik-a te machʼatik lajemikixe (2 Pedro 2:4). Jaʼ yuʼun, kʼax ya yilay te Jehová te machʼa ya skʼan xkʼopoj sok te machʼatik lajemikixe. Akʼa yichʼ kʼoponel te sjun Deuteronomio 18:10, 11.
4. ¿Machʼatik ya xchaʼkuxajik talel?
Ay millonetik ta jtul ants winiketik te lajemik te yame xkuxinik ta Balumilale. Jaʼnix jich ay yantik te ya xchaʼkuxajik te maba la snaʼbeyik sba te Jehovae sok te jaʼ la spasik te bintik chopole. Akʼa yichʼ kʼoponel te sjun Hechos 24:15.
Te machʼatik ya xchaʼkuxajik tale yame xjuʼ ya snopik te smelelil kʼop ta swenta te Diose, ya xjuʼ ya yakʼ schʼuunel yoʼtanik ta swenta te Jesús soknix ya xjuʼ ya yakʼik ta ilel te ya schʼuunik mantale (Apocalipsis 20:11-13). Teme jich ya spasike yame xjuʼ ya smulanik te kuxlejalil ta sbajtʼel kʼinal liʼ ta Balumilal. Akʼa yichʼ kʼoponel te sjun Juan 5:28, 29.
5. ¿Bin ya yakʼ jnoptik ta swenta Jehová te chaʼkuxajele?
Ta swenta te chaʼkuxajele jaʼ jich ya yakʼ ta ilel skʼuxul yoʼtan sok yutsil yoʼtan te Jehovae. Wokolyal te Dios te bitʼil la stikun tal te sNichʼan ta yakʼel skuxlejal ta jwentatike jaʼme jich ya jtatik te chaʼkuxajele. Jaxan te jaʼate, ¿machʼa ya akʼan ya awil te kʼalal ya xtal te yorail chaʼkuxajele? Akʼa yichʼ kʼoponel te sjun Juan 3:16 sok Romanos 6:23.
