LECCIÓN 15
¿Bin yuʼun ya skʼan te ma xakom aba ta snopel te Bibliae?
1. ¿Bin utʼil ya skoltayat teme ma xakom aba ta snopel te Bibliae?
Ta swenta te bin la awilix tal yuʼun te nojptesel ta Bibliae, la yakʼ mukʼubukix te skʼuxul awoʼtan ta stojol te Jehovae. Jaʼukmeto, ma tikʼuknax-abi, yame skʼan ya amukʼubtes te skʼuxul awoʼtan ta stojol te Diose (1 Pedro 2:2). Jich bitʼil te yakat ta smaliyel te kuxlejalil ta sbajtʼel kʼinale, jaʼnaxme ya ata teme nopol ya awakʼ aba ta stojol Jehová te kʼalal ya anopbey te sKʼope. Akʼa yichʼ kʼoponel te sjun Juan 17:3 sok Judas 21.
Te kʼalal ya anopxan bael ta stojol te Diose, yame stsakxan ta lek yip te schʼuunel awoʼtane, sok jichme ya awakʼbey stseʼelil yoʼtan te Jehovae (Hebreos 11:1, 6). Te schʼuunel oʼtanile jaʼme ya skoltayotik ta sujtesel koʼtantik sok ta sjeltayel jtaleltik ta jkuxlejaltik. Akʼa yichʼ kʼoponel te sjun Hechos 3:19.
2. ¿Bin utʼil ya xjuʼ ya akoltay te yantike?
Yame xjuʼ ya amulambey yutsilal te bitʼil nopol ya awaʼiy aba ta stojol te Jehovae
Yaniwan akʼan ya acholbey yaʼiy te yantik ants winiketik te bintik anopojixe, melel jpisiltik ya jmulantik yalel te bintik lek skʼoplal kaʼiyojtike. Te kʼalal ya anopxan bael ta lek te bin ya yal te Bibliae jichme ya anop stuuntesel te sJun Dios ta swenta yalbeyel skʼoplal te Jehová sok te lek yachʼil kʼop te ya yalbey ta stojol te ants winiketike. Akʼa yichʼ kʼoponel te sjun Mateo 28:19, 20.
Ya xjuʼ ya xjajch acholbey yaʼiy te jayeb machʼatik ay awuʼun soknix te awamigotak ta swenta te Diose. Jaʼnax yuʼun, akʼa ta ilel te lek awoʼtane sok te ya x-ichʼawanat ta mukʼe. Mame jaʼuk xawalbey ta ora te bintik ma lekuk schʼuunejike, jaʼme xawalbey yaʼiy te bintik yaloj Dios te ya yakʼbotike. Mame xchʼay ta awoʼtan te jaʼ ya xtijbotxan yoʼtan yuʼun te ants winiketik te bin yilel te atalele, ma jaʼuknax te bin ya awale. Akʼa yichʼ kʼoponel te 2 Timoteo 2:24, 25.
3. ¿Bin utʼil ya xjuʼ nopol ya awaʼiy aba ta stojol te Diose?
Te kʼalal ya anop te Bibliae yame skoltayatxan ta smukʼubtesel te schʼuunel awoʼtane, jaʼatme ya anop teme ya akʼan ya xkʼoat ta snichʼan te Jehová te bin jaʼ kʼax mukʼ skʼoplale. Akʼa yichʼ kʼoponel te 2 Corintios 6:18.
4. ¿Bin ya skoltayatxan ta smukʼubtesel te schʼuunel awoʼtane?
Mame xakom aba ta snopel te bin ya yal te sKʼop Diose (Hebreos 5:13, 14). Albeya jtul testigo yuʼun Jehová te akʼa yakʼbat nojptesel sok te libro ¿Bin ya yakʼ ta nopel ta smelelil te Bibliae? Te kʼalal ya anopxan bael te Bibliae, jichme kʼax tseʼelxan awoʼtan ya xkuxinat-a. Akʼa yichʼ kʼoponel te sjun Salmo 1:1-3 sok 73:27, 28.
Te Biblia yichʼoj «te tʼujbil lek yachʼil kʼop yuʼun te Dios te tseʼel yoʼtane» (1 Timoteo 1:11, NM). Yame xjuʼ ya xnoptsajatxan ta stojol te Dios teme ya atsob aba sok te j-abatetik yuʼune (Hebreos 10:24, 25). Teme ya awakʼbey yipal ta spasel te skʼanojel yoʼtan te Jehovae, yame ata te smelelil kuxlejalile, jaʼ te kuxlejalil ta sbajtʼel kʼinale. Jaʼ yuʼun, te bin lek ya xjuʼ ya apase jaʼ te ya xnoptsajat ta stojol te Diose. Akʼa yichʼ kʼoponel te 1 Timoteo 6:19.
Yaniwan amulan-euk sk'oponel ini
TSOBLEJETIK
¿Bin ya yichʼ pasel ta tsoblejetik kuʼunkotik?
Baan ilawil te banti ya jtsob jbakotik sok te bin ya jpaskotik tey-ae.
SWENTA JKʼOPLALTIK
¿Bin yuʼun ya skʼan ya jnoptik te Bibliae? (najtʼ)
Bayal miyon ta tul ants winiketik staojbeyik sujtib ta Biblia te jojkʼoyeletik te tulanik skʼoplale. ¿Yabal akʼan anaʼbey sujtib-euk?
