Spisil te bintik aye jaʼ la spas te Diose. Stalel sbajtʼel kʼinal ay stukel (Salmo 90:2). Jaʼnix talem ta stojol stukel te lek yachʼil kʼop te ay ta Bibliae (1 Timoteo 1:11). Ta swenta te bitʼil jaʼ yakʼojbotik te jkuxlejaltike, jaʼ yuʼun jaʼnax ay ta swenta te ya kakʼ jbatik ta abatinel ta stojole soknix jaʼnax ya skʼan ya kichʼtik ta mukʼ stukel. Akʼa yichʼ kʼoponel te sjun Apocalipsis 4:11.

 Maʼyuk jtuluk ants winik yilojbey sit te Diose, melel espíritu stukel, jaʼ jun kuxlejalil te kʼax bayal yuʼel maba jich te bitʼil te joʼotik te chʼichʼbakʼetotike (Juan 1:18; 4:24). Ya xjuʼ ya jnaʼbeytik bin yilel stalel te Dios te kʼalal ya kiltik te bintik spastiklanoje. Jich bitʼil bayal ta chajp spastiklanoj te sit teʼetik soknix te bayal ta chajp nichimetike, spisil ini ya yakʼ ta ilel te kʼuxotik ta yoʼtane sok te kʼax bayal spʼijile. Soknix ta swenta spisil te bintik ay ta chʼulchan sok ta Balumilale ya yakʼ ta naʼel te ay bayal yuʼele. Akʼa yichʼ kʼoponel te sjun Romanos 1:20.

 Te bin utʼil ya xjuʼ ya jnaʼbeytikxan sba te Diose, jaʼ te kʼalal ya jkʼopontik te Bibliae. Tey ya yalbotik-a te bin yilel ya yil te ants winiketike, te bintik ya smulane sok te bintik ma smulane soknix ta swenta te bitʼil ya schajpan te jayeb ta chajp kʼopetik ya xchiknaje. Akʼa yichʼ kʼoponel te sjun Salmo 103:7-10.

 Jich la yal te Jesuse: «Jtatic te ayat ta chʼulchan, acʼa ichʼotuc ta mucʼ achʼul bihil» (Mateo 6:9). Manchukme ay bayal te bin utʼil ya yichʼ biiltesel te Diose, jaʼukmeto junax te sbiile. Ta swenta te bitʼil ay bayal ta chajp kʼopiletike maba pajal te bin utʼil ya yichʼ alel sbiil te Diose. Ta tseltal ya yichʼ alel Jehová. Akʼa yichʼ kʼoponel te sjun Salmo 83:18.

 Ay bayal Bibliaetik te banti la yichʼ jelbeyel sbiil te Dios ta Kajwal o Dios. Jaʼukmeto te kʼalal la yichʼ tsʼibayel te Bibliae, jteb ma sta jukmil buelta tsʼibaybil tey-a te sbiil te Diose.  Te kʼalal la snojpteslan te ants winiketik te Jesuse spisil ora la yakʼ ta naʼel te sbiil te Diose. Akʼa yichʼ kʼoponel te sjun Juan 17:26.

 Teme yuʼunix kʼuxotik ta yoʼtan-a te Jehovae, ¿bin yuʼun maba slajinoj te bintik ay swokolik yuʼun te ants winiketike? Ay chaʼoxtul te machʼatik ya yalik te yalaj yakʼbotik jwokoltik te Diose yuʼunlaj jich ya stsajtaybotik-a te koʼtantike. Jaʼukmeto ma meleluk stukel-abi. Akʼa yichʼ kʼoponel te sjun Santiago 1:13.

 Te Jehová yakʼojbotik jtsatik te bin beil ya skʼan ya jtʼuntik ta jkuxlejaltike. Te bin kʼax lek ya skʼan ya jtsatike, jaʼ te jaʼuk ya kakʼ jbatik ta abatinel ta stojole (Josué 24:15). Jaʼukmeto ay bayal ta jtul ants winiketik te jaʼ ya stsaik spasel te bintik chopole, jaʼ yuʼun bayal te wokolil ta Balumilale. Jaʼukmeto te Jehová kʼaxto ya smel yoʼtan yuʼun te bintik ma tojuk ta pasele. Akʼa yichʼ kʼoponel te sjun Génesis 6:5, 6.

 Jich bitʼil te kʼuxotik ta yoʼtan te Jehovae ya skʼan te yakuk jmulambeytik yutsilal te kuxlejalile, nopol ya slajinix te bintik ya yakʼ wokolil soknix te bintik chopole. Jaʼukmeto yuʼun ay swentail te bin yuʼun te mato slajinoj te bintik ya yakʼ wokolile. Ta lección 8 yame yichʼxan bael cholel ta lek tey-a. Akʼa yichʼ kʼoponel te 2 Pedro 2:9 sok 3:7, 13.

 Te Jehová ya yakʼ xnoptsajotik ta stojol te kʼalal ya jkʼopontike. Ay bayal skʼoplal ta yoʼtan ta jujuntul te ants winiketike (Salmo 65:2; 145:18). Jaʼnix jich chapal yuʼun ya spasbotik perdón te jmultike sok ya yil te banti kʼalal ya jpastik tulan ta spasbeyel te skʼanojel yoʼtane, manchukme ay te banti ya xchʼayotike. Jich yuʼun ya xjuʼ ya kamigointik te Jehová manchukme jmulawilotik. Akʼa yichʼ kʼoponel te sjun Salmo 103:12-14 sok Santiago 4:8.

 Jich bitʼil te jaʼ yakʼojbotik te jkuxlejaltik te Diose, jaʼnax ay ta swenta stukel te kʼuxuk ta koʼtantike (Marcos 12:30). Ya kakʼtik ta ilel te kʼux ta koʼtantik te Dios te kʼalal ya jnoptik ta swentae soknix te kʼalal ya jchʼuumbeytik te mantaliletik yuʼune. Te kʼalal jich ya jpastik ini yame xmukʼubxan te schʼuunel koʼtantik ta stojole. Akʼa yichʼ kʼoponel te 1 Timoteo 2:4 sok 1 Juan 5:3.