Te Jesús soknix te jnopojeletik yuʼune jaʼ la spasik te bin ya yakʼ ta nopel te smelelil religione, sok la spajbey skʼoplal jich bitʼil be te ya x-ikʼawan bael ta kuxlejalil ta sbajtʼel kʼinale, jaʼnax yuʼun te maʼyuk tsobol te machʼatik ya staik kʼoele (Mateo 7:14). Te machʼatik ya yichʼik ta mukʼ te Dios jich bitʼil ya yal te Bibliae, jaʼnaxme ichʼbil ta wenta yuʼun Dios-abi. Te machʼatik jich ya yichʼik ta mukʼ te Dios sok te smelelil kʼope jich junax ay te schʼuunel yoʼtanike. Akʼa yichʼ kʼoponel te sjun Juan 4:23, 24; 14:6, sok Efesios 4:4, 5.

Te Jesuse la yalbey jilel skʼoplal te ya xchiknaj ta patil lotil j-alwanejetik te ya sbolobtesik te smelelil jchʼuunjeletik yuʼune. Te ants winiketik ini sok te snail tsoblej yuʼunike ya yalik te schʼuunejik te Cristoe. Manchukme ya yalik te yichʼojik ta mukʼ te smelelil kʼope, jaʼukmeto ya sloʼlayik te ants winiketike. Jich yuʼun ya xjuʼ ta naʼbeyel sba te machʼatik ayik ta smelelil religione, melel te machʼatik tey ayik-ae ya yakʼik ta ilel ta stalelik sok ta yaʼtelik te jich ya xnaʼbot sbaik yuʼun te ants winiketike. Akʼa yichʼ kʼoponel te sjun Mateo 7:13-23.

Kiltik bael joʼeb señail te bitʼil ya xjuʼ ta naʼbeyel sbae:

• Ya yichʼik ta mukʼ te bin ya yal te Bibliae, melel snaʼojik te jaʼ sKʼop te Diose. Ma jaʼuk ya stʼunik te nojptesel yuʼun te ants winiketike, melel jaʼ yakʼoj ta yoʼtanik schʼuunel te leyetik te ay ta Bibliae (Mateo 15:7-9).  Soknix ya spasik ta skuxlejalik te bin ya spukik ta alele. Akʼa yichʼ kʼoponel te sjun Juan 17:17 sok 2 Timoteo 3:16, 17.

• Ya yichʼbeyik ta mukʼ sbiil te Diose, te jaʼ te Jehovae. Te Jesuse jich la spas te kʼalal la yakʼ ta naʼbeyel sbiil te sTate. La scholbey yaʼiy te ants winiketik ta swenta te Jehovae sok la snojpteslan bitʼil ta kʼanel ta swenta te ya yichʼ chʼultesel te biilil ini (Mateo 6:9). ¿Bin religionil ya yakʼ ta nopel te sbiil Dios ta alumale? Akʼa yichʼ kʼoponel te sjun Salmo 148:5, 13 sok Juan 17:26.

• Ya spukik ta alel ta swenta te Wentainel yuʼun te Diose. Te Jesús la yichʼ tikunel tal ta Balumilal ta scholel te lek yachʼil kʼope. Te Wentainel yuʼun te Diose jaʼ ay ta skʼab te Jesús te jaʼnax ya xjuʼ ya smukʼulin yoʼtan te ants winiketike. Maʼyuk bin ora la skom sba ta spasel ni jaʼuk te kʼalal la sta yorail te laje (Lucas 4:43; 8:1; 23:42, 43). Jaʼnix jich la yal ta swenta te jnopojeletik yuʼun te yalaj spukik ta alel euk te Wentainel yuʼun te Diose. Jaʼ yuʼun teme ay machʼa ya xkʼot te banti ayate sok te ya scholbat awaʼiy ta swenta te Wentainel yuʼun te Diose, ¿bin religión ochem ya akuy-a? Akʼa yichʼ kʼoponel te sjun Mateo 24:14.

• Maba uʼunimbilik yuʼun te chopol balumilale. Te jnopojeletik yuʼun te Jesuse ma schʼik sbaik ta política sok ta yantikxan kʼopetik (Juan 17:16; 18:36). Jaʼnix jich ma skʼayinik te bintik ya spasik soknix te stalel te balumilal te ya x-utsʼinotik yuʼune. Akʼa yichʼ kʼoponel te sjun Santiago 4:4.

• Ya xchiknaj ta ilel te kʼux ya yaʼiy sbaike. Snopojik ta sKʼop Dios te ya skʼan ya yichʼik ta mukʼ spisil te ants winiketike, manchukme yanyantik te stsʼumbalike. Te machʼatik ayik ta lotil religionetike bayal buelta ya schʼik sbaik ta guerrae, yan stukel te smelelil jchʼuunjeletik yuʼun te Cristoe ma jichuk ya spasik (Miqueas 4:1-3). Te bin ya spasike jaʼ te ya slokʼes stiempoik, te ya stuuntesik te bintik ay yuʼunik ta skoltayel sok ta smukʼubtesbeyel kʼinal yaʼiyik te spat xujkike. Akʼa yichʼ kʼoponel te sjun Juan 13:34, 35 sok 1 Juan 4:20.

¿Bin religionil te ya slokʼes ta Biblia te bintik ya yakʼ ta nopele, te ya yichʼbey ta mukʼ sbiil te Diose sok te ya spuk ta alel te Wentainel te ay ta chʼulchan te jaʼnax ya xjuʼ ya smukʼulin yoʼtan te ants winiketike? ¿Bin religionil te kʼux ya yaʼiy sbaik ta smelelile sok te ma schʼik sbaik ta guerrae? ¿Bin ya awal yuʼun ta swenta spisil ini? Akʼa yichʼ kʼoponel te 1 Juan 3:10-12.