Te Jehová la schajpan ta lek te bitʼil aʼtej te stsʼumbal Abraham sok la yakʼbey te leyetik yuʼune. Te lum ini la yakʼbey sbiilin Israel, jaʼ ay ta swentaik-a te smelelil yichʼel ta mukʼ te Jehovae soknix te skʼope (Salmo 147:19, 20). Jaʼ ta swentaik te ya staik bendición te ants winiketik ta spisil te nacionetike. Akʼa yichʼ kʼoponel te sjun Génesis 22:18.

 La yichʼik tsael yuʼun Dios te israeletik yuʼun jaʼ ya x-ochik ta testigoetik yuʼun. Te bin kʼax ta swenta te lum Israel ta namey kʼinale, ya yakʼ ta ilel te jaʼ kʼax lek te ya yichʼ chʼuumbeyel smantal te Diose, melel ya yichʼ tal lekilal stukel (Deuteronomio 4:6). Jaʼnix ta swenta te lum Israel te la snaʼbeyik sba te smelelil Dios te yantik ants winiketike. Akʼa yichʼ kʼoponel te sjun Isaías 43:10, 12.

 Te kʼalal la yichʼ pʼajel yuʼun Dios te lum Israele jaʼ la sjelolin jilel te jchʼuunjeletik yuʼun te Cristoe (Mateo 21:43; 23:37, 38). Jaʼ yuʼun te machʼatik smelelil jchʼuunjeletik ta ora ini jaʼik te machʼatik yakʼoj sbaik ta testigo ta stojol te Jehovae, ma jaʼukix te lum Israele. Akʼa yichʼ kʼoponel te sjun Hechos 15:14, 17.

 Te Jesús la schap ta lek te bin utʼil ya skʼan ya x-aʼtejik ta scholel skʼop Dios te jchʼuunjeletike, yuʼun jich ya yotsesik ta jnopojeletik te ants winiketik ta swolol Balumilal (Mateo 10:7, 11; 24:14; 28:19, 20). Jich bitʼil te ayotikix ta slajibal kʼajkʼal yuʼun te bintik ay ta balumilal ini, te aʼtelil yuʼun te scholel skʼop Diose stsakoj yip ta lek. Maʼyuk jich kʼoem tal ta pasel te bitʼil yak ta stsobel millonetik ta jtul ants winiketik ta spisil nacionetik te Jehovae, yuʼun jich ya xtalik ta banti te smelelil religione (Apocalipsis 7:9, 10). Jich bitʼil te chajpambil ta lek te bitʼil ya x-aʼtejik te smelelil jchʼuunjeletike ya xjuʼ ya skoltay sbaik sok ya yakʼbey sba smukʼul yoʼtanik. Jaʼnix jich pajal te bitʼil ya yichʼik pʼijubtesel ta tsoblejetik yuʼunike. Akʼa yichʼ kʼoponel te sjun Hebreos 10:24, 25.

 Ta yaʼbilal 1870 jajchik ta aʼtel te stestigotak te Jehovae. Tut jtsojbnax-a te machʼatik ya snopik te Bibliae, jajch snaʼbeyik swentail te smelelil nojptesel yuʼun te Biblia te ayix tal kʼajkʼal te ma naʼbiluk swentail-ae. Snaʼojik-a te jaʼ te Jesús te machʼa la schajpan jilel te aʼtelil ta swenta scholel skʼop Dios te ya spasik te jchʼuunjeletik yuʼune, jaʼ yuʼun jajch scholik ta swolol Balumilal ta swenta te Wentainel yuʼun te Diose. Ta yaʼbilal 1931 la sbiilinik testigoetik yuʼun Jehová. Akʼa yichʼ kʼoponel te sjun Hechos 1:8; 2:1, 4, 11, sok 5:42.

 Te jchʼuunjeletik ta sbabial siglo te bayuknax ayik-ae, la staik bayal lekilal yuʼun te bitʼil ay machʼatik wolotik yuʼune. Te jwolwanejetik ini snaʼojik te jaʼ jolol te Cristo ta stojol te jchʼuunjeletike (Hechos 16:4, 5). Jaʼnix jich ta kʼajkʼal ini, te stestigotak te Jehová ay Jtsojb Jwolwanejetik yuʼunik, te ayix bayal jaʼbil te yakik ta aʼtel ta stojol Dios, jaʼik te machʼatik ya yilik te aʼtelil te ya yichʼ pasel ta oficinaetik yuʼun te stestigotak te Jehová ta swolol Balumilal, te banti ya skʼasesik ta yantik kʼopiletik te skʼop Diose, te banti ya yichʼ pasel sok te bantito ya yichʼ pukel tal te junetik te lokʼemik ta Biblia te kʼaxem ta seiscientos ta chajp kʼopiletike. Te Jtsojb Jwolwanejetik ini ya stuuntesik te Biblia yuʼun ya yakʼbeyik smukʼul yoʼtan sok tojobtesel te kʼaxemto ta cien mil congregación te banti ayik te jchʼuunjeletike. Jaʼnix jich ay winiketik tey-a te chapalik ta lek yuʼun ya skanantayik te tuminchijetik yuʼun te Diose. Akʼa yichʼ kʼoponel te 1 Pedro 5:2, 3.

 Te stestigotak te Jehová kʼax lek chajpambil te bitʼil ya scholik te lek yachʼil kʼop te ay ta Bibliae sok ya yotsesik tal jnopojeletik. Ya scholik skʼop Dios ta nanatik euk jich bitʼil te la spas te jpuk kʼopetike (Hechos 20:20). Jaʼnix jich ya spʼijubtesik te machʼatik yuʼunix ya skʼan ya snopik-a te smelelil skʼop Diose. Ma jaʼuknax te lek chajpambil te bitʼil ya spasik te yaʼtelike, jaʼnix jich yermano sbaik ta spisilik te talel kʼaxel kʼux ya yaʼiy sbaik soknix te ya smulambeyik yutsilal te kanantayel ya x-akʼbot yuʼun te sTatik te ay ta chʼulchane (2 Tesalonicenses 1:3). Jich bitʼil te lek chajpambil te bitʼil ya x-aʼtejik te j-abatetik yuʼun te Dios te ya spasik tulan ta spasel te bin ya smulan te Diose soknix ta skoltayel te spat xujkike, ta skaj-abi jaʼik te machʼatik kʼax tseʼel yoʼtanik ta swolol te Balumilale. Akʼa yichʼ kʼoponel te sjun Salmo 33:12 sok Hechos 20:35.