LECCIÓN 05
Ya jtatik ta Biblia te bin ya yalbotik te Diose
Te Jehová yakʼojbotik jun mukʼul majtanil: jaʼ te 66 bikʼtal libroetik te yichʼoj te Bibliae. Pero yaniwan anop: «¿Bin-utʼil chiknaj te Bibliae? ¿Machʼa skʼop?». Swenta ya jnaʼtik-a, nail kiltik bin-utʼil jul ta jtojoltik te sKʼop Diose.
1. ¿Bin-utʼil ay-a te jaʼ skʼop Dios te Biblia teme winiketik la stsʼibayike?
Ayniwan 40 ta tul winiketik te yanyantik yaʼtelik te la stsʼibayik te Bibliae. Ayixniwan 3,500 jaʼbil te la yichʼ tsʼibayel te sbabial libro, sok te slajibal libroe ayixniwan 1,900 jaʼbil te la yichʼ tsʼibayele. Jalajniwan 1,600 jaʼbil ta tsʼibayel spajkal te Bibliae. Manchukme yanyantik yaʼtelik te machʼatik la stsʼibayike, jun-nax te bin la yalike. ¿Bin-utʼil ay-abi? Melel te Bibliae jaʼ sKʼop te Diose (kʼopona 1 Tesalonicenses 2:13). Te winiketik-abi ma jaʼuk la stsʼibayik te bin la skʼan yoʼtanike, «ha cuentahinotic yuʼun te Chʼul Espíritu [...] te hich cʼopojic ta scuenta Dios» (2 Pedro 1:21). a Te Dios la stuuntes te schʼul espíritu yuʼun la yakʼbey ta yoʼtan te winiketik te bin la stsʼibayik ta Bibliae (2 Timoteo 3:16).
2. ¿Machʼatik ya xjuʼ ya skʼoponik te Bibliae?
Te Dios la yal te «spisil nacionetic, tsʼumbaliletic, cʼopiletic soc pueblohetic» ya xjuʼ ya skʼoponik te lek yachʼil kʼop te ay ta Biblia (kʼopona Apocalipsis 14:6). Ta kʼajkʼal ini, jaʼnax te Biblia te kʼasesbil ta bayal ta chajp kʼopiletik. Spisil te ants winiketik ya xjuʼ ya skʼoponik te Biblia manchukme yanyantik skʼopik o slumalik.
3. ¿Bin la spas te Jehová yuʼun ma xlaj skʼoplal te Bibliae?
Te Biblia la yichʼ tsʼibayel ta balbil junetik te pasbilik ta snujkulel chambalam o ta steʼel jaʼmal te papiro sbiile. Pero maba jalajik te balbil junetik-abi, jich yuʼun chaʼoxtul winiketik te kʼux ta yoʼtanik te Bibliae la stsʼibayik lokʼel ta yantik balbil junetik. Chaʼoxtul ajwaliletik sok jwolwanejetik yuʼun religión kʼan slajinbeyik skʼoplal te Bibliae, pero ay machʼatik la skoltaybeyik skʼoplal manchukme ya xjuʼ ya yichʼik milel yuʼun. Te Jehová skanantayoj ta lek te Biblia swenta ya jnaʼtik te bin ya yalbotike. Te Biblia jich ya yal: «Te scʼop te Dios cuʼuntic stalel ay sbahtel qʼuinal» (Isaías 40:8).
JNOPTIKXAN TA LEK
Jnopbeytikxan ta lek skʼoplal bin-utʼil te Dios la yakʼbey ta yoʼtan te winiketik te bin la stsʼibayik ta Bibliae sok te bitʼil la skanantay swenta ya xkʼot ta stojol te ants winiketike.
4. Jaʼnix te Biblia ya yal te machʼa skʼop te bin tsʼibaybil tey-ae
Ilawilik te VIDEO. Ta patil kʼoponaik 2 Timoteo 3:16 sok albeyaik skʼoplal ini:
-
Teme winiketik la stsʼibayik te Biblia, ¿bin yuʼun ya kaltik te jaʼ sKʼop Diose?
-
¿Bin-utʼil juʼ yuʼun te Dios te la yakʼbey snaʼ te winiketik te bin ya snope?
Te secretario jaʼ ya stsʼibay te cartae, pero te bin ya stsʼibaye jaʼ skʼop te spatrone. Jaʼ jich te Bibliae: la stsʼibay winiketik, pero te bin tsʼibaybil tey-a jaʼ sKʼop te Diose.
5. Maʼyuk machʼa juʼ yuʼun slajinbeyel skʼoplal te Bibliae
Te Biblia talem ta stojol te Diose, jaʼ yuʼun jaʼ la skanantay. Te jayeb jaʼbil kʼaxemix tale bayal ajwaliletik kʼan slajinbeyik skʼoplal te Bibliae. Te jwolwanejetik yuʼun religión ma la skʼanik te ya skʼoponik te Biblia te ants winiketike. Bayal machʼatik la skoltaybeyik skʼoplal te Biblia manchukme la yichʼik kontrainel o la yichʼik albeyel te ya yichʼik milel yuʼune. Kilbeytik skʼoplal jtuluk te machʼa jich la spase. Ilawilik te VIDEO sok albeyaik skʼoplal ini:
-
Te bitʼil bayal bin la yichʼ pasel yuʼun ma xlaj skʼoplal te Bibliae, ¿yabal stijbat awoʼtan yuʼun ya akʼoponxan? ¿Bin yuʼun te jich ya awale?
Kʼoponaik Salmo 119:97 sok albeyaik skʼoplal ini:
-
¿Bin yuʼun bayal ants winiketik la yakʼ skuxlejalik swenta ya yichʼ kʼasesel ta yantik kʼopiletik te Bibliae?
6. Spisil te ants winiketik ya xjuʼ ya skʼoponik te Biblia
Maʼyuk yan libro jich bitʼil te Biblia te kʼasesbil ta bayal kʼopiletik sok te pukbil ta swolol Balumilal. Kʼoponaik Hechos 10:34, 35 sok albeyaik skʼoplal ini:
-
Te Diose jaʼ ya skʼan te yakuk yichʼ kʼasesel ta bayal ta chajp kʼopiletik te sKʼope sok te yakuk yichʼ pukel ta bayuk, ¿bin yuʼun te jich ya skʼane?
-
¿Bin ya yal te Biblia te kʼaxto ya amulane?
Jteb ma
spisil
te ants winiketik
kʼasesbil ta skʼopik te Bibliae
Kʼasesbil kʼaxem ta
3 mil
kʼopiletik,
spajkal o olilnax
5 mil millón
ta pajkniwan Bibliaetik pasbil imprimir,
maʼyuk yan libro te bayal pasbil imprimire
AY MACHʼATIK JICH YA YALIK: «Ay jeltaybilix te bin ya yal te Bibliae».
-
¿Bin ya anop te jaʼate?
-
¿Bin ya yakʼ jnaʼtik te jaʼnix sKʼop Dios-a te Bibliae?
¿BINTIK LA JNOPTIK?
Te Biblia jaʼ sKʼop te Diose, jaʼ yuʼun la skanantay swenta ya skʼoponik-a te ants winiketike.
¿Jilbal ta awoʼtan into?
-
¿Bin yuʼun ya kaltik te jaʼ lokʼem tal ta yoʼtan Dios te bin la stsʼibay te winiketike?
-
Ta spisil te bin la jnoptik ta lección ini, ¿bin la yikʼbat awoʼtan ta swenta te bitʼil maʼyuk machʼa juʼ yuʼun slajinel te Bibliae?
-
¿Bin xchi awoʼtan ta swenta te bintik la spas te Dios yuʼun ya xjuʼ ya akʼopon te Bibliae?
YA XJUʼ YA ANOPXAN INI
Ilawil bin-utʼil jul ta jtojoltik te Bibliae.
«¿Bin-utʼil jul ta jtojoltik te Bibliae?» (¡Wikʼame asit!, noviembre 2007)
Ilawil te bintik kʼan slajinbey skʼoplal te Bibliae.
«Te Biblia maʼyuk machʼa juʼem yuʼun slajinel» (Te J-ilkʼinal ta toyol, julio 2016)
Ilawil bintik wokolil la staik te machʼatik la skʼasesik ta yan kʼopil te Bibliae.
Ay bayal lokʼtaybil sok kʼasesbil ta yantik kʼopiletik te Bibliae. ¿Bin-utʼil ya anaʼ te maba jelbil te bin ya yal te Bibliae?
a Te chʼul espíritu jaʼme te yuʼel te Diose. Ta lección 07 yame yichʼ cholbeyelxan skʼoplal.
Yaniwan amulan-euk sk'oponel ini
TE BINTIK YA SJOJKʼOYLANIK
¿Bin-utʼil ya yakʼik te nojptesel yuʼun Biblia te testigoetik yuʼun Jehová?
Ya xjuʼ ya atuuntes biluk Bibliail te kʼalal ya awichʼ te nojptesel te ya yakʼik te testigoetik yuʼun Jehová. Jaʼnix jich ya xjuʼ ya apas invitar te afamilia sok te awamigotak.
