LECCIÓN 06
¿Bin-utʼil chiknaj te kuxlejalil?
Te Biblia ya yal: «Haʼat [Dios] ay ta acuenta te sloqʼuib-haʼ yuʼun cuxlejal» (Salmo 36:9). ¿Yabal achʼuun-abi? Ay chaʼoxtul ants winiketik ya skuyik te jichnax chiknaj tal te bintik aye, te maʼyuk jpaswaneje. Teme jichnax chiknajotik tale, maʼyuk swentail-abi te jkuxlejaltik. Pero teme jaʼ Jehová la spas spisil te bintik aye, ¿mabal ayuk swentail-abi? a Ilbeya skʼoplal te bin ya yal te Biblia ta swenta te bin-utʼil chiknaj tal te bintik aye sok te bin yuʼun melel te bin ya yale.
1. ¿Bin-utʼil chiknaj te Balumilal sok te ekʼetik?
Te Biblia ya yal: «Ta shahchibal Dios la spas te chʼulchan soc bahlumilal» (Génesis 1:1). Bayal cientificoetik ya schʼuunik te ay sjajchibal te Balumilal sok te chʼulchane. ¿Bin-utʼil la spas te Diose? La stuuntes te yuʼel, te jaʼ te schʼul espíritu swenta ya spas spisil te bintik aye, jich bitʼil te ekʼetik sok te planetaetik (Génesis 1:2).
2. ¿Bin yuʼun la spas te Balumilal te Diose?
Te Jehová «ma tojoluc la spas, ha la spas scuenta yuʼun ay machʼatic ya xnahinic tey a» (Isaías 45:18). Te Dios kʼax lek sok tʼujbil la spas te Balumilal swenta tey ya xkuxinik ta sbajtelkʼinal te ants winiketike (kʼopona Isaías 40:28 sok 42:5). Te cientificoetik ya yalik te maʼyuk yan planeta te pajal sok te Balumilale, melel ta yantik planetaetik maʼyuk tey-a te bintik ya xtuun kuʼuntik yuʼun ya xkuxinotik.
3. ¿Bin yuʼun maba pajal te ants winiketik sok te chambalametike?
Kʼalal spasojix-a te Balumilal te Jehovae, la spas spisil te bintik kuxajtik tey-ae. Ta nail la yakʼ chʼiuk jaʼmaletik, teʼetik sok la spas chambalametik. Ta patil, te «Dios la spas te ants-winic, la slopʼtay sba a» (kʼopona Génesis 1:27). ¿Bin yuʼun te ma pajalotik sok te chambalametike? Jich bitʼil te la spasotik ta slokʼomba te Diose, ya xjuʼ ya kakʼtik ta ilel te taleliletik yuʼune, jich bitʼil te kʼuxul oʼtanil sok te tojil oʼtanile. Jaʼnix jich ya xjuʼ ya jnoptik yantik kʼopiletik, ya jmulantik yilel te bintik tʼujbil sok yaʼiyel música. Sok te joʼotike ya xjuʼ ya kichʼtik ta mukʼ te Jpaswaneje, ma jichukotik te bin-utʼil te chambalametike.
JNOPTIKXAN TA LEK
Jich bitʼil ya yal te Bibliae te Dios la spas spisil te bintik kuxajtike, kiltik bin yuʼun ya xjuʼ ya jchʼuuntik. Jaʼnix jich kiltik te bin ya snojptesotik ta swenta Dios te taleliletik ya kakʼtik ta ilele.
4. Ay machʼa la spas te bintik ay ta Balumilale
Te ants winiketik ichʼbilik ta mukʼ yuʼun te bin spasojik te slokʼtayojik-a te bintik ay ta Balumilale. Pero ¿machʼa ya yichʼ ta mukʼ te machʼa mero la spase? Ilawilik te VIDEO sok albeyaik skʼoplal ini:
-
Ta spisil te bintik ay ta Balumilale, ¿bintik slokʼtayojik-a te ants winiketike?
Spisil te naetik ay machʼa spasoj. Pero ¿machʼa la spas spisil te bintik ay ta Balumilale? Kʼoponaik Hebreos 3:4 sok albeyaik skʼoplal ini:
-
¿Bintik ay ta Balumilal te chajpnax ya awile?
-
¿Yuʼun-nixbal ay machʼa la spas-a te bintik ay ta Balumilal sok ta chʼulchane? ¿Bin yuʼun te jich ya awale?
¿Anaʼojbal-a?
Ya xjuʼ ya akʼoponbey skʼoplal sok ya awil videoetik ta swenta te tema ini ta jw.org te banti ya yal: «¿Aybal machʼa la spas?» sok «Te bintik ya yalik te bitʼil chiknaj te kuxlejalil».
«Spisil nahetic ay machʼa pasot yuʼun, pero ha Dios te la spas spisil bintic ay»
5. Jich chiknaj te kuxlejalil te bitʼil ya yal te Biblia
Ta Génesis capítulo 1, ya yalbey skʼoplal te bin-utʼil chiknaj te Balumilal sok spisil te bintik ay tey-ae. ¿Melelbal te bin ya yale o lotil? Ilawilik te VIDEO sok albeyaik skʼoplal ini:
-
¿Yabal yakʼ ta nopel te Biblia te wakebnax kʼajkʼal juʼ ta pasel te Balumilal sok te bintik ay tey-ae?
-
¿Aybal swentail ya awaʼiy te bin ya schol te Biblia ta swenta te bitʼil la yichʼ pasel te bintik aye? ¿Bin yuʼun te jich ya awale?
Kʼoponaik Génesis 1:1 sok albeyaik skʼoplal ini:
-
Bayal cientificoetik ya yalik te ay sjajchibal te Balumilal sok te chʼulchane. ¿Pajalbal te bin ya yalik sok te bin ya yal te Génesis 1:1?
Ay machʼatik ya skʼan ya snaʼik teme jun-nax bin la spas te Dios sok te patil ay bintik kʼatpʼujik-ae. Kʼoponaik Génesis 1:21, 25, 27 sok albeyaik skʼoplal ini:
-
¿Jichnixbal ya yakʼ ta nopel-a te Biblia te jun-nax te bin la spas te Dios sok te kʼunkʼun la skʼatpʼun sba ta chay, ta chambalam sok ta ants winik? ¿O jaʼnix te Dios la spas spisil ta chajp te bintik aye? b
6. Maʼyuk bin pajal sok te ants winiketik
Ma pajalotik sok te chambalametik. Kʼoponaik Génesis 1:26 sok albeyaik skʼoplal ini:
-
Te joʼotik ya xjuʼ ya kakʼtik ta ilel skʼuxul koʼtantik sok te ya jnaʼbeytik yoʼbolil sba te yantike, melel pasbilotik ta slokʼomba te Dios. ¿Bin yilel stalel-abi te Jehovae?
AY MACHʼATIK JICH YA YALIK: «Lotil te bin ya yal te Biblia ta swenta te la yichʼ pasel te bintik aye».
-
¿Bin ya anop yuʼun-abi? ¿Bin yuʼun te jich ya anope?
¿BINTIK LA JNOPTIK?
Te Jehová la spas spisil te bintik ay ta chʼulchan sok ta Balumilal.
¿Jilbal ta awoʼtan into?
-
¿Bin ya yal te Biblia ta swenta te bin-utʼil chiknaj te bintik aye?
-
¿Jun-naxbal te bin la spas te Dios te patil ay bin kʼatpʼujik-ae o la spas spisil ta chajp te bintik aye?
-
¿Bin yuʼun te ma pajalotik sok te chambalametike?
YA XJUʼ YA ANOPXAN INI
Ilawil cheʼoxebuk te bintik ay ta Balumilal te ya yakʼ ta ilel te ay Jpaswanej kuʼuntike.
«¿Bin ya jnoptik ta swenta te chambalametike?» (¡Wikʼame asit!, septiembre 2006)
Ilawil bin-utʼil jtul tatil ya scholbey yaʼiy te snichʼan te bin-utʼil pastaj te bintik aye.
Ilawil teme pajal te bin ya yal te evolución sok te bin ya yakʼ ta nopel te Bibliae.
«Te Diose ¿labal schiknajtes tal spisil te bintik kuxajtik ta swenta te evolución?» (Ay ta jw.org)
Ilawil te bintik staojik ta ilel te cientificoetik: teme yuʼun-nix jichnax chiknaj tal-a te kuxlejalil o teme ay machʼa la spasotike.
¿Bin-utʼil chiknaj te kuxlejalil? Joʼchajp te bin ya skʼan ilbeyel skʼoplal (folleto)
a Te lección 25 ya yalbey skʼoplal te bin yuʼun la spas te ants winiketik te Diose.
b Te Biblia ya stuuntes te kʼopil jujunchajp tsʼumbalil swenta ya yalbey skʼoplal spisil te bintik kuxajtik, yan stukel te cientificoetik yan-a te bin-utʼil ya xkʼot ta yoʼtanik te kʼopil-abi.
Yaniwan amulan-euk sk'oponel ini
TE BINTIK YA SJOJKʼOYLANIK
¿Bin-utʼil ya yakʼik te nojptesel yuʼun Biblia te testigoetik yuʼun Jehová?
Ya xjuʼ ya atuuntes biluk Bibliail te kʼalal ya awichʼ te nojptesel te ya yakʼik te testigoetik yuʼun Jehová. Jaʼnix jich ya xjuʼ ya apas invitar te afamilia sok te awamigotak.
