LECCIÓN 07
¿Bin yilel te Jehová?
¿Bin yilel ya akuy te Jehovae? ¿Jichbal ya awaʼiy te kʼax mukʼ sok te kʼax namal ay ta atojole te ma xjuʼ ya awamigoine? O ¿Jichbal ya akuy te jaʼnax bayal yuʼel jich bitʼil te tulan chawuke? ¿Bin-nix yilel-a te Jehovae? Te Biblia ya yakʼ jnoptik te ay tʼujbil taleliletik yuʼun te Jehová sok ya yal te ay akʼoplal ta yoʼtane.
1. ¿Bin yuʼun ma xjuʼ ya kiltik te Diose?
«Ha Espíritu te Diose» (Juan 4:24). Te Jehová maba chʼichʼbakʼet jich bitʼil te joʼotike. Jaʼ jun espíritu te ay ta chʼulchan te ma xjuʼ ya kiltike.
2. ¿Bintik talelil ay yuʼun te Jehová?
Manchukme ma xjuʼ ya kiltik te Jehová, ya jnaʼtik te kuxule sok te ay tʼujbil taleliletik yuʼun te jaʼ ya stij koʼtantik swenta kʼux ta koʼtantik. Te Biblia ya yal: «Te Jehová cʼux ta yoʼtan te bin stojil ta pasel, soc ma ba ya spihtes te machʼatic jun yoʼtanic ta stojol» (Salmo 37:28). Jaʼnix jich bayal «ya xcʼuxultaywan soc ya snaʼbotic yoʼbolil jbahtic», kʼaxtoxan jich ya spas ta stojol te machʼatik ayik ta wokole (Santiago 5:11). «Te Jehová nopol ay ta stojol te machʼatic ayic ta mel-oʼtan, soc ya scoltay te machʼatic pichʼil yoʼtanique» (Salmo 34:18). ¿Anaʼojbal te ya xjuʼ ya kakʼbeytik stseʼelil yoʼtan te Jehová o te ya kakʼbeytik smel yoʼtane? Te machʼa jaʼ ya spas te bin ma leke ya yakʼbey smel yoʼtan te Jehovae (Salmo 78:40, 41). Pero te machʼa ya spas te bin leke ya yakʼbey stseʼelil yoʼtan (kʼopona Proverbios 27:11).
3. ¿Bin-utʼil ya yakʼ ta ilel te kʼuxotik ta yoʼtan te Jehovae?
Te mukʼul talelil yuʼun te Jehová jaʼ te kʼuxul oʼtanile. Te Biblia ya yal: «Jcʼuxul-oʼtanil stuquel te Diose» (1 Juan 4:8, TZOXCH). Ta swenta te Biblia sok te bintik spastiklanoje te Jehová ya yakʼ ta ilel te kʼuxotik ta yoʼtane (kʼopona Hechos 14:17). Nopa awaʼiy te bin-utʼil la spasotike. Ya xjuʼ ya kiltik tʼujbil coloretik, ya jmulantik yaʼiyel música sok bujtsʼan weʼeliletik, melel jaʼ ya skʼan te ya jmulantik te jkuxlejaltike.
JNOPTIKXAN TA LEK
Kiltik bin ya stuuntes te Jehová swenta ay bintik ya spas. Sok jnoptik bin-utʼil ya yakʼ ta ilel te tʼujbil taleliletik yuʼune.
4. Te schʼul espíritu te Diose
Te joʼotike ya jtuuntestik te jkʼabtik yuʼun ya x-aʼtejotik, yan stukel te Jehová ya stuuntes te schʼul espíritu. Te Biblia maba ya yal te jaʼ jtul ants winik te chʼul espiritue, jaʼ yuʼel te Dios te ya stuuntes ta spasel spisil te bin ya skʼan yoʼtane. Kʼoponaik Lucas 11:13 sok Hechos 2:17, sok albeyaik skʼoplal ini:
-
Te Dios ya smal koel te schʼul espíritu ta stojol te machʼa ya xkʼanbot yuʼune. Jich yuʼun, ¿jaʼbal jtul ants winik te chʼul espíritu o jaʼbal te yuʼel te Diose? ¿Bin yuʼun te jich ya awale?
Te Jehová ya stuuntes te schʼul espíritu kʼalal ay bintik ya spase. Kʼoponaik Salmo 104:30 sok 2 Pedro 1:20, 21, sok albeyaik skʼoplal ini:
-
¿Bin-utʼil stuuntesoj te schʼul espíritu te Jehovae?
5. Te Jehová ay tʼujbil taleliletik yuʼun
Manchukme te Moisés yakix ta abatinel ta stojol-a te Diose, la skʼan la snaʼbeyxan sba ta lek. Jaʼ yuʼun te Moisés la yalbey te Jehová: «Aʼbon jnaʼ te bin ay ta awoʼtan, scuenta yuʼun ya jnaʼbat aba» (Éxodo 33:13). Te Jehová la yakʼbey snaʼ te Moisés cheʼoxeb talelil yuʼun. Kʼoponaik Éxodo 34:4-6 sok albeyaik skʼoplal ini:
-
¿Bintik talelil ay yuʼun te Jehovae?
-
¿Bintik talelil yuʼun Jehová te ya amulanxane?
6. Te Jehová ay skʼoplal ta yoʼtan te ants winiketike
Te lum yuʼun Dios ta namey la yichʼik mosoinel ta Egipto. ¿Bin yaʼiyel la yaʼiy sba Jehová te kʼalal la yil te ayik ta wokole? Chʼama awaʼiyik te AUDIO sok tʼuna ta aBibliaik, o kʼoponaik Éxodo 3:1-10. Ta patil albeyaik skʼoplal ini:
-
¿Bin ya yakʼbat anop ta swenta te bin yaʼiyel ya yaʼiy sba Jehová kʼalal ya yil te ya xwoklaj te ants winiketike? (Ilawilik te versículo 7 sok 8).
-
¿Yuʼun-nixbal ya skʼan ya skoltayotik-a te Jehovae? ¿Yabal xjuʼ yuʼun? ¿Bin yuʼun te jich ya awale?
7. Chikan ta ilel te taleliletik yuʼun te Jehová
Te Jehová ya yakʼ ta ilel te bin yilel stalel ta swenta te bintik spastiklanoje. Ilawilik te VIDEO. Ta patil kʼoponaik Romanos 1:20 sok albeyaik skʼoplal ini:
-
Ta swenta te bintik pastiklanbile, ¿bin talelil yuʼun Jehová ya ata ta ilel te jaʼate?
AY MACHʼATIK JICH YA YALIK: «Maʼyuk jkʼoplaltik ta yoʼtan te Diose».
-
¿Bin ya awal te jaʼate?
-
¿Bin yuʼun te jich ya awale?
¿BINTIK LA JNOPTIK?
Te Jehová jaʼ jun espíritu, jaʼ yuʼun ma chikanuk ta ilel. Ay tʼujbil taleliletik yuʼun, jich bitʼil te kʼuxul oʼtanil te spisil-ora ya yakʼ ta ilele.
¿Jilbal ta awoʼtan into?
-
¿Bin yuʼun ma xjuʼ ya kiltik te Jehová?
-
¿Bin-a te chʼul espíritu?
-
¿Bintik talelil ay yuʼun te Jehovae?
YA XJUʼ YA ANOPXAN INI
Nopa chanchajp taleliletik yuʼun te Jehová swenta ya anaʼbeyxan sba ta lek-a.
«¿Bin yilel stalel te Diose?» (Te J-ilkʼinal ta toyol, núm. 1 2019)
Nopa bin ya yakʼ jnaʼtik te ma bayuknax banti ay te Jehová.
«¿Bayuknaxbal ay te Diose? ¿Teybal ay ta spisil te bintik spasoje?» (Ay ta jw.org)
Nopa bin yuʼun te Biblia ya yal te jich kʼoem bitʼil «skʼab» Dios te chʼul espiritue.
Jtul winik te ma xyil kʼinale ma schʼuun-a te mukʼ skʼoplal ya x-ilot yuʼun te Diose. Ilawil bin yuʼun ma jichuk ya snopix ta ora into.
«Jich ya kaʼiy te ya xjuʼ ya jkoltayix te yantike» (Te J-ilkʼinal ta toyol, 1 yuʼun octubre 2015)
Yaniwan amulan-euk sk'oponel ini
TE BINTIK YA SJOJKʼOYLANIK
¿Bin-utʼil ya yakʼik te nojptesel yuʼun Biblia te testigoetik yuʼun Jehová?
Ya xjuʼ ya atuuntes biluk Bibliail te kʼalal ya awichʼ te nojptesel te ya yakʼik te testigoetik yuʼun Jehová. Jaʼnix jich ya xjuʼ ya apas invitar te afamilia sok te awamigotak.
