Te Jehová ya skʼan te yakuk anaʼbey sba ta leke. ¿Bin yuʼun? Jaʼ yuʼun te ya snaʼ te ya akʼan xnoptsajat ta stojol te kʼalal ya anaʼ te bin yilel stalel, te bin yilel ya x-aʼtej sok te bin snopoj ya spas ta atojole. ¿Yuʼun-nixbal ya xjuʼ ya kamigointik-a te Diose? (Kʼopona Salmo 25:14). ¿Bin ya xjuʼ ya apas yuʼun ya awamigoin te Diose? Te Biblia ya yakʼbey sujtib te jojkʼoyeletik-abi soknix ya yalbotik bin yuʼun te jaʼ kʼax lekil amigo te ya xjuʼ ya atae.

1. ¿Bin ya skʼan te Jehová te yakuk apase?

«Nohpojanic ta stojol Dios, hich ya xnohpoj ta atojolic» (Santiago 4:8). ¿Bin ya skʼan ya yal-abi? Jaʼ te ya skʼan ya yamigoinat te Jehová. Ay machʼatik wokol ya yaʼiyik te ya yamigoinik te machʼa maba ya yilike, jaʼuktobalix-a te Dios te ma xjuʼ ya yilike. Pero yakʼojbotik te Biblia swenta ya jnaʼtik te bin yilel stalel yuʼun ya xnoptsajotik ta stojol. Jaʼ yuʼun te kʼalal ya jkʼopontik te bin ya yalbotik te Dios liʼ ta Bibliae, ya stsakxan yip te bitʼil lek kiloj jbatik soke manchukme maba ya xjuʼ ya kiltik.

2. ¿Bin yuʼun jaʼ kʼax lekil amigo te Jehová?

Maʼyuk machʼa kʼax kʼuxat ta yoʼtan jich bitʼil te Jehovae. Jaʼ ya skʼan te ayuk stseʼelil awoʼtane sok te yakuk akʼanbey koltayel te bin-ora ya xtuun awuʼune. Ya xjuʼ ya awakʼbey ta stojol spisil te bintik ya amel awoʼtan yuʼun, melel ay akʼoplal ta yoʼtan (1 Pedro 5:7). Te Jehová spisil-ora ya skʼan ya skoltay te yamigotak, ya smukʼubtesbey kʼinal yaʼiyik sok ya xchʼam yaʼiy te bin ya yalike (kʼopona Salmo 94:18, 19).

3. ¿Bin ya skʼan te Jehová te yakuk spas te yamigotake?

Te Jehová kʼux ta yoʼtan spisil te ants winiketike, pero jaʼ «jun yoʼtan sba soc te machʼatic toj yoʼtan» (Proverbios 3:32). Te Jehová jaʼ ya skʼan te yakuk spas te bin lek te yamigotake sok te yakuk spʼajik te bin maba lek ya yile. Pero ayniwan machʼatik wokol ya yaʼiyik te jich ya spasike. Pero te Jehová ya xkʼot ta yoʼtan te ay wokol ya kaʼiytike, jaʼ yuʼun ma spʼaj te machʼatik kʼux ya x-aʼiyot yuʼune sok te machʼatik ya spasik tulan ta spasel te bin leke (Salmo 147:11; Hechos 10:34, 35).

 JNOPTIKXAN TA LEK

4. Te Abrahán jun yoʼtan sba sok-a te Jehová

Te bin ya yal te Biblia ta swenta te Abrahán (o Abrán) ya skoltayotik yuʼun ya jnaʼtik te bin-utʼil ya xjuʼ ya kamigointik te Diose. Kʼoponaik Génesis 12:1-4 sok albeyaik skʼoplal ini:

• ¿Bin albot spas yuʼun Jehová te Abrahane?

• ¿Bin bendición ya x-akʼbot yuʼun te Jehovae?

• ¿Bin la spas te Abrahán kʼalal ay bin albot spas yuʼun te Jehovae?

5. ¿Bin ya skʼan te Jehová te yakuk spas te yamigotake?

Ta jpisiltik ay bin ya jkʼantik te yakuk spas ta jtojoltik te kamigotaktike.

• ¿Bin ya akʼan te yakuk spas ta atojol te awamigotake?

Kʼoponaik 1 Juan 5:3 sok albeyaik skʼoplal ini:

• ¿Bin ya skʼan te Jehová te yakuk spas te yamigotake?

Swenta ya jchʼuunbeytik smantal te Jehovae ayniwan bin ya skʼan ya jeltaytik ta jtaleltik o ta jkuxlejaltik. Kʼoponaik Isaías 48:17, 18 sok albeyaik skʼoplal ini:

• ¿Bin yuʼun ya skʼanbotik te Jehová te ayuk bin ya jeltaytik ta jkuxlejaltik?

 6. Te Jehová ay bin ya spas ta stojol te yamigotake

 ¿BINTIK LA JNOPTIK?

Ya skʼan ya yamigoinat te Jehová sok ya skʼan ya skoltayat yuʼun ya xnoptsajat ta stojol.

¿Jilbal ta awoʼtan into?

• ¿Bin-utʼil ya skoltay te yamigotak te Jehovae?

• ¿Bin yuʼun ya skʼanbotik te Jehová te ayuk bin ya jeltaytik ta jkuxlejaltik?

• ¿Jichbal ya awaʼiy te kʼax wokol ta pasel te bin ya skʼanbotik te Jehovae? ¿Bin yuʼun te jich ya awale?