LECCIÓN 10
¿Yabal skoltayat teme ya xbaat ta tsoblejetike?
¿Aybal kʼoemat ta tsoblejetik yuʼun te testigoetik yuʼun Jehová? Teme maʼyuke, yaniwan xiwat te sbabial buelta ya xkʼoate. Yaniwan anop: «¿Bin ya spasik ta stsoblejik te Testigoetike? ¿Bin yuʼun te mukʼ skʼoplal ya yilike? ¿Yabal xjuʼ ya xboon-euk?». Ta lección ini yame anop te ya skoltayat ta akuxlejal te tsoblejetik sok ya yakʼ xnoptsajatxan ta stojol te Jehová.
1. ¿Bin yuʼun ya spasik tsoblejetik te Testigoetike?
Jtul winik te la stsʼibay te Biblia la yal bin yuʼun mukʼ skʼoplal te tsoblejetike, la yal: «Ya calbe yutsil scʼoblal te Jehová ta banti stsoboj sbahic te ants-winiquetic» (Salmo 26:12). Jaʼnix jich ta kʼajkʼal ini, te testigoetik yuʼun Jehová ya stsob sbaik-euk, jaʼ ya x-akʼbot bayal stseʼelil yoʼtanik yuʼun. Ta swolol Balumilal ya stsob sbaik ta jujun semana ta yalbeyel yutsil skʼoplal te Dios, ta skʼayojtayel sok ta skʼoponel. Jaʼnix jich ta jujun jaʼbil ya spasik mukʼul tsoblejetik.
2. ¿Bin ya xbajt anop tey-a?
Ta tsoblejetik jaʼ ya yichʼ tuunteselxan te Bibliae, tey ya yichʼ cholel-a te bin ya skʼan ya yale (kʼopona Nehemías 8:8). Teme ya xbaat ta tsoblejetik-abi, yame anaʼbeyxan sba te Jehová sok te tʼujbil taleliletik yuʼune. Kʼalal ya xkʼot ta awoʼtan te mero kʼuxat ta yoʼtane, yame akʼan ya awamigoinxan ta lek. Jaʼnix jich ta tsoblejetik yame anop bitʼil ya skoltayat te Jehová yuʼun ya ata stseʼelil awoʼtan (Isaías 48:17, 18).
3. ¿Bin-utʼil ya skoltayat te machʼatik ya anaʼbey sba ta tsobleje?
Te Jehová ya yalbotik te «acʼa jnoptic bin utʼil talel cʼaxel ya juc jbahtic ta cʼuxultaywanej soc ta spasel lequil aʼteliletic» sok te ma «jquehchantic te ya jtsobilan jbahtic» (Hebreos 10:24, 25). Ta tsoblejetik, yame anaʼbey sba ants winiketik te kʼux ya yaʼiy sbaik sok te ya skʼan ya xnoptsajikxan ta stojol te Dios jich bitʼil te jaʼate. Sok yame xbajt yakʼbat smukʼul awoʼtan te bin ya yalik ta swenta te Biblia (kʼopona Romanos 1:11, 12). Jaʼnix jich tey ta tsoblejetik yame anaʼbey sba jchʼieletik, te machʼatik nujpunemik te tseʼelnax yoʼtanik manchukme ay swokolik. Te bin la kaltikixe jaʼme cheʼoxebnax te bin yuʼun ya skʼan te Jehová te ya jtsobilan jbatike.
JNOPTIKXAN TA LEK
Kiltik bin yilel ya spas te stsoblejik te testigoetik yuʼun Jehová sok bin yuʼun ya skʼan ya apas tulan te yakuk xbaate.
4. Te tsoblejetik yuʼun te testigoetik yuʼun Jehová
Te sbabial jchʼuunjeletik ta namey la stsob sbaik ta yichʼel ta mukʼ te Jehová (Romanos 16:3-5). Kʼoponaik Colosenses 3:16 sok albeyaik skʼoplal ini:
-
¿Bin ya spasik ta stsoblejik-a te sbabial jchʼuunjeletike?
Ta kʼajkʼal ini, jaʼnix jich te Testigoetik ya stsobilan sbaik ta sNail Tsoblej yuʼunik. ¿Bin yilel ya spasik te stsoblejike? Ilawilik te VIDEO. Ilawilik te dibujo te banti yak ta pasel jun tsoblej sok albeyaik skʼoplal ini.
-
¿Bintik pajal ya awil te bin ya yichʼ pasel ta sNail Tsoblej sok te bin ya yal te Colosenses 3:16?
-
Te bin la awil ta video o ta dibujo ta swenta te tsoblejetike, ¿bin la amulanxan tey-a?
Kʼoponaik 2 Corintios 9:7 sok albeyaik skʼoplal ini:
-
¿Bin yuʼun te ma xyichʼ kʼanel takʼin ta tsoblejetik?
Ilawil sok te machʼa ya snojptesat te bin ya yichʼ nopel ta tsoblej ta semana ini:
-
Ta spisil te bin la kiltik te ya yichʼ nopel ta tsoblej, ¿bin la amulanxan te ya skoltayat awaʼiye?
¿Anaʼojbal-a?
Ta jw.org ya xjuʼ ya awil banti sok bin-ora ya yichʼ pasel tsoblejetik ta yanyantik lugaretik ta swolol Balumilal.
-
Ta tsoblejetik kuʼuntik ay machʼa ya schol kaʼiytik te skʼop Dios, ya kichʼtik pʼijubtesel ta scholel skʼop Dios sok ya kiltik videoetik. Ya xjajch sok ya xlaj sok jun kʼayojil sok oración.
-
Te machʼatik ya xkʼotik ta tsoblej ya xjuʼ ya yakʼbeyik sujtib te jojkʼoyeletik te ya yichʼ pasel tey-a teme jich ya skʼanike.
-
Machʼauk ya xjuʼ ya xkʼot ta tsoblej: ya xjuʼ ya xkʼot te winiketik, antsetik, machʼatik ayix yaʼbilalik sok alaletik.
-
Ma tojbiluk te ya xkʼootik ta tsoblej te ya spasik te testigoetik yuʼun Jehová sok ma xyichʼ kʼanel takʼin tey-a.
5. Ya skʼan pasel tulan yuʼun ya xbootik ta tsoblejetik
Kiltik bin la spasik te sfamilia te Jesús. Yakik ta kuxinel ta Nazaret-a, jaʼ yuʼun ya xbeenik oxeb kʼajkʼal ta witstikil swenta ya xkʼotik ta templo ta Jerusalén, jich la spasik jujun jaʼbil. Kʼoponaik Lucas 2:39-42 sok albeyaik skʼoplal ini:
-
¿Wokolbal la yilik te ya xbajtik ta Jerusalén?
-
Jaxan te jaʼate, ¿bintik ya xjuʼ ya smakat yuʼun ya xbaat ta tsoblejetik?
-
¿Aybal bin ya xlokʼ awuʼun-a teme ya apas tulan yuʼun ya xbaat ta tsoblejetik? ¿Bin yuʼun te jich ya awale?
Te Biblia ya yal te mero mukʼ skʼoplal te ya jtsob jbatik ta yichʼel ta mukʼ te Jehová. Kʼoponaik Hebreos 10:24, 25 sok albeyaik skʼoplal ini:
-
¿Bin yuʼun ya skʼan ya jkʼaytes jbatik te ya xbootik ta tsoblejetike?
AY MACHʼATIK JICH YA YALIK: «Ma puersauk ya jtsob jba ta yaʼiyel te skʼop Diose. Tikʼnax-a teme ya jnop te Biblia ta jna».
-
¿Bin texto o ejemplo ta Biblia ya yakʼ ta ilel te jaʼ ya skʼan te Jehová te ya jtsob jbatike?
¿BINTIK LA JNOPTIK?
Te kʼalal ya xbaat ta tsoblejetik ya anaʼbeyxan sba te Jehová, ya awamigoinxan sok ya ajokin yantik ta yichʼel ta mukʼ.
¿Jilbal ta awoʼtan into?
-
¿Bin yuʼun ya yalbotik te Jehová te yakuk xbootik ta tsoblejetike?
-
¿Bin ya anopbey skʼoplal teme ya xbaat ta tsobleje?
-
¿Binxan-utʼil ya skoltayat teme ya xbaat ta tsoblejetike?
YA XJUʼ YA ANOPXAN INI
¿Jichbal ya awaʼiy te ya xkʼexawat te ya xbaat ta tsoblejetike? Ay jtul winik te jich la yaʼiy sba-euke, pero ta patil bayal la smulan te tsoblejetik. Ilawil bin yuʼun.
¡Ma schʼay ta koʼtantik te bin-utʼil la spatbotik koʼtantik! (4:16)
Ilawil bin la spas jtul kerem swenta maba ya xchʼay-a te tsoblejetike.
Ilawil bin ya yalik yantik ta swenta te tsoblejetike.
«¿Aybal bin lek ya ata teme ya xbaat ta tsoblejetik ya spasik te testigoetike?» (Ay ta jw.org)
Jtul winik te kʼax ma lek stalel-ae jelon skuxlejal te kʼalal bajt ta tsoblejetik yuʼun te testigoetik yuʼun Jehová. Ilawil bin yuʼun.
«Maʼyuk bin-ora ya kijkitay-a te jpistolae» (Te J-ilkʼinal ta toyol, 1 yuʼun julio 2014)
Yaniwan amulan-euk sk'oponel ini
TE BINTIK YA SJOJKʼOYLANIK
¿Bin-utʼil ya yakʼik te nojptesel yuʼun Biblia te testigoetik yuʼun Jehová?
Ya xjuʼ ya atuuntes biluk Bibliail te kʼalal ya awichʼ te nojptesel te ya yakʼik te testigoetik yuʼun Jehová. Jaʼnix jich ya xjuʼ ya apas invitar te afamilia sok te awamigotak.
