LECCIÓN 11
¿Bin ya xjuʼ ya apas yuʼun ya skoltayat te bin ya anop ta Biblia?
¿Aybal anopoj ya apas jun aʼtelil te kʼax wokol ya awaʼiye? Swenta ma tulan la awaʼiy-a, kʼunkʼun-niwan la apas. Jichniwan ya awil-euk te skʼoponel te Bibliae. Yaniwan awal: «Ma xlaj kuʼun skʼoponel». Ta lección ini ya kiltik bin ya skoltayat yuʼun ya amulan skʼoponel sok snopel te Bibliae.
1. ¿Bin yuʼun ya skʼan ya jkʼopontik te Biblia ta jujun kʼajkʼal?
Te machʼa ya skʼopon te Biblia ta jujun kʼajkʼal, o te «ley yuʼun Jehová», tseʼel yoʼtan sok lek ya xkʼot skuxlejal (kʼopona Salmo 1:1-3). Ta nailal, jaʼnax kʼopona cheʼoxeb minuto ta jun kʼajkʼal. Teme jich ya apasulan baele, yame amulanxan skʼoponel te Bibliae.
2. ¿Bin ya xjuʼ ya apas yuʼun ya skoltayat te bin ya akʼopone?
Swenta ya skoltayotik te bin ya yal te Bibliae ma tikʼuk-a te jaʼnax ya jkʼopontike, ya skʼan ya jnopilan ta koʼtantik (Josué 1:8). Te kʼalal yakotik ta skʼoponel-ae, kakʼbeytik sujtib te jojkʼoyeletik into: «¿Bin ya snojpteson ta swenta te Jehová? ¿Bin-utʼil ya xjuʼ ya jpas ta jkuxlejal? ¿Bin-utʼil ya xjuʼ ya jtuuntes yuʼun ya jkoltay te yantike?».
3. ¿Bin-utʼil ya alokʼes tiempo ta skʼoponel te Biblia?
¿Wokolbal ya awaʼiy te ya ajojchobtes aba jtsʼinuk ta skʼoponel te Bibliae? Ay wokol ya kaʼiytik. Jaʼ yuʼun ya skʼan ya jnaʼtik stuuntesel «ta lec te tiempo» (Efesios 5:16). Ya skʼan ya awakʼbey yorail ta jujun kʼajkʼal yuʼun ya akʼopon te Bibliae. Ay machʼatik ya skʼoponik ta sab, ta olil kʼajkʼal bael, o ta ajkʼabal. ¿Jayeb ora ya xjuʼ ya akʼopon te Biblia te jaʼate?
JNOPTIKXAN TA LEK
Nopa bin ya xjuʼ ya apas yuʼun ya amulanxan skʼoponel te Bibliae. Ta lección ini jaʼnix jich yame anop schajpanel aba sok te alibro yuʼun jich ya skoltayat-a te nojptesel yakat ta yichʼele.
Jich te bitʼil kʼunkʼun ya xjajch jmulantik jun weʼelil, jaʼnix jich kʼunkʼun ya xjajch jmulantik skʼoponel te Biblia
4. Ya xjuʼ ya amulan skʼoponel te Biblia
Ta sjajchibale, maniwan ya amulan skʼoponel te Biblia. Pero jich te bin-utʼil kʼunkʼun ya xjajch jmulantik jun weʼelil, jaʼnix jich kʼunkʼun ya xjuʼ ya xjajch amulan skʼoponel te Bibliae. Kʼoponaik 1 Pedro 2:2 sok albeyaik skʼoplal ini:
-
Teme ya akʼopon ta jujun kʼajkʼal te Bibliae, ¿yabal skoltayat yuʼun ya amulanxan skʼoponel?
Ilawilik te VIDEO te banti ya awil bin la yalik chaʼoxtul achʼix keremetik te kʼunkʼun jajch smulanik skʼoponel te Bibliae. Ta patil albeyaik skʼoplal ini:
-
¿Bin makotik ta skʼoponel te Biblia te achʼix keremetike?
-
¿Bin la spasik yuʼun ma la skom sbaik ta skʼoponel te Biblia ta jujun kʼajkʼal?
-
¿Bin la spasik yuʼun ikʼbotxan yoʼtanik ta skʼoponel te Bibliae?
Te bintik ya xjuʼ ya apas:
-
Tuuntesa junuk Biblia te tsʼakal kʼasesbil sok te ma wokoluk ta ichʼbeyel swentail te kʼopetik ya stuuntese. Tuuntesa awil te Traducción del Nuevo Mundo teme ay ta akʼope, teme maʼuke kʼopona ta yan kʼopil te ya anaʼ ta leke.
-
Jaʼ nail xa akʼopon te bin ya yikʼbatxan awoʼtane. Te bintik ya xjuʼ ya akʼopone ya ata ta sjajchibal te libro te banti ya yal: «Mulana skʼoponel te Biblia».
-
Najkana ta jun te banti jilat ta skʼoponele. Tuuntesa te programa: «Liʼ kechelon ta skʼoponel te Biblia», te ya ata ta jun ini.
-
Tuuntesa te aplicación JW Library®. Teme ya apas descargar ta acelular, ta atablet o yanxan, yame xjuʼ ya akʼopon o ya awaʼiy stojol te Biblia chikan banti ayat.
-
Tuuntesa te apéndice te ay ta Traducción del Nuevo Mundo. Teyme ya ata mapaetik, jun glosario sok yantikxan te ya skoltayat yuʼun ya amulanxan skʼoponel te Biblia.
5. Nailuk xa anop te alibroe
Kʼoponaik Salmo 119:34 sok albeyaik skʼoplal ini:
-
¿Bin yuʼun jaʼ lek te nailuk ya akʼopon Dios te kʼalal ya xjajchat ta skʼoponel te Biblia o te kʼalal ya achajpan aba sok te alibroe?
¿Bin ya xjuʼ ya apas yuʼun bayalxan bin ya anop jilel te kʼalal ya awichʼ nojptesele? Ta jujun buelta te ya anop jun lección, pasa awil ini:
-
Kʼopona spisil te parrafoetik te ya xchiknaj ta sbabial página yuʼun te jujun lección.
-
Lea ta aBiblia te textoetike, kʼopona sok ilawil bin-utʼil stsakoj sba sok te bin ayat ta snopele.
-
Bona te kʼopetik te ya yakʼbey sujtib te jojkʼoyeletike. Jaʼme ya skoltayat te kʼalal ya awichʼ akʼbeyel te nojptesele.
¿Anaʼojbal-a?
Te testigoetik yuʼun Jehová bayal Bibliaetik stuuntesojik, pero jaʼ bayalxan ya stuuntesik te Traducción del Nuevo Mundo melel tsʼakal kʼasesbil, chikan ta aʼiyel sok yichʼoj te sbiil te Dios (ta jw.org ya xjuʼ ya akʼopon ini: «¿Junaxbal versión yuʼun Biblia ya stuuntesik te stestigotak Jehovae?»).
AY MACHʼATIK JICH YA YALIK: «Wokol ya kaʼiy te ya xkʼot ta koʼtan te bin ya yal te Bibliae, bayal kaʼtel sok chʼajon ta skʼoponel».
-
Jaxan te jaʼate, ¿bin ya awal yuʼun?
¿BINTIK LA JNOPTIK?
Teme ya akʼan te ya skoltayat te bin ya akʼopon ta Bibliae, akʼbeya yorail ta skʼoponel, kʼanbeya Dios te yakuk skoltayat yuʼun ya xkʼot ta awoʼtan sok chajpana aba sok te alibroe.
¿Jilbal ta awoʼtan into?
-
¿Bin ya skʼan ya apas yuʼun ya skoltayat te bin ya anop ta Bibliae?
-
¿Jayeb ora ya xjuʼ ya akʼopon sok ya anop te aBibliae?
-
¿Bin-utʼil ya skoltayat teme ya achajpan aba sok te alibroe?
YA XJUʼ YA ANOPXAN INI
Ilawil bin ya skoltayat yuʼun ya anop ta lek te Bibliae.
Ilawil oxeb te bin-utʼil ya xjuʼ ya akʼopon te Biblia.
Ilawil bin ya xjuʼ ya apas yuʼun ya amulan skʼoponel-a te Biblia.
Ilawil bintik spasojik te machʼatik ayix tiempo yakik ta skʼoponel te Biblia te jich ya xjuʼ ya apas-euke.
Yaniwan amulan-euk sk'oponel ini
TE BINTIK YA SJOJKʼOYLANIK
¿Bin-utʼil ya yakʼik te nojptesel yuʼun Biblia te testigoetik yuʼun Jehová?
Ya xjuʼ ya atuuntes biluk Bibliail te kʼalal ya awichʼ te nojptesel te ya yakʼik te testigoetik yuʼun Jehová. Jaʼnix jich ya xjuʼ ya apas invitar te afamilia sok te awamigotak.
