LECCIÓN 19
¿Jaʼbal smelelil jchʼuunjeletik te testigoetik yuʼun Jehová?
Te testigootik yuʼun Jehová jnaʼojtik te joʼotik te smelelil jchʼuunjelotike. ¿Bin yuʼun? Kilbeytik skʼoplal banti lokʼem tal te bin jchʼuunejtike, bin yuʼun jbiilinejtik testigo yuʼun Jehová sok bin-utʼil ya kakʼtik ta ilel te skʼuxul koʼtantike.
1. ¿Banti lokʼem tal te bin schʼuunejik te testigoetik yuʼun Jehová?
Te Jesús la yalbey te Dios: «Ha smelelil cʼop te acʼope» (Juan 17:17). Jich bitʼil la spas te Jesuse, te testigoetik yuʼun Jehová ya slokʼesik ta sKʼop Dios te bintik schʼuunejike. Ta nailal sbiilinejik Estudianteetik yuʼun Biblia-a. Ta jaʼbil talel 1870 jajch snopik ta lek te sKʼop Diose. Jaʼ la schʼuunik te bin ya yakʼ ta nopel te Bibliae manchukme te yantik religionetik yan-a te bin ya yakʼik ta nopele. Jaʼnix jich jajch scholbeyik yantik te bintik smelelil la staik ta Bibliae. a
2. ¿Bin yuʼun jbiilinejtik testigo yuʼun Jehová?
Te Jehová ya yal te jaʼ testigoetik yuʼun te machʼatik ya x-ichʼot ta mukʼ yuʼune, melel ya spukik ta alel te bin smelelil ta swenta te Diose (Hebreos 11:4-12:1). Jich bitʼil ta namey kʼinal te Dios la yalbey te lum yuʼun: «Haʼex testigohex cuʼun» (kʼopona Isaías 43:10). Jaʼnix jich te Jesús ya yichʼ biilintesel «te testigo te stalel jun yoʼtan» (Apocalipsis 1:5). Jaʼ yuʼun ta 1931 jajch jbiilintik testigo yuʼun Jehová. Kʼax tseʼel koʼtantik yuʼun te jich jbiiltike.
3. ¿Bin-utʼil ya yakʼik ta ilel te skʼuxul yoʼtanik te testigoetik yuʼun Jehová?
Te Jesús kʼux ta yoʼtan te jnopojeletik yuʼun, jich la yiltiklan bitʼil sfamilia (kʼopona Marcos 3:35). Te testigootik yuʼun Jehová jun-nax ayotik, jich kʼoemotik bitʼil jun familia ta swolol Balumilal. Jaʼ yuʼun ya kalbey jbatik hermano sok hermana (Filemón 1, 2). Jaʼnix jich ya jchʼuuntik te mantalil ini: «Cʼux me xawaʼiy ta awoʼtanic te awermanotac» (1 Pedro 2:17). Te testigootik yuʼun Jehová bayal ta chajp bin-utʼil ya kakʼtik ta ilel skʼuxul koʼtantik, jun te bin-utʼil ya jpastik jaʼ te ya jkoltaytik te kermanotaktik ta swolol Balumilal kʼalal ya xkʼax swokolik.
JNOPTIKXAN TA LEK
Jnaʼbeytikxan sba ta lek te testigoetik yuʼun Jehová sok kiltik bin ya yakʼ ta ilel te jaʼik te smelelil jchʼuunjeletike.
Te bin schʼuunejik te smelelil jchʼuunjeletik lokʼem tal ta Biblia sok ya scholbeyik yaʼiy yantik.
4. Lokʼem ta Biblia te bin jchʼuunejtike
Te Jehová la yal te ya xkʼotxan ta koʼtantik ta lek te bin ya yal te Bibliae. Kʼoponaik Daniel 12:4 sok albeyaik skʼoplal ini:
-
¿Bin-a te ya «xpʼohl» kʼalal ya snopikxan ta lek te Biblia te j-abatetik yuʼun te Diose?
Ilawil bin-utʼil la snopik ta lek te sKʼop Dios jtsob estudianteetik yuʼun Biblia, tey ochem skʼoplal-a te Charles Russell. Ilawilik te VIDEO sok albeyaik skʼoplal ini:
-
Jich bitʼil la kiltik ta video, ¿bin-utʼil la snopik ta lek te sKʼop Dios te Charles Russell sok te yantik estudianteetik yuʼun Biblia?
¿Anaʼojbal-a?
Ay baeltik yichʼoj jeltayel te bin jchʼuunejtike. ¿Bin yuʼun? Melel te Dios kʼunkʼun ya yakʼ xkʼot ta koʼtantik te sKʼope, jich bitʼil te kʼunkʼun ya sakub te kʼinal kʼalal ya xlokʼ tal te Kʼajkʼale (kʼoponaik Proverbios 4:18). Jich yuʼun, manchukme ma xjelon te bin ya yal te Bibliae, ya kachʼubtestik te bin jchʼuunejtik kʼalal ya xkʼotxan ta koʼtantik te bin ya yale.
5. Snujpʼ te jich jbiiltike
¿Bin yuʼun la jtatik ta nopel te ya jbiilintik testigo yuʼun Jehová? Ilawilik te VIDEO sok albeyaik skʼoplal ini:
-
¿Bin yuʼun snujpʼ te ya jbiilintik testigo yuʼun Jehová?
¿Bin yuʼun stsaoj te Jehová ants winiketik yuʼun ya xkʼotik ta testigoetik yuʼun? Jaʼ yuʼun te yichʼoj alel bayal lotiletik ta stojole, te ants winiketik ini ya yalbeyik skʼoplal te smelelil ta swenta te Jehová te smelelil Diose. Kilbeytik skʼoplal chebuk te lotiletik-abi.
Ay religionetik te ya yakʼik ta nopel te yalaj skʼan ya jtuuntestik lokʼombaetik yuʼun ya kichʼtik ta mukʼ te Diose. Pero, ¿melelbal-abi? Kʼoponaik Levítico 26:1 sok albeyaik skʼoplal ini:
-
Jich bitʼil ya yal te textoe, ¿bin yilel ya yil Dios te lokʼombaetike?
Ay jwolwanej yuʼun religionetik ya yakʼik ta nopel te jaʼ Dios te Jesuse. Pero, ¿melelbal-abi? Kʼoponaik Juan 20:17 sok albeyaik skʼoplal ini:
-
Jich bitʼil ya yal te textoe, ¿jaʼbal Dios te Jesuse?
-
Te bitʼil la anaʼix te jaʼ Jehová te la stikun te stestigotak swenta ya yakʼik ta nopel te bin smelelil ta stojol sok ta stojol te sNichʼane, ¿bin-utʼil ya awaʼiy aba yuʼun?
6. Talel kʼaxel kʼux ya kaʼiy jbatik
Te Biblia ya spajbey skʼoplal te smelelil jchʼuunjeletik sok te bitʼil ay te jbakʼetaltike. Kʼoponaik 1 Corintios 12:25, 26 sok albeyaik skʼoplal ini:
-
¿Bin ya skʼan ya spasik te smelelil jchʼuunjeletik kʼalal ay swokolik te sjoʼtakik ta jchʼuunjele?
-
¿Bin-utʼil awiloj te ya yakʼik ta ilel skʼuxul yoʼtanik te testigoetik yuʼun Jehová?
Kʼalal te testigoetik yuʼun Jehová ya staik tulan wokol, te yermanotakik ta swolol Balumilal ya xkoltaywanik ta ora. Kiltik junuk ejemplo. Ilawilik te VIDEO. Ta patil albeyaik skʼoplal ini:
-
¿Yabal xchiknaj ta ilel te skʼuxul yoʼtanik te testigoetik yuʼun Jehová kʼalal ya skoltay te yermanotakike? ¿Bin yuʼun?
Te smelelil jchʼuunjeletik ya yakʼbeyik yil skʼuxul yoʼtanik te machʼatik ayik ta wokole.
AY MACHʼATIK JICH YA YALIK: «Te testigoetik yuʼun Jehová jaʼ jun yachʼil religión».
-
¿Bin-ora la sbiilintes Jehová «testigoetik» te j-abatetik yuʼune?
¿BINTIK LA JNOPTIK?
Te testigoetik yuʼun Jehová jaʼik te smelelil jchʼuunjeletike. Jich kʼoemotik bitʼil jun familia ta swolol Balumilal te ya kichʼtik ta mukʼ te Diose, te lokʼem ta Biblia te bin jchʼuunejtike sok te ya kakʼtik ta naʼel te bin smelelil ta stojol te Jehová.
¿Jilbal ta awoʼtan into?
-
¿Bin yuʼun la jtatik ta nopel te ya jbiilintik testigo yuʼun Jehová?
-
¿Bin-utʼil talel kʼaxel ya kakʼtik ta ilel skʼuxul koʼtantik?
-
¿Yabal achʼuun te jaʼ smelelil jchʼuunjeletik te testigoetik yuʼun Jehová?
YA XJUʼ YA ANOPXAN INI
Naʼbeyaxan sba te Testigoetike.
Ilawil bin nojptesel la staik ta ilel te testigoetik yuʼun Jehová te manix jichuk-ae.
Ilbeya sujtib te jojkʼoyeletik te ayniwan apasbeyoj aba ta stojol te testigoetik yuʼun Jehová.
«Te bintik ya sjojkʼoylanik ta swenta te sTestigotak Jehová» (Ay ta jw.org)
Ta skaj te slab yoʼtan te Stephen bayal bin ma lek la spas. Ilawil bin talelil la yil te ay yuʼunik te testigoetik yuʼun Jehová te jaʼ tijbot yoʼtan ta sjeltayel te skuxlejal.
«Yak ta jinel ta jkʼaxel-a te jtalele» (Te J-ilkʼinal ta toyol, 1 yuʼun julio 2015)
a Te J-ilkʼinal ta toyol, jaʼ jun revista te jajch ta pukel talel ta 1879 sok yakto ta pukel ta ora ini.
Yaniwan amulan-euk sk'oponel ini
TE BINTIK YA SJOJKʼOYLANIK
¿Bin-utʼil ya yakʼik te nojptesel yuʼun Biblia te testigoetik yuʼun Jehová?
Ya xjuʼ ya atuuntes biluk Bibliail te kʼalal ya awichʼ te nojptesel te ya yakʼik te testigoetik yuʼun Jehová. Jaʼnix jich ya xjuʼ ya apas invitar te afamilia sok te awamigotak.
