LECCIÓN 24
¿Bin ya yal te Biblia ta swenta te chʼul-abatetike?
Te Jehová ya skʼan te yakuk jnaʼbeytik sba te sfamilia te ay ta chʼulchane. Tey ochem skʼoplal-a te chʼul-abatetik, te jaʼnix jich naʼbilik sba bitʼil «snichʼnab te Diose» (Job 38:7). ¿Bin ya yal te Biblia ta swenta te chʼul-abatetik? ¿Aybal bin ya spas ta stojol te ants winiketik? ¿Lekikbal spisil te chʼul-abatetike?
1. ¿Machʼatik-a te chʼul-abatetike?
Te Jehová la spas te chʼul-abatetik te kʼalal mato spasoj-a te Balumilale. Ma xjuʼ ya kiltik, melel espirituetik jich bitʼil te Jehová te ayik ta chʼulchan (Hebreos 1:14). Ay bayal ta mil millón chʼul-abatetik te yanyantik-a te tʼujbil talelil yuʼunike (Apocalipsis 5:11). Jaʼ ya spasik te bin ya x-albotik yuʼun te Jehová (Salmo 103:20). Ta namey, te Jehová ay baeltik la stuuntes chʼul-abatetik yuʼun ay bin ya yakʼbey snaʼ te lum yuʼune sok yuʼun ya skoltay. Ta ora ini, te chʼul-abatetik ya xkoltaywanik ta stael ants winiketik te ya skʼan ya snaʼbeyik sba te Diose.
2. ¿Machʼa-a te Satanás sok te pukujetik yuʼune?
Ay chʼul-abatetik te ma la schʼuunbeyik skʼop te Jehová. Te machʼa nail jich la spase jaʼ te «Satanás sbihil, ha te ya sloʼloy spisil te bahlumilale» (Apocalipsis 12:9). Te Satanás la skʼan sjoʼtak, jaʼ yuʼun la sloʼlay te Adán sok te Eva yuʼun ya skʼaxuntaybeyik skʼop te Jehová. Jaʼnix jich juʼ yuʼun sloʼlayel yantik chʼul-abatetik te la sbiilinik pukujetik. Te Jehová la schʼojtiklan koel ta Balumilal sok nopol ya yichʼikix lajinel (kʼopona Apocalipsis 12:9, 12).
3. ¿Bin-utʼil ya xloʼlaywanik te Satanás sok te pukujetik yuʼune?
Te Satanás sok te pukujetik ya stuuntesik te espiritismo yuʼun ya xloʼlaywanik. Jich bitʼil, stuuntesel te horóscopo, te astrología, ay machʼatik ya xbajtik ta stojol te machʼa yalaj snaʼ te bin ya xkʼot ta pasel ta pajel chaʼbej, j-akʼchameletik sok jpik-kʼabaletik. Jaʼnix jich ay ya sleik poxtayel te smakojbey skʼoplal te espiritismo. Sok ay machʼatik ya skuyik te ya xjuʼ ya xkʼopojik sok te machʼatik lajemikixe. Pero te Jehová ya yalbotik: «Ma me xbahex ta stojol te machʼatic ya scʼoponic chʼuhlelal, o ta stojol te jnaʼojeletique» (Levítico 19:31). Te Jehová ya skʼan ya skanantayotik ta stojol te Satanás sok te pukujetik te ya skʼan ya yutsʼinotik.
JNOPTIKXAN TA LEK
Kilbeytik skʼoplal te bintik lek ya spasik te chʼul-abatetike sok bin wokolil ya xjuʼ ya jtatik yuʼun te espiritismoe. Jaʼnix jich ya kiltik bin-utʼil ya xjuʼ ya jkanantay jbatik ta stojol te Satanás sok te pukujetik yuʼune.
4. Te chʼul-abatetik ya skoltay te ants winiketik ta snaʼbeyel sba te Jehová
Te chʼul-abatetike manix jaʼuk ya scholbeyik skʼop Dios-a te ants winiketike. Te bin ya spasike jaʼ te ya skoltay te j-abatetik yuʼun Dios ta stael te ants winiketik te ya skʼan ya snaʼbeyik sba te Jehová. Kʼoponaik Apocalipsis 14:6, 7 sok albeyaik skʼoplal ini:
-
¿Bin yuʼun ya jkʼantik te yakuk skoltayotik te chʼul-abatetik ta scholel te skʼop Diose?
-
¿Yabal yakʼbat stseʼelil awoʼtan snaʼel te jaʼ ya stojobtesat te chʼul-abatetik ta stojol te machʼatik ya skʼan ya snopik te Bibliae? ¿Bin yuʼun?
5. Pʼaja te espiritismoe
Te Satanás sok te pukujetik yuʼune jaʼ skontratak te Jehová sok jaʼ jkontrataktik-euk. Kʼoponaik Lucas 9:38-42 sok albeyaik skʼoplal ini:
-
¿Bin-utʼil ya x-utsʼinwanik te pukujetike?
Ma jkʼantik te ya jambeytik sbe te pukujetik yuʼun ya swentainotik. Kʼoponaik Deuteronomio 18:10-12 sok albeyaik skʼoplal ini:
-
¿Bin-utʼil ya skʼan ya swentainotik sok ya skʼoponotik te pukujetike? ¿Bintik ya spasik ta alumal te smakojbey skʼoplal te espiritismoe?
-
¿Snujpʼbal te ya yalbotik Dios te ya skʼan ya jpʼajtik spisil te bintik smakojbey skʼoplal te espiritismoe? ¿Bin yuʼun?
Ilawilik te VIDEO sok albeyaik skʼoplal ini:
-
¿Yabal x-utsʼinwan te bin schukojbey ta skʼab yal te Palesae? ¿Bin yuʼun?
-
¿Bin la spas te Palesa yuʼun ma x-utsʼinot yuʼun-a te pukujetike?
Te j-abatetik yuʼun Dios spisil-ora spʼajojik te yaʼtel te pukujetik. Kʼoponaik Hechos 19:19 sok 1 Corintios 10:21, sok albeyaik skʼoplal ini:
-
¿Bin yuʼun ya skʼan ya achikʼ o ya alajinbey skʼoplal te bintik smakojbey skʼoplal te espiritismoe?
6. Yame xjuʼ awuʼun stsalel te Satanás sok te pukujetik yuʼune
Te pukujetik jaʼ wentainbilik yuʼun te Satanás. Yan te chʼul-abatetike jaʼ wentainbilik yuʼun te Miguel, te jaʼ yan sbiil te Jesuse. ¿Jayebto yuʼel te Miguele? Kʼoponaik Apocalipsis 12:7-9 sok albeyaik skʼoplal ini:
-
¿Machʼatik bayalxan yuʼelik: jaʼbal te Miguel sok te chʼul-abatetik yuʼune, o jaʼ te Satanás sok te pukujetik yuʼune?
-
¿Yabal skʼan ya xiʼik te Satanás sok te pukujetik te smelelil jchʼuunjeletike?
Yame xjuʼ awuʼun stsalel te Satanás sok te pukujetik yuʼune. Kʼoponaik Santiago 4:7 sok albeyaik skʼoplal ini:
-
¿Bin-utʼil maba ya awakʼ yochintayat te Satanás sok te pukujetike?
AY MACHʼATIK JICH YA YALIK: «Ma xyutsʼinotik te tajimal o te yilel peliculaetik te yichʼoj magia sok espiritismo, melel jaʼnax ya jkʼasestik kʼajkʼal-a».
-
¿Bin yuʼun ma lek te jich ya jnoptike?
¿BINTIK LA JNOPTIK?
Te chʼul-abatetik ya skoltayotik. Yan te Satanás sok te pukujetik yuʼun jaʼ skontratak te Jehová, sok ya stuuntesik te espiritismo yuʼun ya sloʼlay te ants winiketik.
¿Jilbal ta awoʼtan into?
-
¿Bin ya spasik te chʼul-abatetik yuʼun ya skoltay te ants winiketik ta snaʼbeyel sba te Jehová?
-
¿Machʼa-a te Satanás sok te pukujetike?
-
¿Bin yuʼun ya skʼan ya apʼaj spisil te bintik yichʼoj espiritismo?
YA XJUʼ YA ANOPXAN INI
Nopbeya skʼoplal bin yuʼun jaʼ te jwolwanej yuʼun chʼul-abatetik te Jesús.
Kʼopona awil bin yuʼun te ma jaʼuknax señail te bin chopol te Satanase.
Ilawil bin-utʼil jtul ants juʼ yuʼun stsalel te pukujetike.
«La stabey swentail te skuxlejal» (Te J-ilkʼinal ta toyol, 1 yuʼun julio 1993)
Ilawil bin-utʼil te Satanás ya stuuntes te espiritismo yuʼun ya sloʼlay te ants winiketik.
Yaniwan amulan-euk sk'oponel ini
TE BINTIK YA SJOJKʼOYLANIK
¿Bin-utʼil ya yakʼik te nojptesel yuʼun Biblia te testigoetik yuʼun Jehová?
Ya xjuʼ ya atuuntes biluk Bibliail te kʼalal ya awichʼ te nojptesel te ya yakʼik te testigoetik yuʼun Jehová. Jaʼnix jich ya xjuʼ ya apas invitar te afamilia sok te awamigotak.
